2 Timote 1

Kəyif

1Ina, Pol iyɔnɛ wəsom ka Yesu Krist, bawo Kanu kəfaŋ ti. Kanu kəsarsər im kəcam kiyi wəyeŋ nkɛ Kanu kənalɛkɛ su temer dədesɔŋ su teta kəloŋkanɛ kosu kɔ Krist Yesu.

2Timote, wan kem dəkəlaŋ məyɔnɛ nwɛ imbɔtər mɔ, mən'incicɛ. Kanu Kas kosu kɔ Yesu Krist Mariki mosu ŋasɔŋ əm kəmar kifəli, nɔnɔfɔr kɔ pəforu.

Pol eyif Kanu barka

3Iyif Kanu barka, nwɛ imbəcɛ amera ŋosoku pɛs pəmɔ tɔkɔ atem em ŋanayɔ ti mɔ. Kətola kem disrɛ daŋ kɔ pibi, ifɔcəmbərəs kəcɛm-cɛmn'am. 4Incɛm-cɛmnɛ mɛncər mam, ifaŋ pəlarəm kənəŋk əm, ntɛ tɔŋsɔŋɛ ilarɛ pəbotu mɔ. 5Incɛm-cɛmnɛ kəlaŋ kəsoku nkɛ kəyi məna Timote mɔ, kənayi wətembəra kam Lowis kɔ wiri Enis, ilaŋ a kəlaŋ kaŋkɔ kəyi sɔ məna.

6Ti tɔsɔŋɛ ntɛ incɛm-cɛməs əm: Məmɛŋkərnɛ belbel kəpocɛ kaŋkɔ kiyi wəyeŋ nkɛ Kanu kəsɔŋ əm mɔ ntɛ inadeŋər əm waca dəromp mɔ. 7Bawo bafɔ amera ŋa kənesərnɛ ŋɔ Kanu kənasɔŋ su, mba amera nŋɛ ŋɛŋlas su sɔkət, kəbɔtər kɔ kəsumpərnɛ mɔ.

8Ta məlapərnɛ kəloku sede teta Mariki mosu, ta məlapərnɛ sɔ ina nwɛ ambɛr dəbili tetɔn mɔ. Mba məbər kəyi dəpəcuca kɔ ina teta Kibaru Kətɔt, səlaŋ sɔkət nsɛ Kanu kəŋsɔŋ mɔ. 9Nkɔn ɛnayac su k'ewe su kəyɔnɛ afum ɔn acempi. K'ɛnayɔ ti-ɛ, bafɔ teta tɔkɔ sənayɔ belbel mɔ de, mba tɔkɔtɛnɛ tɔn mes kɔ kəmar kifəli kɔn, ɛnasɔŋ su ki teta Yesu Krist kəyɛfɛ ta doru dɛntacop-ɛ. 10Ndɛkəl oŋ, kəmar kifəli kaŋkɔ anəŋk ki gbasŋa ntɛ wəyac kosu Yesu Krist ender mɔ. Nkɔn ɛnaləsər fənɔntər fa defi, kɔ Kibaru Kətɔt kəmentər su pəwaŋkəra pa kiyi wəyeŋ kɔ pa kətɔfi.

11Teta Kibaru Kətɔt kaŋkɔ tɔ Kanu kənacəmbər im kəyɔnɛ wəsom, wədəŋk kɔ wətəksɛ. 12Itɔsɔŋɛ ntɛ kətɔrəs kəndɛkəl kəy'im mɔ. Mba ifɔlapərnɛnɛ ki, bawo incərɛ nwɛ iŋgbɛkər kəlaŋ kem mɔ, ilaŋ yati a ɔyɔ fənɔntər fəmɛŋkɛ tɔkɔ ɔsɔŋ im mɔ haŋ dɔsɔk da kiti. 13Mətubucnɛ moloku ma kance mmɛ ilok'əm mɔ, mətɔmpər kəlaŋ kɔ kəbɔtər nkɛ ayɔ kəloŋkanɛ kosu disrɛ kɔ Yesu Krist mɔ. 14Məmɛŋkərnɛ mɛtəksɛ mɔtɔt mmɛ anasɔŋ əm, kəmar ka Amera Ŋecempi nŋɛ ŋeyi su mɔ.

15Pəmɔ tatɔkɔ məncərɛ ti mɔ, afum akɔ ŋayi sədare sa Asi mɔ fəp ŋanac'em, pəmɔ Fisɛl kɔ Hɛrmosɛn. 16Ntɛ tɔyɔnɛ ta Onesifɔr mɔ, Mariki pəyɔnɛ aka kəlɔ kɔn disrɛ nɔnɔfɔr, bawo ɛncmar im pəlarəm, ɛnalapərnɛnɛ fɛ kiyi kem dəbili. 17Bawo ntɛ ɛnadebɛrɛ Rom mɔ, k'ɛyɛfɛ kətɛn im mofo fəp haŋ k'ɛnəŋk im. 18Mariki pəsɔŋɛ kɔ kəsɔtɔ nɔnɔfɔr dɔn dɔsɔk da kiti. Məncərɛ ti mətas afum fəp kəmar nkɛ ɛnamar im dare da Efesi mɔ.