Njelo 19

1Ni vyedi utende mchiwa akwikala wikazi uchumile,

ukaleka mwavu mta milosi ya chihezi.

2Sivyo vyedi mntu akuhikiliza hene akili,

hegu kusunguza kudamanya mbuli na kwaga isila.

3Mntu mhezi anabanikilwa kwa uhezi wakwe,

mna amaya yakwe ayaonyekeza kwa Zumbe Chohile.

4Ugoli wegala wambuya walozize,

mna mntu mchiwa enegwa ni mbuyaye.

5Mlavyanya mbuli zo udanti halekwe kukantilwa,

akulonga lulimi henege kukantilwa.

6Wantu walozize wekomba kwa masekulu,

chila mntu aungisa atende mbuya ywa mntu mta chisekwesekwe.

7Mntu mchiwa enegwa ni walukolo wakwe wose,

wambuyaze nawo wamsumka. Hata akawahembeleza vivihi hawamwive.

8Akupata umanyi aunga untu wakwe,

akutoza umanyi achumilwa.

9Mlavyanya ywa udanti halekwe kukantilwa,

akulonga lulimi nakomwe.

10Havikuwagila mntu mhezi ekale mwe mbwedo,

naho vihisa mtumwa akalongoza masekulu.

11Mta umanyi hakusunguza kwihiwa,

kulekeila wavu kwakwe ni mbwedo.

12Maya ya seuta ni saviya mbumo wa simba,

mna wedi wakwe ni saviya mnyuzu mlanga mwe mani.

13Mwana hezi egala ubanasi kwa tati yakwe.

Mvyele mnkumbizi ni saviya matwentwe ya fula heyekusila.

14Mntu adaha kulisi nyumba na ugoli kulawa kwa welesi wakwe,

mna mvyele mta umanyi alawa kwa Zumbe Chohile.

15Ubwa wahosa ntongo folilo,

mntu mkolo nakunte kwa sala.

16Mntu akwika imiko ya Zumbe Chohile adima ujima wakwe,

mna mta kuibela amalagizo yakwe nabanike.

17Yudya akumwonela mbazi mchiwa amkopesha Zumbe Chohile,

Zumbe Chohile namlihe mwe ivyo adamanye.

18Mfunde mwanawo kwaviya kuchei na msuhi,

mna hunatendile ivyo nohse file yakwe.

19Mntu akusunguza kwihiwa aungwa akantilwe.

Uneva unamlekeila lumwenga vyakunga umlekeile vituhu.

20Utegeleze malangilizo na kuzumila mahinyo,

weye notende na umanyi mo udumo.

21Mwe moyo wa mntu mmema myalo ilozize,

mna vikumuwagila Zumbe Chohile nivyo navidamanyike.

22Chikungwa mwe mntu ni ungi hewikusilai,

ni vyedi kutenda mchiwa ukaleka kutenda mntu mdanti.

23Kumvikila Zumbe Chohile kwegala ujima,

akutenda ivyo enkigwa kuhumula kukuchinta,

hatende na nkunto yoyose

naho hapatwe ni nkunto yoyose.

24Mntu mbwa egala mkono wakwe mwe sahani ya nkande,

mna adunduga kuuvuza ko mlomo wakwe.

25Mtowe mta utilizi,

vinaleke mhezi apate umanyi,

mfunde mta umanyi uyo napate ubala.

26Mntu akumbaila tati yakwe na kumbalaza mami yakwe,

ni mwana akwihiza naho ni mwavu vitendese.

27Mwanagu unaleka kwetegeleza amahinyo,

nowaze udya umanyi uhinile kale.

28Mlavyanya akuhokela fumbaso abela inkanto,

na mlomo wa mwavu walonga udanti.

29Nkanto zikigwa kale kwachausa cha wata utilizi,

milugwa imalanywa kuvyaluta migongo ya wahezi.