Njelo 15

1Kuhitula mpalahole kwahoza maya,

mna ulosi wa ukali wasonga maya.

2Mntu mta ubala atambalisa umanyi,

mna mntu mhezi ehabwanta uhezi.

3Meso ya Zumbe Chohile yawona chila chintu,

ampelemba mntu ywedi hegu mntu ehiye.

4Milosi ihoile ni nkongelo yo ujima,

mna lulimi lwhiye lwabalanga imyoyo.

5Mntu mhezi abela milosi ya tati yakwe,

mna akuzumila malangilizo uyo ana ubala.

6Mnyumba mwa mntu achumile mna ugoli ulozize,

mna upati wa mahezi wasila mwe nkunto.

7Mlomo wa mta ubala watambalisa umanyi,

mna sivyo vili mwe imyoyo ya wahezi.

8Zumbe Chohile ehiwa malavyo ya wantu wehiye,

mna malombezo ya wantu wachumile yamwelela Zumbe Chohile.

9Zumbe Chohile ehiwa wikazi wa wavu,

mna awaunga wadya wakudamanya mbuli zo uwagila.

10Nkanto nkali imwawadya wakuleka lujendwa lwedi,

yoyose akulemela kulangilizwa abanika.

11Uneva Zumbe Chohile kamanya mbuli za kwedibome hedine uhelo na ko Ubanasi,

fanyanyi za mntu zadaha kwefisa zeze kulongozi kwakwe?

12Mta kubela hakunga kufundwa, naho hakulonda ulangilizi kwa wata ubala.

13Moyo wa chinyemi watenda uso usangale,

mna nkunto ya moyo yegala ulumi wa moyo.

14Mntu mbala alonda kuhina,

mna hezi dimema uhezi mo mlomo.

15Mazuwa yose wata kuzilwa wamema nkunto,

mna moyo usangale una chinyemi chikwikalisa.

16Ni vyedi kutenda na vintu vidodo na kumvikila Zumbe Chohile,

ukaleka kutenda na ugoli utendese hamwenga na nkunto.

17Ni vyedi kudya nkande na sunga hantu hana ungi,

ukaleka kudya nyama ya ndama inonile hantu hana maya.

18Mntu mta maya ye hajihi ahosa nkumbizi,

mna mntu mjijimizi avuwaza nkumbizi.

19Sila ya mntu mbwa imema miwa,

mna sila ya mntu achumile ni sila nkulu yangalamke.

20Mwana mbala amwinka chinyemi tati yakwe,

mna mntu mhezi ambela mami yakwe.

21Uhezi ni chinyemi kwa mntu hene akili,

mna mntu mta ubala asagula sila ichumile.

22Mizungu yadundugika kwa kuswesa ulangilizi,

mna kunatenda na walangilizi walozize wachumilwa.

23Mntu apata mbwedo mwe kulavya landulo dikuwagila,

ulosi ukulavigwa chipindi chikungwa ni wedi vitendese!

24Sila za wantu wabala zahinga kulanga kwe ujima,

vileke enege asekwita kwedibome hedine uhelo.

25Zumbe Chohile nabogozole wikazi wa wantu wata kwefenya,

mna nadime ugoli wa mwasigwa abanikilwe ni mgosiwe.

26Zumbe Chohile ehiwa vitendese fanyanyi za mwavu, mna elelwa ni fanyanyi za wadya wachumile.

27Mntu mta tama egaila awantu we ikaya yakwe nkunto,

mna akwihiwa fumbaso nekale.

28Moyo wa mntu achumile wafanyanya henati kuhitula,

mna mlomo wa mntu mhezi wahonjomoka wihi.

29Zumbe Chohile ehale na wantu wavu,

mna eva malombezo ya wantu wachumile.

30Kumunyamunya kwegala kubwedeza,

mbuli zedi zenkiza nguvu umwili.

31Mntu akwetegeleza malangilizo yakwigala ujima,

natende mgati mwa wadya wata ubala.

32Akulemela mahinyo ebela mwenye,

mna akuzumila malangilizo apata kubunkula.

33Kumvikila Zumbe Chohile kwamhinya mntu ubala,

unyanyahala weza hekwinati ntunyo.