Njelo 29

1Mntu akulangilizwa chila nkanana hekwiva,

neze akomwe chipumpa naho haonwe vituhu.

2Wachumile wakalongoza wantu welelwa.

Mna wantu wavu wakalongoza, wantu wang'ung'uzika.

3Mntu akunga umanyi amwelela tati yakwe,

mna akulongozana na mchilanga amwaganisa ugoli wakwe.

4Seuta akalongoza kwa ukanuni isi yatenda na utogi,

mna uneva aungisa kufumbaswa, abalanga isi yakwe.

5Mntu yoyose akumtogola mbuyaye kwa udanti,

eikiya lufyusa lwa kwegwiza mwenye.

6Mntu mwihi egwiza mwenye kwa masa yakwe,

mna mntu mkanuni achema na kubweda.

7Mntu mkanuni kamanya uwagila wa wachiwa,

mna mntu mwavu hamanyize izimbuli izo.

8Wantu watilizi wahosa ngavungavu mo umzi wose,

mna wantu wana umanyi wahoza maya.

9Mntu mta umanyi akahigana na mntu mhezi mwe chitala,

mhezi ehiwa na kwingiza utilizi, hahatenda na utondowazi vituhu.

10Wantu wakungisa kwitila sakame wawehiwa wantu wachumile,

mna wantu wachumile wawadima wantu sa awo.

11Mntu mhezi alagisa amaya yakwe yose,

mna mta umanyi ayahoza na kuyachinda.

12Uneva chilongozi etegeleza udanti,

wambizi wakwe wose watenda wavu.

13Mntu mchiwa na mntu akuzila wantu waligana mwe chintu chimwenga,

wose waidi wenkigwa meso ni Zumbe Chohile.

14Seuta akantila wantu wachiwa kwa ukanuni,

nalongoze kwa chipindi chitali.

15Mafundo na nkanto vyegala umanyi kwa wana,

mna wanalekwa wadamanye ivyo wakunga, wawajela soni mami zawo.

16Wantu wavu wakalongoza, wihi wongezekela,

mna wantu wachumile nawawone ivyo awantu awo nawagwe.

17Mlangilize mwanawo uyo nakwinke utondowazi,

naubwedeze umoyo wako.

18Hantu hehana uwoni wantu wabanikilwa,

mna kajimbikwa yudya mntu akutoza imiko!

19Mtumwa hakulangilizwa kwa milosi iyodu,

kwaviya hatahegu kamanya hatimile.

20Mntu mhezi ana msuhi,

ukaleka mntu akwelongela hena fanyanyi.

21Uneva mntu ana mdedeheza mtumwa ywakwe kukongela mo udodo wakwe,

udumo wakwe hamwetegeleze.

22Mntu mta maya ya hajihi,

ahosa nkumbizi ilaile na nkunto itendese.

23Kweduvya kwa mntu kwamgwisa mwenye,

mna uneva wanyanyahala notunywe.

24Akwehanga na mbavi eikiya nkondo mwenye.

Hata enkigwa cheliso halonge ichindedi.

25Kuwogoha wantu wetega mwenye,

mna mntu yoyose akumwegamila Zumbe Chohile nekale mpeho.

26Wantu walozize waungisa kwekomba kwa chilongozi,

mna mntu enkigwa uchumi kulawa kwa Zumbe Chohile.

27Mntu mkanuni amwihiwa mntu mwavu,

mntu mwavu amwihiwa vitendese mntu mkanuni.