2 ATɛsaloni

Areka ŋa mɛrəŋ nŋɛ Pol encicəs mɔ

Aka kəloŋkanɛ ka alaŋ a dare da Tɛsaloni mɔ

Kəsɔkəs ka moloku ma areka nŋɛ, kəbɛrɛnɛ

Wəsom wəka Yesu, Pol yati ɛnacicɛ aka Tɛsaloni areka ŋa mɛrəŋ ŋaŋɛ. (1-1) Pol kəcicɛ ka aka Tɛsaloni areka ŋɔcɔkɔ-cɔkɔ kənabɔlɛnɛ fɛ kətɛnc k'ɔŋgbɔkərɛ sɔ kəcicsɛ ŋa areka ŋa mɛrəŋ ŋaŋɛ, tɛnatəŋnɛ kəkom ka Yesu kəcepər meren wəco kəcamət kɔ pin.

Dare da Kɔrɛnt dɔ Pol ɛnayi a k'encicɛ aka kəloŋkanɛ ka alaŋ a Tɛsaloni areka ŋaŋɛ, kəloŋkanɛ kənayi nkɛ nkɔn Pol yati ɛnalompəs kəkɔ kɔn marənt ma kəkawandi tamɛrəŋ mɔ (Asom 17. 1-10). Aloku dəbuk ba Yɛbəc ya Asom disrɛ a kəloŋkanɛ kənayi nkɛ aSuyif apic kɔ aKrɛk alarəm ŋanayi mɔ.

Pəwurɛnɛ pəmɔ aka kəloŋkanɛ ka alaŋ a Tɛsaloni, a tɛlpəs tɔ ŋanader ŋasumpər moloku ma Pol mamɛ, kɔ kəder ka mɛrəŋ ka Krist, bawo Pol ɛnacicɛ aka kəloŋkanɛ ka alaŋ a Tɛsaloni pəlarəm teta mes mamɛ reka mɛrəŋ yayɛ. Dacɔ da areka ŋa mɛrəŋ nŋɛ Pol ɔŋgbɔkərɛ kəcicɛ aka kəloŋkanɛ ka alaŋ a Tɛsaloni mɔ fəp, teta tɛm tɛlpəs t'oloku ŋi disrɛ. Pol embeŋnɛ ŋa sɔ teta dɛfan daŋan. Pəmar fum o fum pəbəc teta yeri yɔn.

Mopoc ma areka ŋaŋɛ

1. 1. Pol oncop areka ŋaŋɛ, pəcmentərnɛ nkɔnsərka kɔ asol ɔn (1.1-2).

2. Ntɛ elip kəmentərnɛ mɔ, k'eyif Kanu barka teta kəloŋkanɛ ka alaŋ a Teseloni, k'ontolanɛ ki (1.3-12).

3. Sapitər sa 2, teta tɛm ta dəkələpsər da doru tɔ Pol ɔsɔkəs.

4. Teta dɛfan tɔ Pol ɛnalɛ ŋa, k'eŋgbiŋər ŋa yɛbəc (3.1-15).

5. Dəkələpsər da moloku mɔn, kɔ Pol eyif sɔ kəloŋkanɛ ka alaŋ (3.16-18).