Njelo 28

1Wantu wavu waguluka hatahegu hahana akuwabalaza,

mna wantu wakanuni ni wakankalu saviya simba.

2Uneva isi ikatenda na ngavungavu,

naitende na vilongozi walozize.

Mna kunatenda na mntu yumwenga mta ubala na umanyi kwatenda na wivano.

3Mntu mchiwa akumzila msokezi,

ni saviya fula nkulu ikubalanga nkande mwe izinkonde.

4Wantu wakubalanga imiko nawo wakuwatogola wantu wavu,

mna wadya wakutoza imiko wawahiga.

5Wantu wavu hawakukombaganya vikuwagila,

mna wakumvikila Zumbe Chohile wamanyisa uwagila.

6Ni vyedi mntu mchiwa akwikala kwa uchumi,

ukaleka mgoli akwikala kwa wavu.

7Mwana akutoza miko ni mbala.

Mna mwana mta umbuya na wantu wamelo,

amjela soni tati yakwe.

8Mntu yudya akongeza ugoli wakwe kwa liba nkulu,

ugoli wakwe nawite kwa mntu akuwawonela mbazi wachiwa.

9Uneva mntu yoyose hakutoza imiko,

hata amalombezo yakwe ni ihizo kwa Zumbe Chohile.

10Akumluvya mntu achumile adamanye wavu,

nagwele mwe bome dyakwe mwenye,

mna hena mlema nenkigwe jeleko dyedi.

11Mgoli ewona kugamba ni mta ubala,

mna mntu mchiwa mta umanyi nambunkule.

12Wantu wachumile wakachumilwa chila mntu elelwa,

mna mntu mwavu akalongoza wantu wefisa.

13Mntu akufisa masa yakwe hachumilwe,

mna akweila na kuleka uwavu wakwe achumilwa.

14Ntunyo enkwa yudya akumogoha Zumbe Chohile.

Mna uneva wimnkumbizi, nokomwe.

15Chilongozi mwavu akulongoza wachiwa,

ni saviya simba ikubuma hegu dubu dikunga digwile.

16Chilongozi hena akili kaiha naho ni nyakwili.

Mna chilongozi akwihiwa kubunyanya nekalise mo ulongozi.

17Mntu akutumbwadiswa ni mlema wa kukoma nangadike kubula kwe mbila.

Mntu yoyose asekujeza kumchinda.

18Akwikala kwa ukanuni nambulwe,

mna mntu mdanti nasunguzwe kukomwa.

19Akulima nkonde yakwe nalozolese.

Mna mntu akudwangaya mwe mbuli za uhovyo natendese mchiwa.

20Mntu mkanuni najimbikiswe,

mna akungisa asunguze kutenda mgoli nakantilwe.

21Kuhingiza suko kwedi.

Mna kuna wantu wakudamanya wavu kwachausa cha besu dya mkate.

22Mntu mbafu agulukila ugoli,

mna hamanyize kugamba uchiwa wamgoja.

23Mntu akumlangiliza mnyawe nyumani ahokela yedi vitendese,

ukaleka yudya akumtogola kwa mbuli zo utilizi.

24Mntu yoyose akumbaila ise hegu nine, vikaheza agamba,

uyo hesimile na wadya awabavi awatuhu.

25Mbafu ahosa nkumbizi.

Mna akwika msuhi wakwe kwa Zumbe Chohile nachumilwe.

26Mntu akwegamila fanyanyi zakwe ni mhezi.

Mna akwikala kwa umanyi nekale mpeho.

27Mntu akumwinka chintu mchiwa hahungukilwe.

Mna yudya akulemela kuwasinya wachiwa, naligitwe vitendese.

28Mntu mwavu akalongoza wantu wakwefisa,

mna mwavu akabanika, wantu wachumile wachumilwa.