1 Timote 6

Acar kɔ mariki maŋan

1Pəmar wəcar nwɛ o nwɛ ɔŋyɔnɛ wəlaŋ mɔ pəcɛm-cɛmnɛ ntɛ: Ŋaleləs mariki maŋan belbel, ntɛ tɔŋsɔŋɛ ta ŋafani tewe ta Kanu kɔ pəyɔnɛ fɛ ti mɛtəksɛ mosu mɔ. 2Acar aŋɛ ŋayɔ mariki alaŋ mɔ, dɛwɛnc aŋa dɔ ŋayɔnɛnɛ. Tɔfɔsɔŋɛ ta ŋaleləs mariki maŋan de. Mba pəmar ŋanaŋkanɛ kəbəcɛ mariki maŋan belbel, bawo akakɔ ŋaŋsɔtɔ pətɔt pa yɛbəc yaŋan mɔ, alaŋ ŋɔ aŋɛ Kanu kəmbɔtər belbel mɔ.

Mɛtəksɛ mmɛ mɔntɔsol kɔ kəlaŋ mɔ

Awa, ntɛ tɔ pəmar mətəksɛ kɔ pəyɔnɛ fɛ ti məcəpsɛ alaŋ bəkəc. 3Kɔ fum wəlɔma endetəksɛ mɛtəksɛ mocuru, wəkayi pəcgbaymɛ moloku ma kance ka Mariki mosu Yesu Krist kɔ mɛtəksɛ mmɛ mosol kɔ kəcəmɛ ka mɛfaŋ ma Kanu darəŋ mɔ-ɛ, 4fum ɔfɔ nwɛ kədot banca kəsɔŋɛ kətɔcərɛ kance mɔ. Wətɔtamnɛ ɔfɔ nwɛ ɛŋgbɛkəlɛnɛ, pəcyɛfərɛnɛ dəmoloku mɔ. Tatɔkɔ tɛŋkɛrɛ kəraca, kəgbɛkəlɛnɛ, kəlɔmsɛnɛ kɔ kəfɔtɔnɛ kəlɛc, 5kəgbɛkəlɛnɛ nkɛ kəntɔlip mɔ kɔ afum aŋɛ dosoku domp daŋan dɛntalər mɔ. Ali kance ŋafɔnəŋk sɔ, ŋaccɛm-cɛmnɛ a kəcəmɛ ka mɛfaŋ ma Kanu darəŋ a tɔyɔ tɔ, ntɛ tɔŋsɔŋɛ kəsɔtɔ daka doru dandɛ mɔ.

6Kance, kəcəmɛ mɛfaŋ ma Kanu darəŋ, kəsɔtɔ daka kəpɔŋ kɔ. Mba kɔ tɔyɔnɛ mənɛmbərɛ pɔkɔ məyɔ mɔ-ɛ. 7Ali paka anakɛrɛ fɛ nnɔ doru dandɛ, afɔdesɔkekərɛ ali paka. 8Awa kɔ tɔyɔnɛ pacsɔtɔ yeri kɔ yɛbɛrnɛ-ɛ, pəmar panɛmbərɛ yayɔkɔ. 9Mba aŋɛ ŋaŋfaŋ gbɛs kəyɔnɛ aka daka apɔŋ mɔ ŋambɛrɛ kəwakəs dəwaca. Ŋa ŋɔ towul pa mɛfaŋ mɔtɔyɔ dəkəcəmɛ kɔ mɛwɛywɛy poŋsumpər. Mes mamɔkɔ meŋkekərɛ afum dədefi, mɛləsər ŋa sɔ. 10Ɛy, kəncɔnc ka mes mɛlɛc fəp, kəbɔtər ka pəsam kɔ. Alarəm ŋawon pi kətɛn, kɔ tɔsɔŋɛ ŋa kəsɔlɛ, kəbɔlɛnɛ kɔ kəgbɛkər kəlaŋ. Ŋantɔrəsnɛ pəlarəm ŋasərka.

Tɔkɔ amɛŋkəs Timote mɔ

11Mba məna fum wəka Kanu, məyay mes mamɔkɔ. Mətɛn dolompu, məcəmɛ mɛfaŋ ma Kanu darəŋ, mətɛn sɔ kəsəktərnɛ k'afum, kəbɔtər, kəbər pəcuca disrɛ kɔ kəbɔt amera. 12Məsiməs belbel teta yɛbəc ya kəgbɛkər kəlaŋ. Məsumpur kiyi wəyeŋ ka doru o doru kaŋkɔ Kanu kəwen'am mɔ. Mənacərɛ ti dɔsɔk ndɛ mənamentər kəgbɛkər kam kəlaŋ gbasŋa atəŋnɛ a ti alarəm fɔr kiriŋ mɔ.

13Ndɛkəl, isɔŋ əm tosom Kanu fɔr kiriŋ, nkɛ kəŋsɔŋ ca fəp kiyi wəyeŋ mɔ. Iyɔ ti sɔ fɔr ya Krist Yesu kiriŋ nwɛ ɛnamentər sede sətɔt Pɔŋse Pilat fɔr kiriŋ mɔ. 14Məmɛŋkərnɛ tosom ntɛ məsɔtɔ mɔ, ta tebirbir, ta tɔyɔ dolokəp, haŋ dɔsɔk ndɛ Mariki mosu Yesu Krist endementərnɛ mɔ.

15Kanu kəndementər Krist tɛm tɔkɔ kənabonc mɔ.

Nda nkɔn Kanu nwɛ pətɔt pɛŋyɛfɛ mɔ,

wətam sona ka mes ma doru fəp,

Wəbɛ ka abɛ

kɔ Mariki ma mariki.

16Sona gboŋ s'ɔntɔdefi.

Nkɔn eyi dəpəwaŋkəra mpɛ səntɔtam kəlɔtərnɛ mɔ.

Ali fum ɛnəŋk fɛ kɔ, fum o fum ɔfɔsɔtam kənəŋk kɔ.

Nkɔn Kanu pəyɔ kəleləs kɔ fənɔntər fa doru o doru! Amina.

Kəmɛŋkəs aka daka

17Məsom ntɛ nnɔ ayɔ daka aka doru dandɛ ŋayi mɔ ta ŋadot banca. Ta ŋagbɛkər mera yaŋan nnɔ daka ndɛ dɔntɔwon deyi mɔ, mba ŋagbɛkər yi nnɔ Kanu kəyi mɔ. Nkɔn yati ɔŋsɔŋ ca fəp abəkəc ŋosoku disrɛ ntɛ tɔŋsɔŋɛ patam kəcəmbərɛ yi mɛfaŋ mosu mɔ. 18Məmɛŋkəs ŋa kəcyɔ mes mɔtɔt, ŋayɔnɛ aka daka dəmɔyɔ mɔtɔt, ŋacpocɛ bəkəc yosoku disrɛ, ŋacyerɛnɛ sɔ kɔ akɔ. 19Ti disrɛ ŋandemɛŋkərnɛ daka dɔtɔt nde dəkɔm ndɛ dɛncəp mɔ teta tɔkɔ teyi kəder mɔ, tɔsɔŋɛ ŋa sɔ kəsɔtɔ kəyi wəyeŋ yati mɔ.

Mosom mɛlpəs kɔ kəyif

20Timote, məmɛŋkərnɛ belbel tɔkɔ Kanu kəsɔŋ əm mɔ. Məyay moloku mɔtɔyɔ dəkəcəmɛ mmɛ mɔntɔsol kɔ kəgbɛkər Kanu kəlaŋ mɔ, kɔ mɛgbɛkəlɛnɛ ma yem mmɛ ŋaŋfɔtɔnɛ kəcərɛ kəloku mɔ. 21Alɔma ŋanacɛm-cɛmnɛ kətɔmpər kəcərɛ kaŋkɔ, kɔ tɔsɔŋɛ ŋa kəgbaymɛ kəlaŋ kətɔt.

Kəmar kifəli ka Kanu kəyi nu kəroŋ.