2 ATɛsaloni 3

Pol ewer a patolanɛ ŋa Kanu

1Awa tɛlpəs oŋ, awɛnc im aŋa alaŋ, nətolanɛ su Kanu, ntɛ tɔŋsɔŋɛ Toloku ta Mariki tɛsamsər katəna paleləs sɔ ti mofo fəp, pəmɔ tɔkɔ aŋyɔ ti ndoronu mɔ. 2Nətola sɔ Kanu kəbaŋ su nnɔ afum alɛc kɔ ayeŋki bəkəc ŋayi mɔ, bawo bafɔ afum a doru fəp ŋagbɛkər kəlaŋ kəŋan Kanu.

3Mba Mariki eyeŋkɛ danapa, endesɔcəpəs nu bəkəc, pəbum nu Wəlɛc. 4Kəloŋkanɛ kosu disrɛ kɔ Mariki, səlaŋ tes tin nnɔ nəyi mɔ: A nəyi kəyɔ kɔ nəndesɔyɔ tɔkɔ səŋgbiŋər nu kəyɔ mɔ.

5Mariki pəsolɛ bəkəc yonu nnɔ kəbɔtər ka Kanu kɔ kəbər pəcuca disrɛ nkɛ Krist kəmar nu mɔ.

Tɔkɔ pəmar a pabəc mɔ

6Awɛnc im aŋa alaŋ, tewe ta Mariki mosu Yesu Krist səŋgbiŋər nu ntɛ: Ta nəsol kɔ alaŋ a Yesu Krist aŋɛ ŋafati kəbəc mɔ, ta ŋancəmɛ mɛtəksɛ darəŋ mmɛ ŋasɔtər su mɔ. 7Nəna nəncərɛ belbel ntɛ pəmar payɔ a patubucnɛ mɔyɔ mosu mɔ. Sənayinɛ fɛ dɛfan ndoronu səcfati yɛbəc. 8Bawo sənadi fɛ peri pa nwɛ o nwɛ mpɛ sənatɔsɔŋ kəway mɔ, dis dɔnclɔl su dɔsɔk kɔ pibi, mba səncbəc ta nwɛ o nwɛ ɛncəmɛ su dəntɔf-ɛ. 9Ɛy, ali ntɛ pənamar kəsɔtər nu kəmar mɔ, sənafaŋ kəsakɛ nu ntɛ pəmar nəctubucnɛ mɔ. 10Awa ntɛ sənayi ndoronu mɔ, sənaloku nu ntɛ: Nwɛ ɛŋfati kəbəc mɔ, ta wəkayi pədi yeri!

11Mba səne pacloku ntɛ: Alɔma ŋafanɛ nu dacɔ, ali yɛbəc ŋayi fɛ, mɛnɛ ŋacbɛrɛ mes ma akɔ. 12Səŋgbiŋər afum akakɔ kəcəmɛ tosom ntɛ darəŋ tewe ta Mariki Yesu Krist disrɛ: Nəbəc pəforu disrɛ ntɛ tɔŋsɔŋɛ nəsɔtɔ nənasərka yeri yonu mɔ.

13Nəna awɛnc im aŋa alaŋ, ta nəsak kəyɔ pətɔt. 14Kɔ fum wəlɔma ɔntɔleləs moloku mamɛ səloku nnɔ areka ŋaŋɛ disrɛ mɔ, nəlɔmər tetɔn afum fəp. Ta nəpaŋnɛ kəsumpər tɔlɔm o tɔlɔm kɔ wəkayi, ntɛ tɔŋsɔŋɛ pəlapərnɛ mɔ. 15Mba ta nəsumpər kɔ pəmɔ wəterɛnɛ konu, nəlok-lokər kɔ pəmɔ wɛnc konu.

Kətolanɛ pətɔt kɔ kəyif kəlpəs

16Mariki nwɛ ɔŋsɔŋ pəforu nkɔnsərka mɔ, pəsɔŋ nu pəforu tɛm fəp kɔ mɔyɔ fəp! Mariki pəyi kɔ fəp fonu!

17Kəyif kəlpəs nkɛ, ka kəca kem kɔ, ina Pol. Tantɛ t'iŋyɔ dəreka yem fəp, yecicəs ya kəca kem yɔ.

18Kəmar kifəli ka Mariki mosu Yesu Krist kəyi fəp fonu!