Njelo 30

Milosi ya Aguli

1Milosi ya Aguli mwana ywa Yake,

milosi idya mntu yuno amgambile Itieli, heye Itieli na Ukali,

“Chohile kanasa, Chohile kanasa, naho sina wambizi.

2Miye ni mhezi kujinka wantu wose,

sina fanyanyi ziya zikungwa atende nazo mntu.

3Sinati kuhina umanyi,

naho simanyize dyodyose chikumlanga Chohile Mkuka.

4Ni yuhi akwelaga kwembingu na kusela hasi?

Ni yuhi agwilaga nkung'unto mwe vifumba vyakwe?

Hegu ni yuhi avungile mazi mwe chitambala chakwe?

Ni yuhi ekiye imihaka yo uhelo we isi?

Zina dyakwe nuyo yuhi na mwanawe ywe chilume etangwa yuhi?

Hegu kuvimanya nigambila.”

5“Chila ulosi wa Chohile ni wachindedi,

uyo ni nchinga kwa wose wakumgulukila awadime.

6Usekongeza mbuli mwe milosi yakwe,

anase kukukwahila na kukulagisa kugamba wadanta.”

Njelo Ntuhu

7Weye Zumbe Chohile,

nakulombeza uninke mbuli mbili sinati kubanika,

naho use kunilemeila, 8nusiza lulimi no udanti naho nisekutenda mgoli hegu mchiwa,

mna uninke nkande ikunichinta chila zuwa.

9Nnatenda na vintu vilozese nahulemele na kugamba,

Zumbe Chohile ni yuhi?

Naho usekunitenda mchiwa niyo nabawa,

na kudijela soni idizina dya weye Zumbe Chohile ywangu.

10Use kumlongelaza mndima kwa sekulu ywakwe.

Adaha akuligite na kukunta.

11Kuna wantu wakuwaligita watati zawo,

naho hawakuwajimbika wamami zawo.

12Kuna wantu wakwefanyanya ni wedi,

kuno hawakukizwe amasa yawo.

13Kuna wantu wakwefenya vikwehela,

wasinya kwa meso yo ubezi!

14Kuna wantu meno yawo ni saviya sime,

mahasaga yawo ni saviya ngola,

kuwabalanga wantu wachiwa mwe isi na wasokezi wakwikala mgati mwa awantu.

15Nguha ina wana waidi wa chiche, wakwitangwa, “Ninka! Ninka!”

Kuna vintu vitatu hevikwiguta, heye, vintu vine hevikugamba vyachinta, 16mbila,

nda ya mvyele hekweleka, sanga heikwiguta mazi,

na moto hewikugamba, vyachinta.

17Wadya wakuwatila watati zawo hegu kuwabela wamami zawo,

wawagilwa watomolwe ameso ni makungulu kwamakolongo na kudigwa ni magushu.

18Kuna vintu vitatu sikuvimanya,

heye vintu vine sikuvikombaganya, ivyo ni, 19lujendo lwa mwewe mo ulanga,

sila ya nyoka mwe luwe,

na sila ya meli mwe ibahali,

na icho chikuleka mgosi na mvyele waungane, 20lujendo lwa mvyele mchilanga ni luno,

adya na kuhangusa umlomo akaheza agamba,

“Sibalange mbuli yoyose!”

21Kuna mbuli ntatu zikusingisa isi,

heye vintu vine isanga haikudaha kuvijijimiza, ivyo ni, 22mtumwa akutenda seuta,

na mntu mhezi akeguta nkande, 23na mvyele hekungigwa umo akasolwa,

na msuntaviya akuguha hantu ha mkulu ywakwe ywe indima.

24Kuna vyumbe vidodo vine mwe isi,

mna vina akili vitendese, 25ivyo ni wasisimisi, ni vyumbe wahwelese,

mna waika mpamba yawo mwe chipindi cha chifukuto, 26Wanyama wasokele kwitangwa madili, hawekwedaha,

mna wedamanyiza wikazi mwe mpako za mayuwe.

27Sije, hazina seuta,

mna zajendela chalumwe mwe mabunga bunga.

28Gondo, wadaha uditoze kwa mkono,

hata ivyo dyawoneka mwe nyumba za chiseuta.

29Kuna vintu vitatu vina lujendo lukubwedeza,

heye vintu vine vikajenda kwa wefenyi, ivyo ni, 30simba ina nguvu kujinka mnyama yoyose,

naho yogoheswa ni wanyama wose, 31zogolo dikujenda kwa wefenyi, iviya vulata.

Na seuta kulongozi kwa awantu wakwe akulongoza.

32Uneva kudamanya uhezi na kwetogola wemwenye,

hegu kwemalanya kudamanya wavu leka, naho wedime umlomo wako.

33Kwaviya unatowa mele wapata mabongo.

Unamtowa mntu mwe impula nalawe sakame.

Iviya kusonga maya kwahosa nkumbizi.