1 Timote 5

Tɔkɔ pəmar alaŋ ŋasumpərɛnɛ mɔ

1Ta məlok-lokərɛ wətem dim deyeŋki, mba məyeŋkəs kɔ abəkəc pəmɔ wisi. Məsumpər sɔ atɛmp pəmɔ awɛnc əm aŋa. 2Məsumpər atembəra pəmɔ awiri aŋa, kɔ ayecəra pəmɔ akirɛ am pəsoku disrɛ.

Acəbokəra kəyi kəŋan kəloŋkanɛ disrɛ

3Pəleli disrɛ, məsumpər acəbokəra belbel, aŋɛ ŋayi sona ta ŋayɔ amar mɔ. 4Kɔ wəcəbokəra ɔyɔ awut kɔ pəyɔnɛ fɛ ti awutsɔ-ɛ, ŋayɔ krɛsna ntɛ: Ŋa ŋɔ pəmar kəmentər kəlaŋ kəŋan aka kəlɔ kəŋan disrɛ ŋacəmɛ ŋa dəntɔf, kɔ ŋayɔ ti-ɛ, ŋaŋluksɛ tɛm tatɔkɔ pətɔt mpɛ ŋanasɔtər akas aŋa kɔ atem aŋan mɔ. Awa tatɔkɔ tɔmbɔt Kanu. 5Wəcəbokəra nwɛ eŋyi sona gboŋ ta ɔyɔ wəmar mɔ, pəcgbɛkər kəlaŋ kɔn Kanu, pəctola kɔ motola fəp daŋ kɔ pibi. 6Mba wəcəbokəra nwɛ eŋyinɛ pəbas pa nkɔnsərka gbəcərəm, efi ali ntɛ eyi doru pəcŋesəm mɔ. 7Awa tantɛ tɔ pəmar məccɛm-cɛməs acəbokəra, ŋacəmɛ mɛtəksɛ mɔtɔt darəŋ ntɛ tɔŋsɔŋɛ ta fum o fum oloku pəlɛc paŋan mɔ. 8Kɔ fum ɔntɔmar aka kəlɔ kɔn disrɛ, pənaŋkanɛ akombəra ɔn-ɛ, wəkayi ɛsak kəlaŋ kɔn, ɛlɛcɛ pətas wətɔlaŋ.

9Kəyi ka kəgba ka acəbokəra aŋɛ pəmar alaŋ ŋamar mɔ, mɛnɛ wəran wəkakɔ pəyɔ meren wəco camət-tin (60). Pənayɔnɛ wəran nwɛ ɛnalomp nnɔ wos eyi mɔ1. 10Pəmar pacərɛ wəran wəkakɔ kəyɔ mes mɔtɔt, k'ondusum awut ɔn, k'ɛncbaŋ sɔ aŋɛ ŋancder ndɔrɔn mɔ, ɛncyak sɔ wəcək wa afum a kəloŋkanɛ ka alaŋ, ɛncmar aŋɛ ŋancyi dəpəcuca mɔ, ɔncsɔŋnɛ kəyɔ mes mɔtɔt fəp. 11Mba məce ayecəra acəbokəra ta məcic mewe maŋan kəgba kaŋkɔ disrɛ, bawo kɔ mɛbas maŋan mɛntasərnɛ ŋa-ɛ, ŋambɔlɛnɛ Krist, ŋafaŋ sɔ a panɛncɛ ŋa. 12Kɔ ŋayɔ tatɔkɔ-ɛ, ŋanciya, bawo ŋasektərnɛ fɛ kədɛrəm kəcɔkɔcɔkɔ nkɛ ŋayɔ nnɔ kəloŋkanɛ kəyi mɔ. 13Ti disrɛ, kətɔyɔ kəŋan tɔyɔ, ŋaŋlɛk mɔyɔ kəckɔ dəwɔlɔ kɔ dəwɔlɔ. Mba ntɛ tɛnaŋkanɛ oŋ kəlɛcɛ mɔ, ŋaŋla moloku, ŋafɔ kəcmɛŋk ntɛ o ntɛ, ŋacloku mes mmɛ mɔntɔcəmɛ ŋa dɔpɔ mɔ.

14Ifaŋ krɛsna a panɛncɛ ayecəra acəbokəra, ŋasɔtɔ awut, ŋasumpər teta kəlɔ kəŋan disrɛ gbiŋ, ntɛ tɔŋsɔŋɛ ta aterɛnɛ asu ŋasɔtɔ ntɛ o ntɛ tɛlɛc ntɛ ŋantam kəlokɛ su mɔ. 15Bawo acəbokəra alɔma ŋanagbaymɛ dɔpɔ dɔtɔt, kɔ ŋance kəleləs Kanu kɔ ŋancəmɛ Sentani darəŋ. 16Awa igbɔkərɛ sɔ, kɔ wəran wəgbɛkər Kanu kəlaŋ ɔyɔ acəbokəra kəlɔ kɔn disrɛ-ɛ, pəmar ŋa. Ti disrɛ, kəloŋkanɛ ka alaŋ kəfɔcəmɛ ŋa dəntɔf, kəntam kəmar acəbokəra aŋɛ ŋayi sona gboŋ ta ŋayɔ wəmar mɔ.

Kiyi ka abeki kəloŋkanɛ ka alaŋ disrɛ

17Abeki aŋɛ ŋaŋkɔtɛnɛ kəloŋkanɛ ka alaŋ belbel mɔ, pamar pacsɔŋ ŋa kəway kətɔt patas alpəs akɔ, pənaŋkanɛ aŋɛ ŋaŋsɔŋnɛ yɛbəc yocuca ya kawandi kɔ ya kətəksɛ mɔ. 18Bawo Yecicəs Yosoku yoloku: «Kɔ wana wendebəc tɛm ta kəsɛpər-ɛ, ta məmɔnɛ wi kəsɔm səbomp sa mɛŋgbɛn.» K'ancic sɔ, «Pəmar wəbəc pəsɔtɔ kəway kɔn.» 19Ta nəbaŋ sede sin kəyemsɛnɛ ka wəbeki wəka kəloŋkanɛ ka alaŋ, mɛnɛ sede mɛrəŋ haŋ maas səntam kəsoc kəyemsɛnɛ kaŋkɔ. 20Aŋɛ ŋanciya mɔ, mənal ŋa afum fəp fɔr kiriŋ, ntɛ tɔŋsɔŋɛ alɔma sɔ ŋanesɛ mɔ.

21Awa ntɛ t'isom əm fɔr ya Kanu, ya Krist Yesu kɔ ya mɛlɛkɛ mɛyɛk-yɛk kiriŋ: Məmɛŋkərnɛ mosom mamɛ, ta məcəmɛnɛ fum o fum, ta məgbinti kiti ta məncəŋkəl belbel afum aŋɛ ŋayɛfərɛnɛ mɔ. 22Ta məbɛlkər kədeŋ waca wam domp da fum kəcəmbər kɔ kəyɔnɛ wəkiriŋ ka kəloŋkanɛ ka alaŋ. Ta mətəŋnɛ kiciya ka akɔ. Mənasərka, məmɛŋkərnɛ dosoku dam.

23Məsak kəmun domun gbəcərəm. Məcmun member mepic, teta kor kam, bawo məncu tɛm fəp. 24Afum ŋayi aŋɛ aŋnəŋk kiciya kəŋan gbasŋa ta antakiti ŋa mɔ, kɔ alɔma afɔtam kənəŋk kiciya kəŋan mɛnɛ patɛn ki dəmɔyɔ maŋan. 25Mes mɔtɔt sɔ aŋnəŋk mi gbasŋa, ali mmɛ antɔnəŋk gbəncana babɔkɔ mɔ mɔfɔtam kəyi kəgbɔpnɛ disrɛ.