Njelo 26

1Ntunyo akwinkigwa mhezi haikuwagila dyodyose,

ni saviya balafu mwe chipindi cha zuwa hegu fula mwe chipindi cha ulozo.

2Saviya wadege wakwitangwa shomolo hegu wambayumbayu hewe kuchima hasi,

seivyo ligito hedikumuwagila mntu hadikumgwela.

3Falasi yavyalutwa kwa mjeledi, lijamu kwa mpunda

na nkome ni yakutoila migongo ya wantu wahezi.

4Use kumhitula mntu mhezi mo uhezi wakwe,

unase kutenda mhezi saviya eli yeye.

5Mhitule mntu mhezi kuligana no uhezi wakwe,

anase kwewona kugamba ana umanyi utendese.

6Kusigila mntu mhezi, ni saviya kwesenga iviga,

hegu kwelondela nkunto.

7Njelo mwe mlomo wa mntu mhezi,

ni saviya chiga cha mntu aholomale chikunemanema.

8Kumtunya mntu mhezi,

ni saviya kujela yuwe mwe nkumbayuwe.

9Mntu mhezi akujeza kujeseza njelo,

ni saviya mkozi akujeza kusa mwiwa mo mkono wakwe.

10Akumwinka ndima mntu mhezi hegu mkozi,

ni saviya mta uta akulasa wantu vya bule.

11Mntu mhezi akuwiya uhezi wakwe,

ni saviya kuli dikudya amatahika yakwe.

12Viwagila mntu mhezi,

ukaleka mntu akwewona ana umanyi kumbe hana.

13Mntu mbwa nkanana zose agamba,

“Uko kuse kuna simba sikudaha kufosa uko!”

14Saviya lwivi lukuhituka mwe zibawaba zakwe,

nivyo mntu mbwa akwehitula mo lusazi lwakwe.

15Mntu mbwa egala mkono wakwe mwe sahani ya nkande,

mna adunduga kuuvuza ko mlomo wakwe.

16Mntu mbwa ewona kugamba ni mbala,

ukaleka wantu mfungate wakudaha kuhitula kwa umanyi.

17Akwiihiwa na kwingila mwe nkumbizi siyo yako,

ni saviya mntu akutoza magutwi ya kuli dikujinka mwe sila.

18Saviya mchilalu akusezigila gala dya moto,

hegu mifulo yo uta ikukoma, 19nivyo eli mntu akumwazaganya mnyawe,

akaheza agamba, “Nendile hadamanya uhungu du!”

20Hehana nkuni moto haukwaka,

hehana msongaganyi hahana nkumbizi.

21Ni saviya nkuni hegu nkala zikukonkanya moto,

nivyo vili msongaganyi akuhosa nkumbizi ilaile.

22Milosi ya msongaganyi ni saviya nkande imwile,

yasela kundani vitendese kwe mntu!

23Milosi imwile ikulawa mwe moyo wa mwavu,

ni saviya nyungu ikulugwe ikumelemeta.

24Mlulimi efisa kwa milosi yedi,

mna mo moyo wakwe kafisa mbuli zihiye.

25Hatahegu alonga mbuli zedi use kumzumila,

kwaviya umoyo wakwe umema mbuli zikwihiza.

26Hatahegu adaha kufisa wihi wakwe kwa udanti,

mna ubanasi wakwe naumanyike kulongozi kwa awantu.

27Akumsimbila bome mnyawe engila mwenye,

akufingilisa yuwe nadimuwiye mwenye.

28Mntu mdanti aweihiwa wadya akuwalumiza,

mntu akwekomba egala ubanasi.