Njelo 31

Milongi kwa Seuta

1Ino ni milongi ya ulangilizi idya nine dya Seuta Lemueli amgambile mwanawe.

2“Weye wi mwanangu neleke,

mwanangu ywa lagano.

Hugambe mbwani mwanangu nilombeze kwa Chohile?

3Use kubinda izinguvu zako zose kwa wavyele,

no ugoli wako kwa wadya wakuwabalanga maseuta.

4Tegeleza Lemueli, maseuta hawakungwa wakanywa divai,

hegu kubesa kunywa mpombe, 5wananywa, nawajale amalagizo ye izisigilizi,

na hawawenke uwagila wantu wata nkunto, 6mpombe ni ya wantu wehajihi na kubanika,

wenke divai wadya wata chinyulu mwe myoyo, 7waleke wanywe na kujala uchiwa wawo,

wasekukumbuka nkunto zawo vituhu.”

8“Mna weye longa kwachausa cha wantu hewekudaha kwelongela wenye,

dima uwagila wa wose hewena wambizi.

9Ulonge kwa kukantila kwa uchumi.

Gombela uwagila wa wachiwa na hewena chintu.”

Mvyele ywedi

10Mvyele ywedi alawa kuhi!

Kwaviya uyo ana yombe kulu kujinka mayuwe ya yombe kulu!

11Mgosiwe amtunyisa,

naho mgosi uyo hatswese chintu chochose.

12Hakumtendela yehiye mgosiwe,

mna amdamanyiza yedi mazuwa yose yo wikazi wakwe.

13Ahikiliza kudamanya ndima kwa mikono yakwe,

akadamanya sufu na chitambala ching'aile.

14Uyo kaligana na meli za mayombe,

zikuleta nkande kulawa hale.

15Enuka chilochilo zuwa hedinati kufosa,

kumalanya nkande ya walukolo wakwe na kuwagambila wandima wakwe wa chivyele ndima zo kudamanya.

16Afanyanya kugula nkonde,

akaheza aigula na kuhanda zabibu kwa loso lwa jasho dyakwe.

17Adamanya ndima zakwe kwa nguvu,

imikono yakwe ina nguvu kwachausa che izindima zakwe.

18Amanya kugamba ndima zakwe zina loso,

adamanya ndima zakwe kubula nechilo.

19Adamanya nyuzi kwa mikono yakwe mwenye,

naho asuma suche zakwe kwa madole yakwe.

20Uyo alavya kwa chisekwesekwe,

kuwenka wachiwa na wasokezi.

21Uneva kuna mpeho hana nkama kwachausa cha awantu wakwe,

kwaviya chila yumwenga ana suche zina lumotomoto.

22Aluka micheka ilembigwe vyedi ya kutandika mo ulusazi lwakwe,

uyo mwenye avala suche zing'aile na zambalau.

23Mgosiwe kamanyikisa mgati mwa awalamuzi wa mji,

ekala hamwenga na wadalahala mwe ivitala mwe isi.

24Adamanya suche na kuzitaga,

na kuwatagila wachuluzi wa misipi.

25Ni mta nguvu naho atunywa,

hana nkama kwachausa cha mazuwa yakwiza.

26Alonga kwa umanyi,

na kuwalangiliza watuhu kwa wedi.

27Akaula mbuli zose zikulaila mwe inyumba yakwe,

naho hakudya nkande heidamanyize ndima.

28Wanawe wenuka na kumjimbika,

mgosiwe naye amtunya.

29Akagamba, “Wavyele walozize wadamanya mbuli zikutogolwa,

mna weye kuwajinka wose.”

30Kwehamba chani uwatende wantu wakuwone kuwagiza ni kwedanta,

kwaviya utana wasunguza kwaga,

mna mvyele akumvikila Zumbe Chohile natogolwe.

31Mwinke ntunyo ikumuwagila mwa yose akudamanya.

Awagila atunywe ni chila mntu.