2 ATɛsaloni 1

Kəyif

1Kəmar ka Silwɛŋ kɔ Timote disrɛ, ina Pol incicɛ aka kəloŋkanɛ ka alaŋ nde dare da Tɛsaloni, aŋɛ aloŋka kɔ Papa Kanu kosu kɔ Mariki Yesu Krist mɔ.

2Kəmar kifəli kɔ pəforu pa Papa Kanu kɔ Mariki Yesu Krist peyi nu kəroŋ.

Dɔsɔk ndɛ Krist endeder mɔ

3Awɛnc im aŋa alaŋ, pəmar səcyifɛ nu Kanu barka tɛm fəp. Tatɔkɔ tɛmar, bawo kəlaŋ konu kəyi kəbɛk pəpɔŋ, kɔ kəbɔtər nkɛ nəyɔ nnɔ aŋɛ kɔ akɔ ŋayi mɔ, kəmbɛk kəbɛk dəm. 4Itɔ səŋlokɛnɛ aka kəloŋkanɛ ka alaŋ a Kanu akɔ, kəyekti domp nkɛ nəyi kəsɔŋɛ su mɔ, bawo nəmɛŋkərnɛ kəbər kɔ kəgbɛkər kəlaŋ konu ali ntɛ kətɔrəs kɔ pucuy peyi nu mɔ.

5Tatɔkɔ tementər kiti kəlompu ka Kanu, bawo ntɛ nəyi kəcepərɛnɛ mɔ, tementər a Kanu kəwosɛ nu kəbɛrɛ dɛbɛ dɔn dəntɔf teta tes tɔkɔ nəyinɛ kətɔrəs disrɛ mɔ. 6Awa, Kanu kəndeyɔ tɔkɔ tolomp mɔ, kəndeluksɛ kətɔrəs akɔ ŋantɔrəs nu mɔ. 7Nəna aŋɛ nəyi kətɔrəs disrɛ mɔ, Kanu kəndesɔŋ nu kəŋesəm kɔ səna, kɔ Mariki Yesu endewur dəkɔm-ɛ. Endeder kɔ mɛlɛkɛ ɔn aka fənɔntər 8dənɛnc dɔpɔŋ dacɔ. Pətɔrəs akɔ ŋantɔcərɛ Kanu ta ŋaleləs Kibaru Kətɔt ka Mariki mosu Yesu mɔ. 9Andetɔrəs afum akakɔ tɔtɔrəs ntɛ: Andeləsər ŋa doru o doru, ŋabɔlɛnɛ Mariki kɔ sɔkət sa nɔrɔ da debeki dɔn. 10Tatɔkɔ tendeyi dɔsɔk ndɛ Mariki endeder mɔ. Awa, akɔn aŋɛ ampusɛ kɔ mɔ ŋandeleləs kɔ. Cusu cəndewos aŋɛ ŋaŋgbɛkər kɔ kəlaŋ mɔ fəp. Akakɔ ŋɔ nəndeyi dacɔ, bawo nəlaŋ teta sede səkɔ səsɔŋ nu mɔ.

11Ntɛ tɔ səntola Kanu tetonu tɛm fəp: Kəwosɛ nu kəyi kəwe nkɛ nəsɔtər kɔ mɔ disrɛ. Fənɔntər fɔn disrɛ, pəsɔŋɛ nu kətam kəyɔ mɛfaŋ mɔtɔt fəp mmɛ nəfaŋ mɔ, pəlas yɛbəc nyɛ kəlaŋ konu kəcəmbər nu kəyɔ mɔ! 12Ti disrɛ, tetonu tendesɔŋɛ paleləs tewe ta Mariki mosu Yesu, teta nkɔn paleləs nəna sɔ. Mes mamɔkɔ fəp kəmar kifəli ka Kanu kosu kɔ Mariki Yesu Krist kɔ.