1 Timote

Areka ŋɔcɔkɔ-cɔkɔ nŋɛ Pol encicɛ Timote mɔ

1 Timote

Kəbɛrɛ ka moloku ma Pol areka ŋaŋɛ disrɛ

Buk ba 1 Timote areka ŋɔ nŋɛ wəmarəs Pol encicɛ wɛnc Timote mɔ. Anacicəs 1 Timote kəyɛfɛ meren wəco camət-tin kɔ mɛrəŋ (62) kəbəp ka meren wəco camət-tin kɔ maŋkəlɛ (64) ntɛ kəkom ka Krist kəncepər mɔ. Tantɛ tɛnabəp ntɛ kiyi wəyeŋ ka Pol kənclip mɔ. Pol ɛnayi tetin kɔ Timote, haŋ pəcwe kɔ pəlarəm «wan kɔn» (AFilip 2.22; 1 Timote 1.2,18).

Areka ŋaŋɛ ŋeyi reka maŋkəlɛ (4) yɔkɔ dacɔ nŋɛ Pol ɛnacicɛ afum, bafɔ kəloŋkanɛ ka alaŋ de. Reka yɔkɔ maas (3) sɔ iyɔ yayɛ: 2 Timote, Tit kɔ Filemɔn. Areka ŋa 1 Timote ŋɔyɔ mosom mɛlarəm teta nnɔ kəfɛk ka kəloŋkanɛ ka alaŋ a Kanu kəyi mɔ (1 Timote 2.1-15), kɔ kəloku teta akiriŋ aka kəloŋkanɛ ka alaŋ a Kanu (1 Timote 3.1-13), kɔ kəcɛm-cɛməs ka abaŋɛnɛ kəcərɛ a yem (1 Timote 1.3-11; 4.1-5; 6.2-5). Tatɔkɔ tementər tɔkɔ Pol ɛnctəksɛ Timote kəyɔnɛ wəkiriŋ nnɔ kəloŋkanɛ ka alaŋ a Kanu kəyi mɔ. 1 Timote ŋɔyɔ mosom mɛlarəm mmɛ mɛntam mɔkɔ kəmar akiriŋ asu a kəloŋkanɛ ka alaŋ kəcepərɛnɛ ka yɛbəc yaŋan nnɔ kəloŋkanɛ kəfɛt kiyi mɔ.

Kəbumsɛnɛ ka ti

Pol oncop kəyif Timote (1.1-2).

2 K'ɔsɔŋɛ sɔ Timote kəcɛm-cɛməs teta nnɔ abaŋɛnɛ kəcərɛ a yem ŋayi mɔ (1.3-11).

3 Kɔ Pol oŋcɔnɛ sɔ kəsɔkəs tɔkɔ ɛŋcərɛnɛ sɔ teta Yesu Krist mɔ (1.12-19)

4 K'ɔsɔŋ sɔ Timote mosom nnɔ teta kəfɛk kɔ nnɔ teta akiriŋ a kəloŋkanɛ ka alaŋ a Kanu ŋayi mɔ (2-3).

5 Dəkəlip da areka ŋa Pol, k'ɔsɔŋ Timote mosom mɛlpəs (4-6).