Bhumiya
उत्पत्ति 11
भासा हे गडबडी
बाढ के बाद सगलू मनसे दुनिया हे एकै भासा बोलथै, अउ सगलू मनसेन एकै बोली के परयोग करथै। जब मनसेन पूरब के पल्ला बढिन ता उनके सिनार देस हे अक्ठी मइदान मिलथै, मनसेन उहै रहै के निता रुक जथै। उन आपन हे सोचथै, कि हमके ईटा बनामै चाही अउ उके आगी हे पकामै के चाही, ताकि अउ ठोस बन सकै, इहैनिता मनसे अपन घर बनामै के निता पथरा के जिघा हे ईटा के परयोग करे लागथै, अउ चूना के जिघा हे माटी के गारा के परयोग करथै। एखर बाद मनसेन कथै, “हम अपन निता अक्ठी सहर बनइ अउ हम अक्ठी बोहत ऊंच इमारत बनउबे जउन बादर के छुवै, हइ मेर लग अपन नाम कमा लेब, अउ अगर असना करब ता पूरा भुंइ लग हमके अलगे होय के झइ पडै, हम अक जिघा अक संग रहब।” जउन सहर अउ इमारत के मनसे बनाउत रहै, भगवान उनही देखै के निता स्वरग लग उतर के तरी छो आइस। भगवान कथै, “हइ सगलू मनसे एकै भासा बोलथै अउ मै देखथो कि उन हइ काम के करै के निता अकजुट हबै, इन तो सब कुछु कर सकथै ओखर केबल सुरुवात हबै, जउन काम उन आगू करै के चाहथै, ऊ काम उनखर निता कठिन नेहको होही। इहैनिता आबा हम तरी छो चली अउ उनखर भासा हे गडबडी कर दइ, तब इन अक दूसर के बात के नेहको समझ पइहिन।” हइ मेर लग भगवान मनसेन के पूरी भुंइ हे फइलाय दइस, मनसे ऊ सहर के बनामै के काम पूर नेहको कर सकिन। इहै ऊ जिघा आय जिहां भगवान पूरी दुनिया के भासा के गडबड कर दय रहै, इहैनिता हइ जिघा के नाम बेबीलोन पडिस, हइ मेर लग भगवान ऊ जिघा लग मनसेन के भुंइ के सगलू देस हे फइलाइस।
सेम कर पुरखा
हइ सेम के परवार के किस्सा हबै, जल परलय के बाद जब सेम सव साल के होथै, ता ओखर लरका अर्पसद पइदा होथै। अर्पसद के पइदा होय के बाद सेम पांच सव साल जिन्दा रथै, ओखर कइठे टोरवा-टोरिया पइदा हुइन। जब अर्पसद पइतीस साल के होथै तब ऊ सेलह के पइदा करथै। सेलह के पइदा के बाद अर्पसद चार सव तीन साल जिन्दा रथै, इन दिनन हे ओखर कइनठे टोरवा-टोरिया पइदा हुइन। जब सेलह तीस साल के हुइस, तब ऊ एबेर के पइदा करिस। एबेर के पइदा के बाद सेलह चार सव तीन साल तक जिन्दा रथै, ओखरो कइनठे टोरवा-टोरिया पइदा हुइन। जब एबेर चउतिस साल के हुइस, तब ऊ पेलेग के पइदा करिस। पेलेग के पइदा के बाद एबेर चार सव तीस साल तक जिन्दा रथै, ओखरो कइनठे टोरवा-टोरिया पइदा हुइन। जब पेलेग तीस साल के हुइस तब ऊ रऊ के पइदा करथै। रऊ के पइदा के बाद पेलेग दुइ सव नव साल तक जिन्दा रथै, ओखरो कइनठे टोरवा-टोरिया पइदा हुइन। जब रऊ बत्तीस साल के हुइस तब ऊ सरुग के पइदा करिस। सरुग के पइदा के बाद रऊ दुइ सव सात साल तक जिन्दा रहिस, उनखरो कइठे टोरवा टोरिया पइदा हुइन। जब सरुग तीस साल के हुइस तब ऊ नाहोर के पइदा करिस। नाहोर के पइदा के बाद सरुग दुइ सव साल तक जिन्दा रहिस, उनखरो कइठे टोरवा-टोरिया पइदा हुइन। जब नाहोर उनतीस साल के हुइस तब ऊ तेरह के पइदा करिस। तेरह के पइदा के बाद नाहोर एक सव उन्नीस साल तक जिन्दा रहिस, ओखरो कइनठे टोरवा-टोरिया पइदा हुइन। जब तेरह सत्तर साल के हुइस तब ओखर टोरवा अब्राम, नाहोर अउ हारान के पइदा करथै।
तेरह कर पुरखा
हइ तेरह के परवार के किस्सा आय, तेरह अब्राम, नाहोर अउ हारान के पइदा करिस, हारान लूत के बाफ रथै। हारान के मिरतू ओखर बाफ तेरह के जियत हे कसदी जात के ऊर नाम के सहर हे हुइस, जउन ओखर पइदा के जिघा रथै। अब्राम अउ नाहोर दोनोझन काज करथै, अब्राम के डउकी सारै रथै, नाहोर के डउकी मिल्का रथै, मिल्का हारान के टोरिया रथै, हारान मिल्का अउ इस्का कर बाफ रथै। सारै के कउनो लरका नेहको रथै, काखे ऊ कउनो लरका पइदा करै के काबिल नेहको रथै। तेरह अपन टोरवा अब्राम, हारान कर टोरवा मतलब अपन नाती पोता लूत अउ अब्राम कर डउकी अउ अपन पुतउ सारै के संग लइके कसदी जात के ऊर सहर हे छांड देथै, ऊ कनान देस के पल्ला चल पडथै, पय जब ऊ हारान नाम देस हे पहुंचथै तब उहै बस जथै। तेरह दुइ सव पांच साल जिन्दा रहिस, तब ऊ हारान हे मर गइस।
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.