Njelo 17

1Ni vyedi kudya mkate unyaile ukatenda mwe utondowazi,

ukaleka mapochopocho mwe nyumba ina nkumbizi.

2Mtumwa mta ubala nalongoze hantu ha mwana hezi akujela soni ywa sekulu,

kwaviya naye napate ulisi mo ulo ulukolo ulo.

3Wedi wa zahabu na mayuwe ya chumbu wahimwa kwa moto,

mna moyo wa mntu wahimwa ni Zumbe Chohile.

4Mntu mwavu etegeleza milosi ihiye,

mntu mdanti etegelezesa milosi yo udanti.

5Akumtila mchiwa amhuluta yudya amumbile,

akwelelwa ubanasi mwe mnyawe henege kukantilwa.

6Wadalahala weduvila wezukulu wawo,

saviya wezukulu wakwefenyeza welesi wawo.

7Milosi yedi sayo ya mazwela mwa mntu mhezi,

seivyo sivyo vyedi chilongozi akalonga udanti.

8Wantu wasiku wafanyanya kugamba fumbaso ni saviya hilizi kwakwe,

icho nadamanye achumilwa.

9Mta kulekeila adima umbuya, mna akukumbusa mbuli zijinkile asopanya wambuya wa hajihi.

10Kanyo dimwenga kwa mta ubala ni dyedi,

ukaleka mhezi akutoigwa nkanana gana.

11Mntu mwavu icho aungisa kuhitukila ukodu,

mna mlosi hena mbazi natumwe kwakwe.

12Ni vyedi udugane na simba fyele ihokigwe wanawe,

ukaleka kudugana na hezi mo uhezi wakwe.

13Uneva mntu akuliha yedi kwa yehiye,

wihi haumlawe mwe inyumba yakwe mpwii.

14Kukonga nkumbizi ni saviya kuponkola langa mwe bwawa dya mazi,

elo leka nkumbizi heinati kukonga.

15Akumlekeila mta masa na kumkantila hena masa,

yose maidi yamwihiya Zumbe Chohile.

16Hela ina loso lwani mwa mntu hezi,

kuno yeye mwenye hana umanyi?

17Mbuya ywa chindedi ni mkanuni mazuwa yose,

mlukolo kelekwa kwachausa cha kukwambiza mwe nkunto.

18Mntu hezi nuyo akudaha kumwikiya mntu mtuhu zamana,

na kumchimaila mnyao.

19Akungisa nkumbizi aungisa masa,

akuzenga chiwambaza ina nchili ntali elondela nkunto.

20Mntu mta moyo mwavu hakuchumilwa,

mta kulonga udanti apatwa ni nkunto.

21Mwana hezi ni chinyulu kwa tati yakwe,

akweleka mwana mhezi hana chinyemi.

22Moyo usangale ni mti,

mna moyo una nkunto wasokeza umwili.

23Mntu mwavu ahokela fumbaso chinyele,

chani azaganye ichindedi.

24Mntu mmanyi mwalo wakwe ni ubala,

mna hezi aunga chila chintu mwe isi.

25Mwana hezi egala chinyulu kwa tati yakwe,

nu usungu kwa mami yakwe.

26Sivyo vyedi kumlihiza mntu hena mlema,

hegu kumtowesa vilongozi wedi kwachausa cho ukanuni wakwe.

27Mntu mta umanyi hakulongesa.

Mntu mta kukombaganya moyo wakwe utondowala.

28Hata mntu mhezi akanyamala awoneka ni mbala,

anagubika mlomo wakwe awoneka ni mta umanyi.