2 Timote 2

Məyi pəmɔ wəsɔdar wətɔt wəka Yesu Krist

1Məna, wan kem məyinɛ sɔkət nnɔ kəmar kifəli nkɛ kəyi dəYesu Krist mɔ. 2Moloku mɔkɔ mənanen'em ictəksɛ tekiriŋ ta for ya sede alarəm mɔ, məsɔŋ mi afum aŋɛ məlaŋ, aŋɛ ŋandetam kətəksɛ mi alɔma mɔ.

3Məwosɛ kəbər pəcuca kɔ ina pəmɔ wəsɔdar wətɔt wəka Yesu Krist. 4Wəsɔdar nwɛ eŋyi yɛbəc y'asɔdar pəfaŋ a wəbɛ kɔn pəbɔtər kɔ mɔ, ɔfɔwosɛ kəbɛrɛ mosumpər ma atɔyɔnɛ asɔdar. 5Afɔlokɛ wəyɛksɛ kəyɔnɛ wəcɔkɔ-cɔkɔ ta pəyɔnɛ a ɛncəmɛ sariyɛ sa kəyɛksɛ darəŋ-ɛ. 6Wəbifti nwɛ ɛmbəc pəlarəm pəcucanɛ disrɛ mɔ, pəmar kɔ kənuŋkɛnɛ kəsɔtɔ yokom ya yɔbɔf yɔn. 7Məcɛm-cɛmnɛ belbel mamɛ iyi kəlok'əm mɔ, Mariki endesɔŋ'am kəcərɛ fəp fa mi belbel.

8Məcɛm-cɛmnɛ Yesu Krist nwɛ ɛnafɔtɛ afi dacɔ, nwɛ ɛyɛfɛ kəbənda ka dokombəra da Dawuda pəmɔ ntɛ iŋloku ti Kibaru Kətɔt disrɛ mɔ. 9Ti tɔsɔŋɛ ntɛ iyi kətɔrs'im haŋ pacbɛr im gbekce pəmɔ kalbante mɔ. Mba ambɛr fɛ Toloku ta Kanu gbekce. 10Ti tɔsɔŋɛ ntɛ imbəknɛ pəcucanɛ fəp mɔ, teta aŋɛ Kanu kəyɛk-yɛk mɔ, ntɛ tɔŋsɔŋɛ ŋa sɔ ŋasɔtɔ kəyac nkɛ kəyɛfɛ dəkəloŋkanɛ kosu Yesu Krist kɔ nɔrɔ da debeki dɔn doru o doru mɔ. 11Bawo moloku ma kance mɔ mmɛ:

Kɔ səfi kɔ Krist-ɛ,

nkɔn səndesɔyi wəyeŋ.

12Kɔ səwon kəsektərnɛ kɔ-ɛ,

səndesɔpaŋnɛ kətɔmpər dɛbɛ kɔ nkɔn.

Mba kɔ sənce kɔ-ɛ,

nkɔn sɔ endece su.

13Kɔ tɔyɔnɛ ta səsektərnɛ kɔ-ɛ,

nkɔn eŋsektərnɛ su,

bawo ɔfɔtam kəcenɛ nkɔnsərka.1

Wəbəc nwɛ pəmar payek-yekəs mɔ

14Mamɔkɔ mɔ pəmar məccɛm-cɛməs aka kəloŋkanɛ ka alaŋ tɛm fəp. Məcgbiŋər ŋa fɔr ya Kanu kiriŋ a ŋasak kəcgbɛkəlɛnɛ dəmoloku, mɔfɔcɔŋ fum kiriŋ mɛnɛ mɔsɔŋɛ akɔ ŋancəŋkəl mi mɔ kəloŋɛ. 15Məsɛp kəmentərnɛ Kanu a wərkun məyɔnɛ nwɛ ɛmbəc yɛbəc yɔn, nwɛ pəntɔmar kəlapərnɛnɛ yi mɔ, bawo məntəksɛ toloku ta kance pəmɔ tɔkɔ pəmar mɔ. 16Məyaynɛ moloku mɔtɔyɔ dəkəcəmɛ mmɛ menciyanɛ kəlaŋ mɔ, bawo aŋɛ ŋancəmɛ mi darəŋ mɔ, ŋambɔlɛnɛ kəbɔlɛnɛ dəm Kanu. 17Moloku ma afum akakɔ mowurɛnɛ kɔ arunc nŋɛ ŋɔntɔtamnɛ sɔ ŋɛləpsər kədi dis fəp mɔ. Itɔ pəyi teta Himene kɔ Filɛt. 18Afum ŋɔ aŋɛ ŋaŋgbaymɛ kance ŋacloku a kəfɔtɛ afi dacɔ kəlip kəcepər. Itɔ ŋasɔŋɛ afum alarəm kəloŋɛ. 19Mba togbu peyeŋki mpɛ Kanu kəndɔf mɔ, pɛncəp gbiŋ. Moloku mmɛ m'ancic teta pi: «Mariki ɛncərɛ akɔ ŋayɔnɛ akɔn mɔ2», kɔ «Nwɛ o nwɛ oŋloku a Kanu kəyɔ kɔ mɔ, pəmar pəbɔlɛnɛ pəlɛc.»

20Kəlɔ kəpɔŋ disrɛ, bafɔ yosumpər-sumpər ya kɛma kɔ gbeti gbəcərəm yeŋyi di, mba ya tɔk kɔ yɛsɛl yeŋyi sɔ di. Ya kɛma kɔ gbeti yɔkɔ y'ambəcɛnɛ ca yɔkɔ yɔyɔ dəkəcəmɛ mɔ, kɔ ya tɔk kɔ yɛsɛl y'ambəcɛnɛ ca yɔtɔyɔ dəkəcəmɛ. 21Awa kɔ fum ende kəcsɔkəsnɛ pəlɛc pampɛ ilɔm mɔ, eŋyi pəmɔ posumpər-sumpər pɔtɔt mpɛ ambəcɛ dɔsɔk da kəsata mɔ. Mariki ma pi aŋmɛŋkɛ pi. Pendeyɔ dəkəcəmɛ nnɔ wəsərka eyi mɔ, andetam pi kəbəcɛ yɛbəc yɔtɔt fəp.

22Awa, məyɛksər mɛfaŋ mɛlɛc ma dɛtɛmp. Mətɛn kəbɛrɛnɛ pəlompu, kəlaŋ, kəbɔtər, pəforu kɔ aŋɛ ŋaŋkornɛ Mariki abəkəc ŋosoku pɛs mɔ. 23Məyaynɛ kəgbɛkəlɛnɛ kətɔyɔ dəkəcəmɛ kɔ dotoŋkulu. Məncərɛ belbel a mes mamɔkɔ mɔŋsɔŋɛ kəcɔp. 24Pəmar fɛ wəmarəs wəka Mariki pəcgbɛkəlɛnɛ. Pəmar pəbɔt amera nnɔ fəp fəyi mɔ, pətam kətəksɛ, pətam sɔ kəbər pəcucanɛ. 25Pəmar pətəksɛ pəforu disrɛ aŋɛ ŋaŋgbɛkəl mɔ. An'ɔcərɛ a Kanu kəfɔdesɔŋɛ ŋa kəsəkpər mɔyɔ maŋan ŋacərɛ kance-ɛ? 26Awa ŋandetam kəcɛm-cɛmnɛ pətɔt, tɔsɔŋɛ ŋa kəmulpɛ towul pa Ŋɔŋk Ŋɛlɛc mpɛ pɔsɔrɔsumpər ŋa kɔ pɛncəmbər ŋa tɛfaŋ ta ŋi mɔ.