Njelo 20

1Divai yaleta utilizi na ukozi walete nkumbizi,

mntu yoyose akuvibweda hana ubala.

2Maya ya seuta ni saviya mbumo wa simba,

akumwihiza aza ujima wakwe.

3Ni ntunyo kwa mntu akwenega nkumbizi,

mna mhezi ni mhufu ywa kutowana.

4Mlimi mbwa hakulima mwe ichipindi chikungwa,

ivyo mo kulozola natende hana cha kulozola.

5Fanyanyi za mntu zikala saviya mzimilizo wa mazi,

mna mntu mta umanyi kamanya kuziteka umo.

6Wantu walozize wetenda ni wedi,

mna mkanuni ywa chindedi nompate kuhi?

7Mntu mkanuni anekala kwa uchumi,

wanawe akunga ase wajimbikwa.

8Umo seuta akekala mwe ichigoda chakwe cho useuta akakantila,

abunkula wihi wose kwa meso yakwe.

9Ni yuhi akudaha kugamba moyo wakwe ni wedi,

sikuka amasa yangu?

10Mizani ya kuhimila yo udanti na vihimo vyo udanti,

vyose vidi vyamwihiza Zumbe Chohile.

11Chila mwana amanyika kwa ntendwa zakwe,

kugamba ni ywedi naho ni mkanuni.

12Magutwi yakwiva na meso yakuwona,

vyose vidi vyumbingwa ni Zumbe Chohile.

13Usekungisa kugona hegu sivyo notende mchiwa.

Damanyisa ndima notende na nkande ilozize.

14Mguzi chila nkanana ang'ung'uzika kugamba yombe ni kulu,

mna akahalawa ajenda aketogola kugamba kahunguzizwa idiyombe.

15Kuna zahabu na mayuwe ya chumbu yalozize,

mna milomo ikulonga mbuli za umanyi yombe dyakwe ni kulu kujinka ivyo vyose.

16Mntu yoyose akumwikiya zamana mjeni,

guha isuche yakwe itende lahani, kwachausa cha kuliha tigizo dya wajeni.

17Nkande ipatikane kwa udanti imwile,

mna nyumani yatenda saviya msanga mo mlomo.

18Myalo yedi yadamanywa kwa kulafya,

elo ukaunga ugombe nkondo londa ulangilizi.

19Mntu akusezenga hakwika chinyele.

Elo, mwenege mntu akuhonjomoka.

20Akumligita tati yakwe hegu mami yakwe,

ulangazi wo ujima wakwe nauzimwe saviya taa mwe ziza.

21Ulisi ukupatikana vihufu mwe nkongo,

udumo wakwe suwo wedi.

22Use kuliha chikoda mwe wihi udamanyizwe.

Mgoje Zumbe Chohile akwambize.

23Mizani ya kuhimila yo udanti na vihimo vyo udanti,

vihimo sivyo vya chindedi vyamwihiza Zumbe Chohile.

24Nkacho za mntu zalongozwa ni Zumbe Chohile,

vyadahika vivihi mntu adahe kumanya isila yakwe mwenye?

25Fanyanyisa hwinati kumwikiya nazili Zumbe Chohile,

hegu sivyo nyumani wadaha ukunte ukawazagula.

26Seuta mta umanyi kamanya mntu akubalanga,

awakantila hena mbazi.

27Taa ya Zumbe Chohile yazuza loho ya mntu,

yazuza mbuli zose zefisize mndani.

28Wedi no ukanuni wamwika mpeho seuta,

ulongozi wakwe watogezwa kwa sila ya uchindedi.

29Wabwanga weduvila ni izinguvu zawo,

ntunyo yo udalahala ni fi.

30Nkome zikulumiza ni mti ukusa wavu,

milugwa yasunta untu kubula kundani vitendese.