1 Timote 4

Məkɛmbərnɛ mɛtəksɛ ma yem

1Amera Ŋecempi ŋoloku ti pəsoku disrɛ: Tɛm tɛlpəs tantɛ, alɔma ŋandelukus kəlaŋ darəŋ, ŋasektərnɛ mera yɛlɛc nyɛ yɛntalər afum mɔ, mɛtəksɛ mmɛ m'ɛŋyɛfɛ nnɔ yɔŋk yɛlɛc yeyi mɔ. 2Ŋandesaknɛ oŋ ŋagbaymɛ nnɔ afum aŋɛ ŋambaŋɛnɛ kəlomp kɔ nnɔ ayemɛ ŋayi mɔ, aŋɛ ŋayi pəmɔ ntɛ antəp mera yaŋan tamp tɛnɛpəlɛ mɔ. 3Afum akakɔ ŋanctəksɛ a pəmar fɛ panɛncɛ kɔ pəyɔnɛ fɛ ti, ta pacdi yeri yɔlɔma. Mba Kanu kənalompəs yeri yayɔkɔ ntɛ tɔŋsɔŋɛ alaŋ aŋɛ ŋancərɛ kance mɔ, ŋalɛk yi ŋacyif Kanu barka. 4Bawo yolompəs ya Kanu fəp yentesɛ. Ali pin afɔgbal, mba afum ŋalɛk yi fəp ŋacyif Kanu barka. 5Ti disrɛ Toloku ta Kanu kɔ kətola kəŋsɔŋɛ kɔ ca fəp yɔyɔnɛ yopus ya Kanu.

6Kɔ məntəksɛ awɛnc əm aŋa mɛtəksɛ mamɛ-ɛ, məndeyɔnɛ wəmarəs wətɔt wəka Yesu Krist, məndementər a mənɛmbərɛ moloku ma kəlaŋ kɔ mɛtəksɛ mɔtɔt mmɛ məsektərnɛ kəcəmɛ darəŋ mɔ. 7Mba məlukus mɛtəksɛ mɛpər kɔ mmɛ mɔntɔsol kɔ kəgbɛkər Kanu kəlaŋ mɔ. Məyeŋk dis kəcəmɛ mɛfaŋ ma Kanu darəŋ. 8Kəyeŋkəs ka dis kəntesɛ, mba mes mepic mɔ kəyɔ. Kɔ kəcəmɛ mɛfaŋ ma Kanu darəŋ kəyɔ dəkəcəmɛ nnɔ ca fəp yeyi mɔ, bawo kəŋsɔŋ su kiyi wəyeŋ ka mɔkɔ, kəsɔŋ su sɔ temer ta kiyi wəyeŋ ka doru o doru nkɛ kənder mɔ. 9Toloku ta kance tɔ tantɛ ntɛ pəmar a fəp fəbaŋ mɔ. 10Itɔ səmbəcɛ pəyeŋki disrɛ səcsimsɛ sɔ dis, bawo səŋgbɛkər mera yosu nnɔ Kanu kiyi wəyeŋ ka doru o doru nkɛ kəyɔnɛ Wəyac ka afum fəp pənaŋkanɛ akɔ ŋaŋgbɛkər kɔ kəlaŋ mɔ.

11Tantɛ tɔ pəmar məsom, məctəksɛ sɔ: 12Ta fum o fum pəfan'əm a wətɛmp məyɔnɛ. Mba məna, məyɔnɛ totubucnɛ nnɔ alaŋ ŋayi mɔ kəyɛfɛ dəmoloku, mɔkɔt, kəbɔtər, kəkɔbəp kəgbɛkər kəlaŋ kam Kanu kɔ dosoku dam.

13Haŋ icder, məsɔŋnɛ kəckaraŋ Yecicəs Yosoku fɔr ya afum fəp kiriŋ, məcloku ŋa kəcəmɛ moloku ma Kanu darəŋ, məctəksɛ ŋa. 14Ta mədɛncəs kəpocɛ ka Amera Ŋecempi nkɛ məntɔmpər mɔ, nkɛ mənasɔtɔ ntɛ abeki ŋanalok-loku tewe ta Kanu, ŋadeŋər əm waca dəromp mɔ. 15Məsumpərɛ mes mamɛ fəp waca mɛrəŋ, məsɔŋnɛ məlməl yɛbəc yayɛ, ti disrɛ fəp fəndenəŋk kəcɔŋnɛ kam kiriŋ. 16Məkɛmbərnɛ tecepərɛnɛ tam doru kɔ mɛtəksɛ mam. Məsektərnɛ mes mamɔkɔ. Ɛy, kɔ məndeyɔ tatɔkɔ-ɛ, məndeyacnɛ mənasərka, məyacɛnɛ sɔ akɔ ŋancəŋkəl əm mɔ.