Njelo 27

1Use kweduvya kwachausa cha luvi,

kwaviya humanyize icho nachilaile dyelo kubula luvi.

2Leke mntu mtuhu akutogole, suwo kwa mlomo wako mwenye,

mjeni atende ivyo mna suyo lulimi lwako mwenye.

3Yuwe dizama na msanga nawo uzama,

mna kujelwa maya ni mntu mhezi vizamisa ukaleka ivyo vyose vidi.

4Maya ni unyakwili na kwihiwa ni ubanasi,

mna hukudaha kuliganya na finju.

5Viwagila mntu akukufunda mo lumpe,

ukaleka ungi wefisize.

6Mbuyayo akakulangiliza ni vyedi ni vyedi hatahegu vyaluma.

Mna mnkondo ywako akakulagisa ungi akudanta!

7Mntu egute hata uchi hakuunga,

mna mntu mta sala hata chintu chisungu kwakwe chimwile.

8Mntu agile hale na kwakwe,

ni saviya kadege kahasanye idisasa dyakwe.

9Mavuta ya kupwepweleka na uvumba wa kwevunkiza kwelela mo umoyo,

mna utana wa mbuya ywedi walaila kulawa mo ulangilizi wakwe uchumile.

10Use kuwajala wambuyazo hegu wambuya wa tati yako.

Ukagwelwa ni mbuli unase kulombeza wambizi kwa walukolo wako,

wambuya wehajihi wadaha wakwambize ukaleka walukolo we hale.

11Mwanangu utende mbala unibwedeze umoyo wangu,

nivyo navileke hadaha kumhitula mntu yoyose akunibela.

12Mbala awona nkondo niyo efisa,

mna hezi elaviza vyaleka akulumila.

13Mntu mhezi akumwikiya mjeni zamana,

guha isuche yakwe wikale nayo kubula hadya nalihe.

14Mntu akumjimika mbuyaye chilochilo kwa izwi kulu,

naviwoneke kugamba amligita.

15Mvyele mnkumbizi mazuwa yose,

ni saviya matwentwe ya fula heyekusila.

16Kumchinda uyo ni saviya kuchinda nkung'unto,

hegu kugwila mavuta ya kujuluzika mwe chifumba.

17Chuma chanola chuma,

seivyo mntu atoigwa msasa ni mnyawe.

18Mntu akutunduliya mti nadye izintunda zakwe.

Mntu akumsankanila sekulu ywakwe natunywe.

19Saviya uso ukwewona mwa amazi,

nivyo moyo wa mntu ukumlagisa ivyo eli.

20Bome hedina uhelo na ubanasi havikumema mpwii,

nivyo vili meso ya mntu hayakwiguta.

21Wedi wa mayuwe ya chumbu na zahabu vyasuntwa mwe moto,

na mntu ahimwa kwa ntendwa zakwe.

22Mntu mhezi hata ukamtwangwa hamwenga no uhule mwe tuli,

hukudaha mpwii kumpagula no uhezi wakwe.

23Udimise uludimo lwako,

sinyisa amafyo yako ivyo ukudaha, 24kwaviya ugoli haukwikalisa.

Hata chilemba cho uzumbe hachikwikala vyeleko vyose.

25Ukaheza kukanta nyasi mani mahya yasuka,

na nyasi kwa magulu zachisaywa, 26chipindi icho ngoto nazikupatile sufu kwachausa cha kusuma suche,

naho wadaha kutaga mbuzi na kugula nkonde.

27Mbuzi nazisigale nazikwinke mele kwachausa chako no ulukolo lwako,

hamwenga na wandima wako wa chivyele.