Njelo 25

Njelo ntuhu ya Sulemani

1Zino ni njelo ntuhu za seuta Sulemani,

zivuzagizwe kuwandikwa ni wantu wa Hezekiya seuta ywa Yuda.

2Chohile atunywa kwa kufisa mbuli,

mna seuta atunywa kwa yadya akulonga.

3Saviya imbingu ivyo ili hale vitendese kulanga ne isi ihasi,

nivyo zili fanyanyi za maseuta hukudaha kuzizuza.

4Usa amasilesile ye mwa amayuwe ye chumbu,

na msani nakusanile chintu chedi.

5Wause wantu wavu kulongozi kwa seuta,

aho ichigoda cho ulongozi wakwe nachitogezwe.

6Use kwekomba kulongozi kwa seuta,

naho use kwetenda mntu amanyikise, 7viwagila utekugambigwa ni seuta mwenye,

“Soo wikale kuno kulongozi”

Ukaleka kuhayuswa kulongozi kwa mntu mkulu.

8Use kugulukila kwigala mbuli kwe chitala,

kwaviya analaila muukuzi nalavyanye ivyo vili nowingile soni.

9Uneva una nkumbizi na mbuyayo ivanani nyuwenye du,

na chila yumwenga ase kulavyanya ichinyele cho mnyawe, 10wantu wanase kumanya kuna chinyele,

na kwejela soni mazuwa yose.

11Ulosi ukulongwa mwe chipindi chikuwagila,

ni saviya hambo dya zahabu dikigwe mlanga mwe mayuwe ya chumbu.

12Kanyo dya mntu mta umanyi kwa mntu akwiva,

ni dyedi ukaleka mpete hegu vinchofu vya zahabu yedi.

13Mlosi mkanuni amwelela yudya amsigile,

saviya mazi yempeho chipindi cha chifukuto, ahoza moyo wa sekulu ywakwe.

14Saviya maingu na nkung'unto hekwina fula,

nivyo eli mntu akwekamba kugamba nalavye jeleko mna hadilavye.

15Chilongozi adaha kuluvywa kwa sila yo ujijimizi,

na lulimi ludeleke lwadaha kutula mavuha.

16Uneva unapata uchi dya ukukuchinta,

unase kusibilwa niyo watahika.

17Use kumtalamkila mbuyayo chila chipindi,

unase kumsokeza na kukwihiwa.

18Mntu akulavya ukuzi wa lulimi mwe mnyawe,

kaihisa saviya lungu hegu bamba hegu mfulo ukutwa.

19Kumwegamila mntu suyo mkanuni chipindi cha nkunto,

ni saviya jego hegu chiga chiteguke.

20Kumchemela mntu mta chinyulu,

ni saviya kumvula mntu izisuche chipindi kuna mpeho,

hegu kumjela mntu munyu mwe nkwenje.

21Uneva mnkondo ywako ana sala mwinke nkande adye,

uneva ana nchilu, mwinke mazi anywe, 22kwa kumdamanyiza ivyo, wamtenda engilwe ni soni,

saviya mntu ahailwe makala ya moto mo mtwi wakwe,

naho Zumbe Chohile nakutunye.

23Saviya nkung'unto ya vuli ikwigala fula,

nivyo eli mntu msongaganyi akwigala nkumbizi.

24Viwagila kwikala kulanga kwe hala dya nyumba,

ukaleka kwikala na mvyele mnkumbizi.

25Saviya mazi yempeho kwa mntu mta nchilu,

nivyo vili ukeva milosi yedi ikulawa hale.

26Mkanuni akuzumila mbuli za mntu mwavu,

ni saviya soko ya mazi ichokoleswe hegu sima ditibulwe.

27Sivyo vyedi kudilisa uchi,

seivyo sivyo vyedi kwetogoza.

28Mntu hekudaha kwechinda maya yakwe,

ni saviya mzi heuna viwambaza.