Njelo 14

1Mvyele mta ubala azenga inyumba yakwe,

mna mvyele hezi aibogozola kwa mikono yakwe mwenye.

2Mntu achumile amvikila Zumbe Chohile,

mna mwavu ambela Zumbe Chohile.

3Mntu mhezi ahoswa nu mlomo wakwe,

mna mbala adimwa ni milosi yakwe.

4Hehena ng'ombe za kulimila dewa dya mntu dyatenda dibule,

mna ulozo ulozize walawana na ng'ombe za kulimila.

5Mlavyanya ywa chindedi hakulonga udanti,

mna mdanti ehambwanta udanti.

6Mntu mbezi hakudaha kutenda mbala,

mna mbala ahina umanyi vihufu.

7Mwenege mntu mhezi,

kwaviya hana cha kukuhinya.

8Ubala wa mta umanyi wamlagisa isila,

mna wahezi wadantwa nu uhezi wawo wenye.

9Wantu mahezi wasekela masa, mna wantu wachumile waonelwa mbazi ni Zumbe Chohile.

10Mbwedo wako ni wako du, usungu wa moyo wako ni wako mwenye.

Hahana mntu akudaha kwehanga mo mbwedo wako.

11Nyumba ya mntu mwavu neibogozolwe,

mna wikazi wa mntu mbala naudindimazwe.

12Sila ukufanyanya ni yedi,

mna mo uhelo yakwigala kwe file.

13Luseko lwadaha kufisa chinyulu.

Mna mbwedo ukasila usungu wauya ahadya.

14Wantu wavu nawapate viya wakuwagila.

Wantu wedi nawajelekwe mwe yadya wadamanye.

15Mntu mhezi azumila chila chintu nagambilwe,

mna mntu mmanyi anda kufanyanya izinkacho zakwe.

16Wabala wasinyisa naho wenega wavu,

mna wantu mahezi hawakwechinda naho hawakusinyisa.

17Akusunguza kwihiwa adamanya mbuli za kihezi,

mna mntu mpapala wantu waweihiwa.

18Wantu wahezi walisi uhezi,

mna wantu wabala wenkigwa chilemba cha umanyi.

19Wantu wavu nawafike madi kulongozi kwa wantu wachumile,

wantu wehi nawenamize ivinengo vyawo mwe izinyivi za wantu wachumile.

20Mntu mchiwa eihiwa hata ni wambuya wawo,

mna mgoli ana wambuya walozize.

21Akumbela mbuyaye akola masa, mna kajimbikwa mta mbazi kwa mchiwa.

22Akufanyanya mwalo wa kudamanya wavu abalanga,

wakufanyanya mwalo wedi nawatunywe.

23Kuhikiliza mwe chila ndima kwegala chongezeko,

mna ntamulizi izodu zegala uchiwa.

24Wantu wabala wajelekwa ugoli,

mna uhezi wa mahezi weleka uhezi utendese.

25Mlavyanya ywa chindedi akombola ujima,

mna mlonga udanti ni msongagaji.

26Akumvikila Zumbe ana msuhi wedi,

wanawe nawapate hantu hedi ha kusumkila.

27Kumvikila Zumbe Chohile ni sokwe yo ujima,

yamdahiza mntu enege lufyusa lwa file.

28Kutunywa kwa seuta kwalawana na awantu walozize akulongoza,

uneva hana wantu agwiswa.

29Mntu mjijimizi ni Mbala,

mna mntu akusunguza kwihiwa alagisa uhezi ananawo.

30Utondowazi mo moyo wamjimbaza mntu,

mna finju yawoza mavuha.

31Mntu akumbunyanya mchiwa amhuluta Chohile amumbile,

mna akumuwonela mbazi mchiwa amjimbika Chohile.

32Mntu mwavu akomwa ni wavu wakwe,

mna mntu achumile adimwa ni uchumi wakwe.

33Ubala wimwe moyo wa mntu mmanyi,

mna imanyika hata mwe myoyo ya wahezi.

34Uchumi wenula isi,

mna masa ni soni kwa wantu wose mwe isi.

35Seuta awagilwa ni mndima akudamanya yedi,

mna maya yakwe yawagwela wakudamanya yehiye.