1 Timote 1

Kəyif

1Ina, Pol, iyɔnɛ wəsom wəka Yesu Krist, bawo Kanu Wəyac kosu kɔ Krist Yesu nwɛ səŋgbɛkər mera yosu mɔ ŋanasom im kəyɔ ti. 2Timote, məna incicɛ, məna nwɛ məyɔnɛ wan kem yati dəkəlaŋ mɔ. Kanu Kas kosu kɔ Krist Yesu Mariki mosu ŋamar əm kifəli, ŋamentər əm nɔnɔfɔr, ŋasɔŋ əm sɔ pəforu!

Nəkɛmbərnɛ mɛtəksɛ mɔtɔyɔ dəkəcəmɛ

3Pəmɔ ntɛ inafaŋər əm ti ntɛ inckɔ atɔf ŋa Masedon mɔ, məyi dare da Efesi. Bawo dəndo, alaŋ alɔma ŋayi kətəksɛ mɛtəksɛ mɔtɔlomp. Məmɔnɛ ŋa kəyɔ ti. 4Məloku ŋa a ŋalukus mes mokur mmɛ ampər mɔ darəŋ kɔ kəcəmɛ ka kəbənda kəbolu ka dokom d'atem darəŋ. Mosumpər pəmɔ mamɔkɔ mɔŋsɔŋɛ kəgbɛkəlɛnɛ gbəcərəm, mɔfɔmar su nnɔ mɛfaŋ ma Kanu meyi mɔ, ntɛ ancərɛ nnɔ kəlaŋ keyi mɔ. 5Isɔŋ əm tosom tantɛ ntɛ tɔŋsɔŋɛ kəbɔtərɛnɛ kəbɛk nkɛ kəŋyɛfɛ abəkəc ŋosoku pɛs disrɛ, amera ŋɔtɔt, kɔ nnɔ kəlaŋ yati kəyi mɔ. 6Alɔma ŋanagbaymɛ dɔpɔ dɔtɔt dadɔkɔ, kɔ ŋasɔlɛ dəmɛgbɛkəlɛnɛ mɔtɔyɔ dəkəcəmɛ. 7Ŋambaŋɛnɛ kəyɔnɛ atəksɛ a Sariyɛ, mba ŋafɔcərɛ tɔkɔ ŋaŋloku mɔ, ŋafɔcərɛ sɔ tedisrɛ ta mes mɔkɔ ŋaŋloku kədɛrəm disrɛ mɔ.

8Səncərɛ a Sariyɛ sa Musa səntesɛ belbel, mba kɔ tɔyɔnɛ packɔtɛnɛ si pəmɔ tɔkɔ pəmar mɔ. 9Pacərɛ ntɛ: Anacəmbər fɛ Sariyɛ teta alompu de! Mba anacəmbər si teta aŋɛ ŋaŋfati kəleləs Sariyɛ, ayeŋki səbomp, ater a Kanu kɔ aciya. Awa Sariyɛ sənder teta atɔleləs Kanu kɔ atɔleləs ca nyɛ ampusɛ nkɔn Kanu mɔ, aŋɛ ŋandif akas kɔ akɛrɛ aŋa mɔ, adif afum, 10asɔŋnɛ teta kəsumpər dalakɔ, afəntərɛ taŋan t'arkun, acaməs afum, ayemɛ, adɛrəm yem disrɛ kɔ aŋɛ ŋaŋgbɛkəl mɛtəksɛ molompu mɔ. 11Tɛtəksɛ tantɛ teyi Kibaru Kətɔt disrɛ nkɛ kəŋsɔŋɛ kəcərɛ Kanu nkɛ kəlarɛ nɔrɔ mɔ. Kanu nkɛ kəfaŋ pətɔt posu mɔ, ɛnasɔŋ im Kibaru Kətɔt nkɛ kəmentər nɔrɔ da debeki da Kanu nkɛ pəmar afum a doru fəp ŋaŋkor-koru mɔ.

Pol eyif Yesu barka

12Iyif Yesu Krist Mariki mosu barka, nwɛ ɛnasɔŋ im sɔkət teta yɛbəc yɔn, k'ɛlaŋ im k'ɛncəmbər im yi mɔ. 13Ɛy, ali ntɛ inalɔməs Krist tɔcɔkɔcɔkɔ, k'intɔrəs kɔ, k'iyeŋkər kɔ domp mɔ, mba Kanu kənayɔn'em nɔnɔfɔr, bawo incyɔ mes ta incərɛ ntɛ iŋyɔ mɔ. Ti disrɛ, kəlaŋ kənabut im. 14Mba kəmar kifəli ka MARIKI mosu nnɔ iyi mɔ kənanaŋkanɛ kəbɛk. Inasɔtər Krist Yesu kəlaŋ kɔ kəbɔtər nkɛ kəŋyɛfɛ kəloŋkanɛ kem kɔ nkɔn mɔ. 15Nəcəŋkəl, toloku ta kance tɔ tantɛ, toloku ntɛ pəmar fəp fəbaŋ mɔ: Krist Yesu ɛnader doru dandɛ kədeyac aciya. Icloku nu a ina Pol, inacepərər kəciya itas alɔma. 16Mba ntɛ tɛnasɔŋɛ Kanu kəyɔn'em nɔnɔfɔr, kənafaŋ a Yesu Krist pəmentər kəkar kɔn fəp nnɔ iyi mɔ, ina Pol inacepərər kəciya itas alɔma. Ɛnayɔ ti ntɛ tɔŋsɔŋɛ iyɔnɛ totubucɛnɛ ta aŋɛ ŋandegbɛkər kɔ kəlaŋ kəŋan mɔ, ŋasɔtɔ kiyi wəyeŋ ka doru o doru. 17Kanu Wəbɛ wəka doru o doru, nwɛ ɔntɔfi, nwɛ antɔnəŋk mɔ, Kanu kin gboŋ kɔ! Kəkorkoru kɔ pəlel peyi kɔ doru o doru! Amina!

18Timote, wan kem dəkəlaŋ, məcəŋkəl tosom ntɛ iyi kəsom əm mɔ, tosol kɔ toloku ntɛ sayibɛ ŋanaloku tetam tɔcɔkɔcɔkɔ mɔ. Moloku mamɔkɔ mɛcəps'əm abəkəc, ntɛ tɔŋsɔŋɛ məkɔtɛnɛ kəyɛfərɛnɛ kətɔt mɔ, 19kəgbɛkər kəlaŋ kɔ amera ŋɔtɔt disrɛ. Alɔma ŋanafati kəcəŋkəl mera yaŋan, ti tɔsɔŋɛ kɔ kəgbɛkər kəlaŋ kəŋan kəloŋɛ. 20Himene kɔ Alɛksandər ŋanayi afum akakɔ dacɔ. Imbɛr ŋa Sentani dəwaca ntɛ tɔŋsɔŋɛ ŋatəkəs kətɔgbɔkərɛ sɔ kəlɔməs Kanu mɔ.