2 ATɛsaloni 2

Ntɛ tendeyi a MARIKI pəcder mɔ

1Awɛnc im aŋa alaŋ, Mariki mosu Yesu Krist endeder, andeloŋka su kɔ kəsək. Ti disrɛ, ntɛ tɔ səntola nu: 2Kɔ fum oloku nu a dɔsɔk da Mariki dɛmbəp-ɛ, ta pəyi nu yamayama katəna, ta nənesɛ! Antam kəyembərɛ nu kibaru kaŋkɔ pəmɔ toloku ntɛ tɛyɛfɛ ndena Kanu mɔ, kɔ pəyɔnɛ fɛ ti pəmɔ toloku gbəcərəm, kɔ pəyɔnɛ fɛ ti tɛtəksɛ ntɛ tɛyɛfɛ nnɔ səyi mɔ. 3Ta nəsaknɛ nwɛ o nwɛ pətiŋkərɛ nu yem. Bawo dɔsɔk dadɔkɔ dɔfɔder ta afum ŋantayeŋkər Kanu domp-ɛ. Wəlɛc nwɛ pəmar paləsər mɔ pəmentərnɛ krɛsna, 4wəterɛnɛ ɔfɔ, nwɛ endegbɛkəl yɔkɔ yencemp kɔ yɔkɔ afum ŋaŋkor-koru mɔ fəp. Endekɔ haŋ pəndɛ kəlɔ kəpɔŋ ka Kanu, pəcdɛrəm kəbaŋɛnɛ nkɔnsərka kəyɔnɛ Kanu yati. 5Ntɛ inayi kɔ nəna mɔ, inaloku nu ti. Nəmpələrnɛ ba? 6Ndɛkəl oŋ, nəncərɛ tɔkɔ tosumpər kɔ mɔ. Ti disrɛ, tɛm ntɛ tɛmar mɔ gbəcərəm tendementərnɛ. 7Fənɔntər fəgbɔpnɛ fa wəlɛc fəyi oŋ kəbəc. Mba kɔ wəsumpər ka fi ɔntɔdeyi-ɛ, fəfɔdesɔbəc fəgbɔpnɛ. 8Awa, andecɛŋ wəlɛc, Mariki Yesu pədifɛ kɔ kifir ka kusu kɔn. Endeləsərɛ kɔ fənɔntər fa nɔrɔ da kəder kɔn. 9Kɔ fum wəlɛc wakawɛ endeder kɔ sɔkət sa Sentani-ɛ, endeyɔ mes ma fənɔntər fəp, endeyɔ mes mmɛ mendeciyanɛ afum, mocwosəs ŋa cusu, ntɛ tɔŋsɔŋɛ pətiŋkər ŋa mɔ. 10Mɔyɔ mɛlɛc fəp, m'endetiŋkərɛ afum akɔ ŋaŋsɔlɛ mɔ. Ŋandesɔlɛ, bawo ŋanabaŋ fɛ kəbɔtər ka kance nkɛ kənadetam kəyac ŋa mɔ. 11Ti tɔsɔŋɛ ntɛ Kanu kəŋkɛrɛ sɔkət səntiŋkərɛ ŋa, nsɛ səŋsɔŋɛ ŋa kəlaŋ yem mɔ. 12Awa, aŋɛ ŋanatɔlaŋ kance mɔ fəp, pəcbɔt ŋa kəcyɔ pəlɛc mɔ, andetɔrəs ŋa.

Kanu kəwe nu kəyeŋkəs kəlaŋ konu

13Awɛnc im aŋa alaŋ aŋɛ Mariki ɔmbɔtər pəpɔŋ mɔ, pəmar payif Kanu barka tetonu tɛm fəp, bawo Kanu kənayɛk-yɛk nu ntɛ tɔŋsɔŋɛ nəyɔnɛ acɔkɔ-cɔkɔ aŋɛ andeyacɛ kəmar ka Amera nŋɛ ŋompus nu kɔ kəmar ka kəgbɛkər kəlaŋ konu kance. 14Ti t'ewenɛ nu Kibaru Kətɔt nkɛ sənadəŋkər nu mɔ, ntɛ tɔŋsɔŋɛ nətəŋnɛ nɔrɔ da debeki da Mariki mosu Yesu Krist mɔ. 15Awa, awɛnc im aŋa alaŋ, nəcəmɛ gbiŋ, nəmɛŋkərnɛ belbel mɛtəksɛ mmɛ sənasɔŋ nu nnɔ moloku kɔ reka yeyi mɔ.

16Awa, kəmar kifəli disrɛ Mariki mosu Yesu Krist nkɔn kɔ Kanu Kas kosu ŋambɔtər su kɔ ŋasɔŋ su kəcəp bəkəc nkɛ kəŋwon doru o doru mɔ, kɔ kəgbɛkər mera kətɔt. Səntola ŋa, 17ŋacəpəs nu bəkəc, ŋasɔŋ nu sɔkət səyɔnɛ pətɔt dəmɔyɔ kɔ dəmoloku!