Njelo 24

Ulongi wa Mlongo na Chenda

1Use kuwadila finju wantu wavu,

naho use kutenda na umbuya nawo, 2kwaviya imyoyo yawo yafanyanya nkumbizi,

milomo yawo chila wakalonga walonga yehiye ayodu.

Ulongi wa Milongo Midi

3Nyumba yazengwa mwe msingi wa ubala na kutogezwa kwa umanyi.

4Kujinkila fanyanyi,

ivyumba vyakwe vyamemezwa vintu vya yombe na vikuwagiza.

Ulongi wa Milongo midi na Imwenga

5Kutenda na umanyi ni vyedi ukaleka mntu mta nguvu,

na mntu mta ubala ajenyeza nguvu.

6Chani upate uhuda waungwa upate walangilizi walozize,

chani ugombe nkondo waunga utende na vilongozi wedi.

Ulongi wa Milongo Midi na Mbili

7Mntu mhezi ni mdala kukombaganya umanyi.

Hawana dya kulonga hadya mbuli zedi zikalongwa.

Ulongi wa Milongo Midi na Ntatu

8Mntu mta kufanyanya wavu chila nkanana,

netangwe msongaganyi.

9Vintu vikufanyanywa ni mntu mhezi ni masa.

Mntu mta ubezi aihiwa ni chila mntu.

Ulongi wa Milongo Midi na Nne

10Uneva wahwa chipindi cha nkunto,

ivyo weye wi msokezi vitendese.

Ulongi wa Milongo Midi na Shano

11Mwambule mntu akuguhigwa akakomwe hebalange,

usekogoha kumkombola mntu akwakukomwa.

12Wadaha ugambe, “Miye simanyize dyodyose”

Mna Chohile amanyize myoyo ya wantu awona,

togola uyo hamlihe chiola mntu kuligana ne izintendwa zako?

Ulongi wa Milongo Midi na Mtandatu

13Mwanangu udye uchi kwaviya ni wedi.

Naho uchi ukulawa mwe chivuna wimwile mo mlomo wako.

14Uvimanye kugamba umanyi ni wedi mwako.

Nivyo wili ubala mo untu wako, unapata notende na msuhi wedi, mwalo wako hautende wa bule.

Ulongi wa Milongo Midi na Mfungate

15Use kunyata saviya mpolaganyi akudamanya chani ebunge nyumba ya mntu achumile,

usekujeza kuibogozola inyumba yakwe.

16Hatahegu mntu achumile adaha agwe chila nkanana,

mna nenukile vituhu,

mna mntu mwavu agwiswa ni file.

Ulongi wa Milongo Midi na Mnane

17Use kubweda mnkondo ywako akagwa,

naho use kwelelwa akekobadika.

18Zumbe Chohile akuwona ivyo hawagilwe,

vyadahika adaha aleke kumkantila.

Ulongi wa Milongo Midi na Chenda

19Use kwihiwa kwachausa cha wantu wehiye,

naho use kuwadila finju wantu wavu.

20Mntu ehiye hana msuhi wa mazuwa yakwiza,

kwaviya mntu mwavu hana wikazi mtali.

Ulongi wa Milongo Mitatu

21Mwanangu, mvikile Zumbe Chohile na kumtunya seuta,

use kwelunga na wantu wata kuwahituka awo, 22kwaviya wantu sa awo wadaha wakomwe chipumpa.

Ni yuhi akudaha kumanya nkondo ikudaha kugwiswa ni Zumbe Chohile hegu seuta?

Milongi mituhu ya wata Ubala

23Iviya ino ni milosi mituhu longigwe ni wantu wamanyi.

Sivyo vyedi kuhingiza wantu mwe kukantila.

24Mntu yoyose akumlekeila mntu mta mlema,

naligitwe ni wantu na kwihiwa ni izisi ntuhu.

25Mna wakuwakantila wantu wavu,

nawapate mbwedo na ujimbiko. 26Hitulo dyo ukanuni,

ni saviya chilagiso cha umbuya.

27Bindiliza izindima zako za kuse,

ukaheza malanya izinkonde zako, ivyo vikaheza,

zenga inyumba yako.

28Use kulavyanya mbuli za mbuyayo vya bule,

naho use kujeseza umlomo wako kulonga mbuli zo udanti mwakwe.

29Use kugamba, “Nanimtende saviya anitendile!

Nanimlihe chikoda saviya anidamanye!”

30Sijinkila haguhi ne inkonde ya yudya mbwa,

nkonde ya mizabibu ya mntu mhezi.

31Sehelwa imema miwa, mani yagubika inkonde yose.

Chiwambaza chakwe cha mayuwe chibogozoka.

32Sisinya, nakuwazagula mo umoyo wangu yadya niwone,

niyo nabunkula chintu cha kuhina mwa yadya niwone.

33Kugona hadodo.

Kunja imikono uhumule!

34Mna umo ugonile, uchiwa naumwebunge,

saviya mntu mpolaganyi,

na usokezi naukwebunge saviya mntu mta chiziha.