Bhumiya
उत्पत्ति 9
भगवान नूह के संग टीमा बांधथै
भगवान नूह के अउ ओखर लरकन के आसिरवाद देथै अउ उनखर लग कथै, फला-फूला अउ भुंइ हे बगर जा। भुंइ के सगलू जानवर अउ बादर कर हर अक्ठी चिरइया तुम्हर इज्जत करहिन अउ तुम्हर लग डरहिन। भुंइ हे रेंगै बाले हर अक्ठी जीव अउ समुन्दर के हर अक्ठी मछडी तुम्हर इज्जत करहिन अउ तुम्हर लग डरहिन, तुम हइ सगलू के उप्पर अधिकार करिहा। सगलू रेंगै बाले जीव तुम्हर भोजन हुइहिन, जसना मै तुमके हरियर पउधा दय रथो, ओसनेन अब सब कुछ देथो। मै तुमके अक्ठी आदेस देथो, कि तुम कउनो जानवर के तब तक झइ खइहा, जब तक कि मास हे खून हबै।1 काखे मै जरूर तुम्हर खून के बदला लइहों, मै हर पसु लग हर मनसेन लग बदला लइहों, मै हर मनसे लग ओखर भाई-बेहन के खून के बदला लइहों। भगवान मनसे के अपन रूप हे बनाय हबै, इहैनिता जउन कउ मनसे के खून बहाही, ओखर खून मनसे के दवारा बहाय जही। तुम फला-फूला, भुंइ हे बोहत बढत जा अउ अनगिनत मनसे हुइ जा। भगवान नूह अउ ओखर टोरवन लग कथै, “मै तुम्हर अउ तुम्हर बाद होय बाले तुम्हर लरका के संग, अउ सगलू जिन्दा परानी मतलब कि पक्छी, रखे बाले पसु, भुंइ के सगलू बन पसु अउ जिहाज लग निकरे बाले सगलू जीव के संग टीमा बांधथो। मै तुम्हर संग अपन हइ टीमा बांधथो कि फेर कबहुन पानी लग परानी नास नेहको हुइहिन, भुंइ के बरबाद करै निता फेरै कबहुन जल परलय नेहको होही।” भगवान फेरै कथै, मै तुम्हर संग अउ जेतका जिन्दा परानी तोर संग हबै, उन सगलू के संग जुग-जुग के निता टीमा बांधथो, भगवान के हइ चिन्हा हबै, मै बादर हे अपन दबोरा रखथो, ऊ मोर अउ भुंइ के बीच करे गय टीमा के चिन्हा होही। जब मै भुंइ के उप्पर बादर लइहों अउ उनखर बीच दबोरा दिखही, तब मोर जउन टीमा तुम्हर संग अउ सगलू जिन्दा परानी के संग बांधे हव, ओही मै सुरता करिहों, तब असना पानी फेरै नेहको बरसही जेखर लग सगलू परानी नास होय। जब बादर हे दबोरा दिखही तब उके देखके ऊ टीमा के सुरता करिहों, जउन मै भगवान अउ भुंइ के सगलू जिन्दा परानी के बीच बांधे हव। एखर बाद भगवान नूह लग कथै, “जउन टीमा मै अपन अउ भुंइ के सगलू परानी के बीच बांधे हव, ओखर इहै चिन्हा हबै।”
नूह अउ ओखर टोरवा
जिहाज लग बाहिर निकरै बाले नूह के टोरवा, सेम, हाम अउ येपेत हबै, हाम कनान के बाफ रथै। हइ तीनोठे नूह के टोरवा रथै, अउ दुनिया के सगलू मनसे हइ तीनो लग पइदा हुइन। नूह खेती बारी करै का सुरुवात करिस, ऊ अंगूर कर अक्ठी बगिया लगाइस। नूह अक रोज अंगूर के दारू के पीके नसा हे भुत्त हुइ गय अउ अपन तम्बू हे बिगर कपडा के पसर गइस। तब कनान के बाफ हाम अपन बाफ नूह के लंगडा देखिस, अउ ऊ बाहिर आयके अपन दोनो भाइयन के गुठे देथै। तब सेम अउ येपेत अक्ठी कपडा अपन कांधा हे धरथै, अउ पछुत्ता चल के भित्तर गइन अउ उन अपन बाफ के ओढाय देथै, अउ उन अपन मुंह पाछू करे रथै, इहैनिता उन असना करथै, कि अपन बाफ के बिना कपडा के झइ देख सकै। जब नूह के नसा उतरथै तब ऊ जान जथै, कि ओखर सब लग नान लरका ओखर संग काहिन करे हबै। नूह उके सराप देथै, “कनान सापित हबै, ऊ अपन भाइयन के दासो के दास होय।” नूह फेरै कथै, “सेम के परभु भगवान धन्य हबै, कनान देस सेम के दास होय। भगवान येपेत के लरकन के फइलाबै, अउ येपेत सेम के तम्बू हे रहै, अउ कनान देस ओखर दास बनै।” जल परलय के बाद नूह तीन सव पचास साल तक जिन्दा रथै। हइ मेर लग नूह के कुल उमर नव सव पचास साल हुइस, एखर बाद नूह के मिरतू हुइ गइस।
Source notes (1)
- Cross-reference लयबेवस्था 7:26; बेवस्थाबिबरन 12:23; 1 तीमु 4:3
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.