Njelo 16

1Myalo ya mo umoyo ni ya mntu,

mna hitulo dyalawa kwa Zumbe Chohile.

2Sila zose za mntu zawoneka kugamba ni zedi hameso yakwe,

mna Zumbe Choile nuyo akuhima chiya ukufanyanya.

3Mlekele Zumbe Chohile chochose ukudamanya,

nivyo mizungu yako naichume.

4Zumbe Chohile aumbaga chila chintu mwe viya akunga.

Hata wantu wavu kwachausa cha zuwa dya kubalangwa.

5Zumbe Chohile aihizwa vitendese wadya wose wata wefenyi mwe moyo.

Uvimanye kugamba awo hawenege kukantilwa.

6Kwa ungi na ukanuni masa yauswa,

kwa kumvikila Zumbe Chohile mntu enega wavu.

7Zumbe Chohile anawagilwa ni sila za mntu,

zatenda hata awankondo wakwe wekale naye kwa utondowazi.

8Ni vyedi ukatenda na chintu chidodo kwa sila a uwagila,

ukaleka kutenda na ulozo kwa sila ya kubunyanya.

9Mntu amalanya myalo mo umoyo wakwe,

mna Zumbe Chohile nuyo akuonyekeza izinkacho zakwe.

10Mlomo wa seuta alamla kwa nkanto ya Zumbe Chohile,

naho mlomo wakwe haukwazaganya uwagila.

11Vihimo na mizani vya chindedi vyalawa kwa Zumbe Chohile,

mayuwe yose yo kuhimila ye mo mkwiji yadamanywa kwa ndima yakwe.

12Maseuta wehiwa vitendese kudamanya wavu,

kwaviya chegamo cho ulongozi wawo ni uwagila.

13Seuta amungisa mntu akulonga vikuwagila,

elelwa ni mntu akulonga ichindedi.

14Maya ya seuta yahosa file,

mna mntu mta ubala adaha kuyahoza.

15Kwelelwa kwa seuta kwalagisa ujima,

kuhingiza kwakwe ni saviya ingu dikwigala fula mwe idivuli.

16Ni vyedi kupata ubala ukaleka zahabu,

kusagula umanyi ni kwedi ukaleka mayuwe ya chumbu.

17Sila nkulu ya mntu achumile yenega wavu,

akudima isila yakwe adima ujima wakwe.

18Kweduvya kwalongoila ubanasi,

na kwefenya kwalongoila kwita kwe kugwa.

19Ni vyedi kutenda mnyanyahala na kwikala na wachiwa,

ukaleka kupangana vintu vitahigwe ni wata kweduvya.

20Akutimila malangilizo nachumilwe,

naho kajimbikwa yudya akwika msuhi wakwe kwa Zumbe Chohile.

21Mta ubala mo umoyo etangwa mta umanyi,

na ulosi ukuwagila waluvya wantu vitendese.

22Ubala ni sokwe kwa wadya wananawo,

mna uhezi wegala nkanto kwa wadya amahezi.

23Moyo wa mntu mbala wafanyanya henati kulonga,

milosi yakwe yongeza uluvya wantu wahinywe.

24Milosi ikuwagila ni saviya chivuna,

imwile mo umoyo na yahonya umwili.

25Kuna sila ikuwoneka ni yedi kwa mntu,

mna uhelo wakwe walongoza kwe file.

26Nkwina ya nkande yamtintisa mntu adamanye ndima,

kwaviya sala yakwe yamtenda ajendendeleze.

27Mntu mwihi afanyanya wavu,

imilosi yakwe ni saviya moto mkali.

28Mntu mwavu egala nkumbizi,

ntamulizi zo usongagaji zapagula wambuya wa hajihi.

29Mntu nyakwili amdanta mbuyaye,

na kumlongoza mwe sila zihiye.

30Akumkonyeza mnyawe kwa ziso apanga wavu,

akuluma imilomo yakwe afanyanya yehiye.

31Fi ni jeleko dyo ukuka,

zapatikana kwa wikazi uchumile.

32Hekusunguza kwihiwa ni ywedi ukaleka mta nguvu,

mntu mjijimizi awagila ukaleka yudya akutaha umzi.

33Tegatega dyatoigwa kumanya dikunga dilaile,

mna ulamuzi wowose walawa kwa Zumbe Chohile.