Skip to content
BibleKenya

Alkitab Bahasa Wondama

Rasul 4

Petrusi tutir Yohanesi suna vori sandu nana aropo Mahkamah Agama

Nana rabua Petrusi tutir Yohanesi sandu aja sunggavo maso kaiwasa pasia rami, imam pasia tutir siniotu veveru viarama Anio Syen pai tutir siniotu Saduki1 pasia, esia sendama sembaririwi tutir sandu. Sia ma senggasiou mo aso Petrusi e Yohanesi suraniniau kaiwasa pasia vura e sutopan usara Allah dionae Yesus tienam sovera ea nana voru pai pa. E jana oisara nanapi siniotu vevoru pasia nari setenam sovera ea nana Yesus. Apa veveru pasia setapu rasul pa sandu avori setonae susua nana bui pai raropa. Aso diru to manau pa, Petrusi e Yohanesi sunana jana veito raria kausapa pa. Vape kaiwasa viadiawa kavo aniau nana Petrusi tutir Yohanesi e vesanemitiar maso Yesus to manau pa, vare mua vea sepau pa sembe siaran rim.

Nana raria kausapa pa, veveru na Mahkamah Agama pasia, e veveru na Yahudi pasia tutiri siniotu veruin sasavu kavo aniau na Torat pasia senduir nana Yerusalem. Senduir tutir Imam Baba Hanas, kota Kayafas, Yohanesi, Aleksander, tutir kaiwasa vura vevava nana usapui Imam Baba jani. Avori setamias e senggor Petrusi tutir Yohanesi sandu maso aropo sia. Janama setutana sandu e setojo, “Toanetoi vori murono siniotu vemarera pai e pienam pa? Teini diono paja so mandu ave munanari tojana pa?” Janama Petrusi dionu tutir Wainunu Sren pai nana raria jani, kievo maso sia e diojo, “Veveru na kaiwasa Israel e vebaba na Mahkamah Agama pa mia! Raria ninei ma nari mesasera ariri amune sasara pasi aso amunanari pi viate maso siniotu vemarera pai, e metuta maso nandu ave menduini ariri vitopi vediajara e siniotu ninei pienam pa, apavo mia e siniotu Yahudi pasia vura, ave amamo menduina toapa pienam nana Kristus Yesusi siniotu Nazaret pai sano pa, mepai nana aitabat pai to manau. Vape Allah dioni siobatai nana voru pai. Aso nanapi Yesus nie paja pai e siniotu vemarera ninei diadi so pienam e diosa nana aropo mia. Nana Repo pai tiopan tonine,

‘Yesus ni, vieva ariri rovuki menggea pai, nana venanari anio pa mia, mesanemipaja rovuki nei diete va,

vape vevata mo Allah dionae rovuki jasi sivava ariri rovuki retena.’2

Nana Yesus vea, siniotu pasia sesamuai vesie vurusu sene tatar pasi. Aso nana dunia nei vetutira nanapi siniotu pasi vura, varo siniotu vevesie ea vesamuai paja nana Allah ave diono vesie pai maso tata.”

Siniotu venana Mahkamah Agama pasia sesajo e setandor aso Petrusi e Yohanesi sunggavavo tutiri sumatai va, e sia ma senduina rasul ne sandu ma siniotu venana aniose e suraniau va, avori senduin toapa, rasul nine sandu kota ma sunda usara Yesus. Vape sa setinggavo kavo pesa va, aso siniotu vesamuai panam to manau pai andi diosa tutiri Petrusi, Yohanesi sandu na sene aropo pasi. Janama setamiasa rasul pa sandu e susuvi vurusu andiraro Mahkamah Agama pai avori senggavo ariri vitopi sunanari pa, e setojo, “Vitopi nari tananari maso siniotu nine sandu pa? Siniotu vemasoi nana Yerusalem pasia vura senduin to manau toapa sandu sunanari pitandor ve baba ninei. Tata ma kasa taporasa vava ninei va. Vape ave vava nine masiepar rawai ea na rabua siniotu vepau nesia vape moja, vesie pa tatono mataiti e tamu vediora sandu ave amamo sunggavo nanapi Yesus sano pa so esia ea vape moja.” Apa sesau rasul pa sandu e susua sovera ea, e setopan sasara toapa setarandu ave sunggavo pivai suraniniau nana Yesus sano pa ea vape moja. Vape Petrusi e Yohanesi sunduar e surojo, “Vesie pa mia mesanemipai ariria vitopi tindija na aropo Allah: Amunda usara mia te amunda usara Allah nie pareta pai e! Aso kasa amumanau amunggavo ne va nana vitopi matau amuradiawa e amusajora to manau pa.” Manau pa siniotu na Mahkamah Agama pasia sembaro ria ave setono hukuman maso Petrusi tutir Yohanesi sandu. Apa setono mataiti maso rasul pa sandu, avori setavini sandu, aso siniotu vura sesanandik Allah nanapi veveruana to manau pasi. Siniotu vesamuai panam nana pi vio tandori jani nie raria tienam pai riewai nana taun siniotu muandu to manau.

Petrusi e Yohanesi susovera so kuaruvi vesanemitiar pasia

Manau na Petrusi tutir Yohanesi susuvi nana kuaruvi pai pa, susovera maso sune neta pasia e sutopana ariri maso veveru nana imam pasia e veveru na sinitou Yahudi pasia nana kavo senggavora maso sandu pasi. Nanapi sune neta pasia setadiawa pa, sia vura sembe nadi tutir sesanemi siri maso Allah. Sia vura senggavo e setojo, “Syen, au nuenari rora e kakopa nei e rawana pai tutir pi venana pasi vura.3 E Nomu Wainunu Sren pai dionae amatapumi pai Dauti andina Nomu Womi pa, kievo ariri Au e diojo,

‘Aso vitopi siniotu veruin Allah va pasia senggasiou pa;

aso vitopi siniotu Yahudi va pasia setato kavo e setono mataiti so I pa?4

Raja venana dunia nesia setarama ave setono marova,

e veveru pasia sembe siri

e semamu tutiri Syen e Raja vekor vesie pai.’

Vevata mo vava jana diadi to manau, nanapi Raja Herodesi, Gubernur Pontius Pilatusi, surono ruir tutir siniotu veruin Syen va pasia tutir kaiwasa Israel venana bendar ninei. Sia vura senduir e sembe siri ave semamu tutir Yesus, Nomu Womi veve Sren diria to manau pai e ariria vie Raja vekor vesie.5 Sembe siri ave senanari pi saserai ariri nomu sanepaja na papo toapa nari sive diadi. E au kutu nomu paja pai e majar pai. Nana raria ninei, Syen, suejo toane toi avori setono mataiti maso amane. E buono kasau maso nomu womi ne ama, ave amatopana usara nomu Kavo Vesie nei tutir ama matai va. Au buono nomu paja pai ave amamo vepota pasia sepanam, nuenari vava verawai e pitandor nana Yesus sano pa, Nomu Womi veve Sren pai.” Nana sembe nadi to manau pa, uta senduir nana pa manawar. Avori sia vura setonu tutir paja Wainunu Sren pai, e setopanusara Allah nie Kavo pai tutir sematai va.

Siniotu vesanemtiar pasia sembovo pi sesamuai pasi

Siniotu vesanemitiar pasia setenam nana sane siri e sanepaja siri. Sia esi kievo va, toapa vitopi siemuai pa ma niesi mesari vea, vape vitopi sesamuaisi pa ma senesi vura.6 Tutiri paja vebaba, rasul pasia setopanusara Syen Yesus siobatai nana voru pai to manau. Apa Allah diono vesie pai maso sia vura to rawai vesiri. E varo siniotu kota nana rabua sia vene pi vemasi va. Aso sia ma vene kakopa pivai anio, sembovasi avori senggor vait nana kakopa pivai anio sembova pasi e setonasi maso rasul pasia, avori pipi jasi sembovasi maso siniotu vevaro mo pasia.

Toapa jana Yusupi kota viovo nie kakopa pai, avori pipi jasi kiosi e dionasi maso rasul pasia. Yusupi I ma usapui Lewi nana nu Siprus; rasul pasia sesauwi kota nana sano esi pa Barnabas (masi vaveri tutir viono sane vesieni).

Source notes (6)
  1. Footnote Saduki Vepau nana Kuaruvi Saduki i ma veveru nana agama Yahudi, e sia ma sembava ariri imam pasia. Sia ma sesanemitiar vei maso surat rim Musai vui pasi na retena nana aivuire tawa: Kejadian, Keluaran, Imamat, Bilangan, e Ulangan. Sia ma sesanemtiar so siniotu vevoru vura pasia kasa setenam sovera ea va.
  2. Cross-reference Mzm. 118:22
  3. Cross-reference Kel. 20:11; Neh. 9:6; Mzm. 146:6
  4. Cross-reference Mzm. 2:1-2
  5. Cross-reference Mat. 27:1-2; Mrk. 15:1; Luk. 23:1, 7-11; Yoh. 18:28-29
  6. Cross-reference Kis. 2:44-45

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.