1 Timote 2

Patolanɛ afum Kanu motola fəp

1Tes tɔcɔkɔcɔkɔ, isom afum kətola Kanu, kəsali, kəlɛtsɛnɛ kɔ kəyif kɔ barka teta afum a doru fəp. 2Patola Kanu teta abɛ kɔ aŋɛ ŋantɔmpər kətam mɔ, ntɛ tɔŋsɔŋɛ patam kəcepərɛnɛ kiyi doru abəkəc kəfəntərɛ, pəforu, pəlel kɔ kəcəmɛ mɛfaŋ ma Kanu darəŋ. 3Nənəŋk ntɛ tentesɛ kɔ tɔmbɔt Kanu Wəyac kosu mɔ: 4Kəfaŋɛ afum a doru fəp kəfis, ŋader sɔ ŋacərɛ kance darəŋ.

5Bawo Kanu kin gboŋ kɔ,

Nkɔn gbɔŋ eyi afum dacɔ kɔ Kanu,

Krist Yesu ɔfɔ,

6nwɛ ɛnasɔŋnɛ nkɔnsərka teta kəwurus ka afum fəp mɔ.

Ti disrɛ, tɛm ntɛ Kanu kənayɛk-yɛk mɔ, Yesu dədefi dɔn ɛnamentər a Kanu kəfaŋ kəyac afum a doru fəp.

7It'ɛnasɔŋɛ ntɛ Kanu kənacəmbər im kəyɔnɛ wədəŋk kɔ Wəsom wəka Yesu, k'ɛsarsər im kətəksɛ atɔyɔnɛ aSuyif kəgbɛkər kəlaŋ kɔ kance ka Kanu. Ifɔyemɛ, kance k'iŋloku.

8Ifaŋ arkun ŋactola Kanu mofo fəp, ŋacpɛnɛ waca waŋan wosoku darenc, itɔ pəmar a ŋayɔnɛ ti bəkəc ŋosoku pɛs, bafɔ mɛtɛlɛ, kɔ pəyɔnɛ fɛ ti-ɛ, kəgbɛkəlɛnɛ disrɛ de.

9It'ifaŋ aran sɔ ŋacyɔ, ŋacsəkəp belbel. Ŋacbɛrnɛ yamos nyɛ pəmar palelsɛ ŋa mɔ, ta ŋadunɛ pagbɛtər cəfon cəŋan ca. Pəmar fɛ ŋa kəcyesnɛ ca ya kɛma, ya mɔtɔt, kɔ yamos yeyeŋki kəway. 10Mba pəmar aran ŋamentərɛ dɔtɔt daŋan mɔyɔ mɔtɔt. Tatɔkɔ tentesɛ aran aŋɛ ŋaŋloku kəleləs ka Kanu mɔ.

11Tɛm tɛtəkəs, pəmar aran ŋacaŋk, ŋaccəŋkəl kəleləs fəp disrɛ. 12Ifɔwosɛ a wəran pətəksɛ, ta pətasərnɛ sɔ wərkun, mba aran ŋayinɛ kəcaŋk disrɛ. 13Awa Adama, Kanu kənanuŋkɛnɛ kəsɛl, a kɔ kəndelompəs Hawa. 14Bafɔ Adama anatiŋkər de, mba wəran abok ŋɛnatiŋkər k'ɔyɔnɛ wətɔleləs tosom ta Kanu. 15Mba dokombəra dendesɔŋɛ wəran pəfis, kɔ tɔyɔnɛ pətɔmpər kəlaŋ kɔ kəbɔtər, pəyinɛ pəsoku nnɔ Kanu kəyi mɔ, pəmɔ tɔkɔ tentesɛ mɔ.