Njelo 18

1Mntu akwenega weyawe alonda mbuli zakwe mwenye,

ahiga chila mbuli yedi akwinkigwa.

2Mntu mhezi hakubweda umanyi,

abweda kutambalisa fanyanyi zakwe mwenye.

3Wavu ukeza seivyo weza no ubezi,

hamwenga na soni yeza na kuhuza.

4Milosi ya mntu yadaha kutenda sokwe yo umanyi,

ina mzimilizo saviya bahali,

ni saviya kamto kakujuluzika mazi.

5Sivyo vyedi kumhingiza mntu mwavu,

na kumnyima uwagila mntu achumile.

6Milosi ya mntu mhezi yegala nkumbizi,

icho nalonge chamhosa atoigwe.

7Mlomo wa mntu mhezi wamwaza mwenye,

milosi yakwe ni lufyusa kwakwe mwenye.

8Milosi ya msongagaji ni saviya nkande imwile,

ikusela lumwe kwe inda!

9Mntu mbwa mwe ndima yakwe,

ni saviya mntu akubalanga.

10Zina dya Zumbe Chohile ni ngome itogile,

wata uwagila wasumkila na kutenda mpeho.

11Mgoli afanyanya kugamba ugoli ni ngome yakwe,

afanyanya kugamba ugoli uwo ni chiwambaza chitali chikumdima.

12Wefenyi wa moyo wegala ubanasi,

mna kunyanyahala kwakwinka ntunyo.

13Akuhitula henati kwetegeleza,

uwo ni uhezi wakwe na soni zakwe.

14Fanyanyi za mntu zajijimiza unyonje,

mna moyo ufile chevu ni yuhi akudaha kuujijimiza?

15Moyo wa mntu mta akili wepatila umanyi,

magutwi ya mta ubala yalonda kubungula.

16Jeleko dyamvugwila sila yudya akulavya,

idyo dyadaha kumbuza mntu kulongozi kwa sekulu.

17Mntu ywa nkongo kwigala malaho awoneka ni mchindedi,

kubula hadya mhigani ywakwe nakonge kumlaha.

18Tegatega dyabinda uhigani,

dyalamula wata nguvu wakuhigana.

19Mntu aihizwe ni mdala kutohokwa ukaleka mzi uzungulusizwe chiwambaza,

mahigano ni saviya mihindo ikuvugala nchili ze izingome ze imizi.

20Milosi yedi ya mntu yadaha imwiguse,

kulawana na mbuli zikwelela ekailwa vyedi.

21Milosi ukulonga yadaha kwika ujima hegu kukoma,

yadya ukulonga nayakulaile mwenye.

22Akupata mkaziwe apata chintu chedi,

idyo ni jeleko kulawa kwa Zumbe Chohile.

23Mntu mchiwa alombeza mpalahole,

mna mgoli ahitula kwa ukali.

24Wambuya walozize wadaha wamgwise mntu,

mna kuna wambuya wedi ukaleka walukolo.