1 Timote 3

Akiriŋ a kəloŋkanɛ ka alaŋ a Yesu kɔ amarɛnɛ aŋan

1Toloku ta kance tɔ tantɛ: Nwɛ ɛŋfaŋ kəyɔnɛ wəkiriŋ ka kəloŋkanɛ ka alaŋ a Yesu dacɔ mɔ, ɛfaŋ yɛbəc nyɛ yentesɛ mɔ. 2Awa, pəmar wəkiriŋ pəyɔnɛ fum nwɛ antɔlokɛ pəlɛc o pəlɛc mɔ, pəyɔnɛ wos wəka wəran wəkin1, pəckɛmbərnɛ kəyɔ mes mɛlɛc, pəyɔnɛ fum wəleləsnɛ. Pəmar pəcbaŋ afum aŋɛ ŋander ndɔrɔn mɔ, pəctam sɔ kətəksɛ. 3Ta pəyɔnɛ wəcis, ta pəyɔnɛ wəwonɛ abəkəc, mba pədɛncɛ, pəyinɛ pəforu. Ta pəyɔnɛ wəsektərnɛ teta pəsam. 4Pəmar wəkiriŋ pəkɔtɛnɛ mes ma kəlɔ kɔn belbel, awut ɔn ŋacəmɛ mosom mɔn darəŋ kəleləs fəp disrɛ. 5Mba kɔ fum ɔntɔcərɛ kəkɔtɛnɛ mes ma kəlɔ kɔn disrɛ belbel-ɛ, cəke c'ɛntam kəsumpər teta kəloŋkanɛ ka alaŋ a Kanu-ɛ? 6Pəmar fɛ wəkiriŋ pəyɔnɛ wəlaŋ wəfu, tendesɔŋɛ kɔ kədot banca, tɔsɔŋɛ kɔ kəcɛm-cɛmnɛ a encepər akɔ. Tɔsɔŋɛ kɔ pəsɔtɔ kətɔrəs pəmɔ nkɛ ambocər Ŋɔŋk Ŋɛlɛc mɔ. 7Pəmar wəkiriŋ pəsɔtɔ kəleləs ka atɔlaŋ Krist, ntɛ tɔŋsɔŋɛ ta afani kɔ, ta ɛntɛmpɛnɛ towul pa Ŋɔŋk Ŋɛlɛc mɔ.

Amar aŋɛ ŋambəcɛ kəloŋkanɛ ka alaŋ a Yesu mɔ

8Amar aŋɛ ŋambəcɛ kəloŋkanɛ ka alaŋ mɔ ŋa sɔ ŋayinɛ kəleləs kɔ pəlompu. Pəmar fɛ ŋacsɔŋnɛ member kɔ pəyɔnɛ fɛ ti ŋactɛn kəsɔtɔ daka kətɔlomp disrɛ. 9Pəmar ŋamɛŋkərnɛ mera yɔtɔt disrɛ tosom ntɛ Kanu kəmentər su ntɛ pəmar ŋalaŋ mɔ. 10Pəmar krɛsna pakɔkcɛ ŋa. Tekiriŋ ta ti, kɔ tɔlɔm o tɔlɔm tɔntɔyi tetaŋan-ɛ, ŋantam oŋ kəbəc pəmɔ amar aŋɛ ŋambəcɛ kəloŋkanɛ ka alaŋ mɔ.

11Itɔ pəmar payɔnɛ sɔ aran aŋɛ ŋayi yɛbəc yayɔkɔ mɔ: Pəmar paleləs ŋa, pəmar fɛ ŋacloku pəlɛc pa akɔ, ŋackɛmbərnɛ kəyɔ mes mɛlɛc, pəmar ŋalomp dəmosumpər maŋan fɔr ya afum fəp kiriŋ. 12Pəmar nwɛ o nwɛ amar aŋɛ ŋambəc kəloŋkanɛ ka alaŋ dacɔ mɔ, pənɛncɛ wəran wəkin, pəctam kədusum awut ɔn kɔ kəkɔtɛnɛ mes ma kəlɔ kɔn belbel. 13Amar aŋɛ ŋambəcɛ belbel kəloŋkanɛ ka alaŋ mɔ, ŋasɔtɔ dəkəcəmɛ dɔtɔt, ŋacəp sɔ bəkəc dəkəlaŋ nkɛ kəloŋka su kɔ Krist Yesu mɔ.

Pəwaŋkəra mpɛ kəlaŋ kəsɔŋ su mɔ

14Incic'am tantɛ kəgbɛkər amera disrɛ a pəfɔwon sɔ ider kədenəŋk əm. 15Mba kɔ tɔyɔnɛ ta inder gbəncana bambɛ-ɛ, məcərɛ krɛsna ntɛ pəmar payi kəlɔ disrɛ ka Kanu, itɔ tatɔkɔ kəloŋkanɛ ka alaŋ a Kanu nkɛ kəyi wəyeŋ mɔ. Kəloŋkanɛ ka alaŋ kaŋkɔ kəŋsoc kəcbum sɔ kance. 16Ntɛ tɔ pəmar fəp fosu səcərɛ! Ɛy, afɔgbɛkəl debeki da tosom tɔgbɔpnɛ ta Kanu ntɛ kəcəmɛ kosu mɛfaŋ ma Kanu darəŋ kəmentər mɔ:

Krist ɛnamentərnɛ pəmɔ fum,

kɔ Amera Ŋecempi ŋɔlɔm kɔ wəlompu,

kɔ mɛlɛkɛ ŋanəŋk kɔ.

K'ancam tetɔn nnɔ afum ŋayi mɔ,

kɔ afum a doru ŋaŋgbɛkər kɔ kəlaŋ,

k'ampɛnɛ kɔ dənɔrɔ da debeki da Kanu.