Njelo 22

1Ni vyedi kusagula zina dyedi ukaleke ugoli ulozize,

kutunywa ni kwedi ukaleka mayuwe ya chumbu hegu zahabu.

2Mgoli na mchiwa waligana mwe dino,

Zumbe Chohile nuyo awaumbile wose.

3Mntu mta umanyi awona mbuli zihiye na kwefisa,

mna mntu mhezi ajendeleza kulongozi saviya tuntu vyamtenda alumile.

4Unyanyahala na kumvikila Zumbe Chohile,

kwegala ugoli na ntunyo na ujima.

5Mwe sila za wantu wavu mmema miwa na fyusa,

akunga kudima ujima wakwe ayenega ayo.

6Mhinye mwana sila yedi ikumdima,

uyo haileke hata akadalahala.

7Mgoli amtawala mchiwa,

akukopa ni mtumwa ywa yudya amkopeshe.

8Akuhanda wavu avuna nkunto,

udahi wakwe wa kudamanya wavu naubindwe.

9Mntu mta chisekwesekwe najimbikwe,

kwaviya nkande yakwe awenka wachiwa.

10Mbalaze mta ubezi ngavungavu nayusike,

aho, nkumbizi na mahuluto navisile.

11Mta moyo wa kunga wantu na milosi yedi,

natende mbuya ywa seuta.

12Zumbe Chohile adima umanyi,

mna ahiga milosi ya wantu wavu.

13Mbwa agamba, “Kuse kuna simba!”

“Sikudaha kufosa kwaviya nankomelwe kwe sila!”

14Mlomo wa mvyele mchilanga ni bome tali,

mntu akwihiwa ni Zumbe Chohile nagwele umo.

15Kwa mazwela mwana adamanya mbuli za chihezi,

mna nkome ya nkanto yamchulusa.

16Mntu akumbunyanya mchiwa chani atende mgoli,

na mntu akumwinka mgoli jeleko, wose nawatende wachiwa.

Milongi milongo mitatu ya wata ubala

17Tegeleza milosi ya wata umanyi,

uyaikise mo umoyo wako amahinyo yangu, 18kwaviya nawelelwe uneva unayaika mo umoyo wako,

na kuyalonga chila nkanana.

19Hata weye nakuhinya vino dyelo,

naunga wike msuhi wako kwa Zumbe Chohile.

20Sikuwandikila milongi milongo mitatu.

Milongi ya umanyi na malangilizo.

21Vileke huhinye viligane ne ichindedi,

mntu akakuza udahe kumhitula vikuwagila,

ni yuhi akutumile?

Ulongi wa Nkongo

22Usekubunyanya mchiwa kwaviya ni mchiwa,

hegu kumnyima msokezi kwaviya ni msokezi mwe chitala, 23kwaviya Zumbe Chohile nawalahile,

uyo nawahoke ujima wawo wadya wakuwabunyanya.

Ulongi wa Kaidi

24Use kwika umbuya na mntu mta maya,

naho usejesanya na mtu akusunguza kwihiwa, 25wadaha uhine ulujendo lwakwe niyo wagwiza mwe lufyusa.

Ulongi wa Katatu

26Usekutenda yumwenga mgati mwe wadya wakwika lagano,

wantu wakwetenda wachimaila wa matigizo.

27Umo ukadunduga ukuliha,

waguha hata ulusazi lwako.

Ulongi wa Kane

28Use kusogeza yuwe dya mhaka wa kale,

waikagwa ni wakale wako.

Ulongi wa Shano

29Togola kuna mntu mta umanyi kwe indima yakwe?

Uyo nawasankanila maseuta, hasankanile watu wasokezi.