Njelo 23

Ulongi wa Mtandatu

1Uneva ukekala udye nkande hamwenga na sekulu,

usekujeza kujala hata hadodo kugamba wadya na yuhi.

2Uneva wimmelo,

usinyise unase kwehosa.

3Use kungisa izinkande zakwe zimwile akukwinka,

kwaviya yajesezwa kukudanta.

Ulongi wa Mfungate

4Uneva wi mmanyi vyachinta,

use kwetumbwadisa kulonda ugoli.

5Aho ugoli wako wadaha usunguze kwaga,

watenda saviya uhota mawawa chipumpa

na kupuluka kulanga saviya mwewe.

Ulongi wa Mnane

6Use kudya nkande ya mntu mbafu hegu kubesa kudya nkande yakwe yedi, 7nakugambe, “So wongeze vituhu,” Mna mo umoyo wakwe hakubweda.

Icho akufanyanya ni idiyombe.

8Notahike chiya udile,

viya vyose nendile ukamtogola ni vyabule.

Ulongi wa Chenda

9Usekulonga milosi yako kulongozi kwa mntu mhezi,

kwaviya nabele imilosi yako yo umanyi.

Ulongi wa Mlongo

10Use kusa yuwe dya mhaka wa kale,

hegu kwingila mwe nkonde za wabanikile ni welesi wawo.

11Kwaviya Zumbe Chohile Mta Nguvu nuyo mgombezi ywawo,

nawalahile imbuli yawo mwako.

Ulongi wa Mlongo na Imwenga

12Jeseza umoyo wako kutoza mahinyo,

tega amagutwi yako kwetegeleza milosi yo umanyi.

Ulongi wa Mlongo na Mbili

13Use kuleka kumfunda mwanawo.

Ukamtowa habanike.

14Unamtowa na milugwa,

wahonya ujima wakwe mwe file.

Ulongi wa Mlongo na Ntatu

15Mwanangu, uneva umoyo wako unatenda no umanyi,

elo moyo wangu nawelelwe vitendese.

16Moyo wangu naweduvye

umo heva ukalonga milosi yo umanyi.

Ulongi wa Mlongo na Nne

17Moyo wako use kuwawonela finju wata masa,

mna mvikile Zumbe Chohile mazuwa yose.

18Chindedi kuna msuhi wa mazuwa yose,

naho msuhi wako hausile mpwii.

Ulongi wa Mlongo na Shano

19Tegeleza, mwanangu,

utende na umanyi naho fanyanyisa ivyo ukwikala.

20Use kwehanga na wantu wakozi,

hegu wamelo wakungisa nyama, 21kwaviya wakozi na wabafu nawasigale kutenda wachiwa.

Na wantu wabwa nawajendeleze kuvala na kuvala visambo.

Ulongi wa Mlongo na Mtandatu

22Mwetegeleze iso akweleke,

unase kumbela nyokwe umo akadalahala.

23Gula ichindedi naho use kuchitaga,

utende na umanyi na kukambatiza mahinyo.

24Ise dya mwana mkanuni amema mbwedo,

mntu mta mwana mta umanyi amwefenyeza.

25Waleke iso na nyokwe welelwe,

mleke nyokwe akweleke avine.

Ulongi wa Mlongo na Mfungate

26Mwanangu, netegelezesa,

naho utimile lujendo lo wikazi wangu.

27Mvyele mchilanga ni bome tali dikutega wantu,

mvyele mjenda uyaga ni saviya lwina.

28Wanyatila saviya wapolaganyi,

wahosa wagosi walozize wasekutenda wakanuni.

Ulongi wa Mlongo na Mnane

29Ni yuhi akutula lwasu?

Ni yuhi mta chinyulu?

Ni yuhi mta nkumbizi?

Ni yuhi akung'ung'uzika?

Ni yuhi walumizwe vya bule?

Ni yuhi mta meso yenkundu?

30Ni wadya hewekumlawa mwa mahombe,

wadya wakungisa kuluma chila mpombe.

31Use kubesa divai kwachausa cho unkundu wakwe,

hatahegu yata kumelemeta mwe ichikombe,

hatahegu yasela mpalahohole hadya ukainywa.

32Uhelo wakwe waluma saviya nyoka, yatunga saviya zoka dina usungu utendese.

33Ameso yako na yawone mambwiza mbwiza naho fanyanyi zako nazifanyanye mbuli za wavu.

34Nautende saviya mntu agonile mgati gati mwe ziwa,

saviya mntu agonile mlanga mwe mlingoti wa meli.

35Nagambe, “Sitoigwa mna silumile,

wanisapula sivikombaganye.

Naninuke ini? Chani hazimue vituhu.”