Njelo 21

1Moyo wa seuta wi mwemikono ya Zumbe Chohile,

wamlongoza saviya mto wa mazi wamwigala uko akunga.

2Sila zose za mntu ni zedi kulongozi kwakwe,

mna Zumbe Chohile ahima imyoyo.

3Kudamanya yedi na yachumile,

vyamuwagila Zumbe Chohile ukaleka ntambiko.

4Meso yo ubezi na moyo wa kweduvya,

vyalagisa pwilili masa ya wantu wavu.

5Myalo ya mntu mta kuhikiliza yamwigaila ugoli ulozize,

mta kukulumpuka atenda mchiwa.

6Ugoli ukupatikana kwa udanti,

ni saviya mpungile ikujinka na lufyusa lwa file.

7Unyakwili wa wantu wavu nauwakome,

kwaviya walemela kudamanya mbuli zo uwagila.

8Sila ya mntu mta mlema ni wavu,

mna lujendo lwa mkanuni luchuma.

9Viwagila kwikala kulanga kwe idihala,

ukaleka kwikala na mvyele mnkumbizi.

10Mntu mwavu abesa wihi,

hata mbazi hana kwa mbuyaye.

11Umo ukamkantila mntu mta utilizi mhezi ahina umanyi,

ukamhinya mbala wamwinka umanyi.

12Zumbe Chohile mkanuni, kamanya yakudamanywa mwe izinyumba za wantu wavu,

uyo nawagwise wantu wavu.

13Uneva mntu hakwetegeleza ndilo ya mchiwa,

iviya naye ndilo yakwe heivigwe akalombeza wambizi.

14Maya yahozwa kwa jeleko dya chinyele,

fumbaso difisigwe akwinkigwa mntu dyahoza maya.

15Uneva chindedi chikadamanywa, wantu wedi wabweda,

mna wantu wavu wahuza.

16Mntu akudwangaya hale ne isila yo umanyi,

nebwile kachima mgatigati mwa wantu wabanike.

17Akunga ndehwa natende mchiwa,

akufanyanya du kudya na kunywa hakudaha kutenda mgoli.

18Wantu wavu nawapate nkunto hezikuwapata wantu wedi,

mbanasi nakantilwe hantu ha mntu ywedi.

19Viwagila kwikala na kwedijangwa,

ukaleka kwikala na mvyele mnkumbizi na chinanka.

20Mwe nyumba ya mmanyi mna mpamba za ugoli,

mna mntu mhezi adya ugoli wakwe wose ananawo.

21Akungisa ukanuni na mbazi nekale wikazi mtali,

na kutunywa.

22Mmanyi adaha kutaha mzi wa wata nguvu,

na kugwisa viwambaza wakwefenyeza.

23Akudima mlomo wakwe no lulimi lwakwe,

enega nkunto.

24Mntu mta wefenyi na kweduvya zina dyakwe ni “Ubezi”

Ntendwa zakwe zimema wefenyi wo ubezi wakwe.

25Mntu mbwa abanika tama zakwe hazichintile,

kwaviya mikono yakwe ilegele haikunga kudamanya ndima, 26msi wose mwavu abesa apate chintu,

mna mkanuni alavya naho kwa chisekwesekwe.

27Lavyo dya mwihi ni chintu chikwihiza,

naho vyehizisa akalavya kwa wihi.

28Mlavyanya mlulimi nakomwe,

mna milosi ya mntu mta kwiva yekalisa.

29Mntu mwavu ebagaiza ko uso wakwe,

mna mkanuni akombaganya kutenda yedi.

30Hahana umanyi hegu fanyanyi hegu mahinyo yoyose,

yakudaha kumhuda Zumbe Chohile.

31Falasi yamalanywa kwa nkondo,

mna Zumbe Chohile nuyo akwinkiza uhuda.