Rasul 5

Ananiasi tutir Safirai susanemi siri ave surawi rasul pasia

1Vape siniotu pesi sano pa Ananiasi tutir vinie pa Safirai sumbovo sune kakopa savaru pesa. 2Janama mambesawa ne susanemi siri e suraniwara pipi kakopa savaru pesa. Avori Ananiasi diono pipi jana esa maso rasul pasia. 3Avori Petrusi kievo maso i e diojo, “Ananiasi, buotopi buonae Bilis pai sua nana sane raro pa pa? Mandu ma musasera ria e murawi Wainunu Sren pai tutir muraniwara pipi nana kakopa savaru mumbova pa. 4Aja mumbovo kakopa jana varami pa, kakopa jani ma vata muneu. E mumbovo kakopa pai to manau pa, vait nana kakopa jani ma vata mandu munesi. Murotopi sanepaja vekariria jani suvi nana musanemi raro pa? Mandu ma murawi ama vea va, vape murawi Allah kota!” 5Manau na Ananiasi diediawa kavo jana nana Petrusi pa, tiawa e vioru. Apa kaiwasa viadiawa vava jana sematai vesiri. 6Atuma vavoru pa sembe toi sendama e senduana wominggo pai tutir sis, avori vevoru jani senggori vurusu aniose pa ave setupi na papi pasi.

7Vare oras toru pa, avori Ananiasi vinie pai sua, vape ruin va so vava vitopi tere sawani to manau pa. 8Avori Petrusi kievo maso i e diojo, “Tuopa maso jau, Apavo vevata e mumbovo mune kakopa sawaru pai pa, nie vaiti pa sipau pa nine vura e?” Avori Ananiasi vinie Safirai ruar e diojo, “Vevata mo, nie vaiti pai nine vura.” 9Apa Petrusi kievo maso i e diojo, “Murotopi musanemi siri ave musotour Wainunu Syen pai pa? Ite suejora! Kaiwasa vekor sawamui so papi pasia sesovera e setosa na rature dopo pa to manau. Nari sia senggor au so papi wasi kota.” 10Avori Safirai tiawa na aropo Petrusi ae pasi e vioru. Nanapi atuma vavoru pasia sesua e sesamuai amana vioru to manau, e senggori so papi wasi avori sepiri siwara sawani. 11Avori kuaruvi vesanemitiar maso Yesus pasia e kaiwasa vura setadiawa pi vevediadi maso Ananiasi Safirai sune voru pai pa sematai vesiri.

Allah nienari pitandor pa pau

12Aso rasul pasia senanari pitandor pa pau e vava verawai vesiri sive diadi nana kasau rabua kaiwasa vepau pasia. Apavo siniotu vesanemitiar pasia sesanemi siri e senduir nana Varavu Salomoi na Anio Syen pai. 13E siniotu vevesiei pasia ma sematai sendama senduir tutir siniotu vesanemitiar pasia. Vape kaiwasa vura setatuan rawai maso siniotu vesanemitiar pasia. 14E raria vura ma siniotu vesanemitiar maso Syen pasia sepau riwanea, mua to vavi. 15Apa esia senggor siniotu vepota pasia so ria pai e setono sia e setena nana andiau vavo pa. Senanari ariri vava jana ave siniotu vepota pasia diadi sepanam aso setere Petrusi nie wainunu pai nana rabua ria pa. 16E nana aniose vena siwara bendar Yerusalem pasi kota ma siniotu pa sepau vesiri sendama e senggor siniotu vepota e siniotu vetere wainunu vekariria pasia. Apa sesamuai panam pai.

Veveru na Yahudi pasia setapu rasul pasia

17Avori Imam Baba pai e nie kaiwasa verausara pasia, sia ma kuaruvi Saduki pasia na, sesanemi vesie mo va maso rasul pasia. 18Apa setapu rasul pasia e setonae sesua nana bui pai raropa. 19Vape nana diru pa, Syen nie siniotu rora pesi riama sieva rature bui pai, avori kior rasul pasia e sesuvi vurusu bui pai. Siniotu rora jani kievo maso rasul pasia e diojo, 20“Menda metosa na Anio Syen pai e metopan sasara Syen nie Kavo pai nanapi tenam vavoru ninei so siniotu vura.” 21Rasul pasia sendausara arer na siniotu rora pai e bera vavoru vesiri senda sesua na Anio Syen e setitaniniau nana jana.

Nanapa Imam Baba mo pai tutir nie kaiwasa verausari pasia sendama so Anio Syen, e sesau Mahkamah Agama pai tutir veveru Yahudi pasia, amamo setono ruir pesi. Avori setamias siniotu vera vetopan sasara so siniotu viarama bui pai ave senggor rasul pasia. 22Vape nanapa setamiasa siniotu pasia, sendama so bui pai, amana sesamuai rasul pasia na raropa va, apa sesovera e setopan sasara maso Mahkamah Agama pai, 23setojo, “Nana amanda raso bui pai pa, amasamuai rature pasi sisiori tutir vesie. Siniotu viarama pasia vura asiaja setarama rature dopo pasi, vape amasieva rature pai mana amatisamuai verausara Yesus pesi na raro pa va.” 24Nanapa veveru viarama Anio Syen pai e veveru na imam pasia setadiawa kavo jana pa, sembaro ria maso rasul pasia e sematai aso vitopi nari veruana pa. 25Janama siniotu mua pesi riama kievo e tiopana kavo nine, “Metadiawa! Siniotu metonae vesua na bui pasia setosa e setaniniau siniotu vepau pasia nana Anio Syen pai!” 26Apa siniotu veveru viarama vediora Anio Syen pasia tutir sene siniotu vena dou pasia senda senggor sovera rasul pasia nana Anio Syen pai ea. Vape senggasie rasul pa sandu va, aso sematai kaiwasa pasia senggasiou e seso sia na rovuki pe.

Verausara pasia senana aropo Mahkamah Agama pai

27Senggor rasul pasia sesua nana aropo Mahkamah Agama pai. Avori Imam Baba pai dutan sandu e diojo, 28“Amatarandu mia tutiri karakuai to manau ave metaniniau nana Yesus sano pa ea va. Vape ite mesajo vitopi menanari pa! Janama mene aniau ninei metopanusari nana Yerusalem vetutira, e meto mesop ama aso amambediajara e siniotu jani vioru pa.”1 29Petrusi tutir rasul esi pasia senduar e setojo, “Ama ma amanda usara Allah vea e amanda usara siniotu va. 30Yesusi ma metavakiri nana aitabat pai e memuni, vape Allah tatapumi pai dionae tienam sovera to manau. 31E Allah diono masasoija tutir paja vetariai maso I ave vie pareta ariri Raja Vekor Vesie; ave usapui Israel pasia sesamuai kasau e semanau sene tatar pasi e sesovera so Allah tutir sesamuai ampun. 32E ama ma siniotu vetopanusara nanapi vava jasi vura -- e Wainunu Sren pai tiopanusara vava nine kota maso siniotu pasia. Wainunu jani kota ma Allah dioni maso siniotu vekorusara nie arer pai” 33Nana rabua siniotu na Mahkamah Agama pasia setadiawa usara rasul pasia, apa senggavo to nine, senggasiou mo e seto semun rasul pasia.

34Vape siniotu Farisi pesi nana Mahkamah Agama pai, sano pa Gamaliel. I ma siniotu veruin sasavu kavo aniau na Torat pai e kaiwasa vura setatuani. Gamaliel diosa e diemias maso viarama pasia ave senggor rasul pasia so vorira wa toura. 35Avori kievo maso Mahkamah Agama pasia e diojo, “Kaiwasa Israel pa mia! Mesanemipaja to vesie, nanapi vitopi meto menanari maso siniotu nine sia pa. 36Aso papo pa ma siniotu pesi riama e sano pa Teudasi, kievo e diojo, ‘I ma siniotu veveru nina,’ e siniotu pa sepau vare utin ata senda usari. Janama semuni pa nie verausari pasia semasasiepar e sembe kuaruvi siri ea va. 37Nanapi rabua pareta pai diemias setator kaiwasa pai, siniotu pesi sano pa Yudasi, vieva nana Galilea, Yudasi ninei ma diawi vavera siniotu pa sepau ave sendausari, vape i kota ma semuni, e nie verausari pasia semasasiepar. 38Apavo ikavo maso mia to nine, menanari vava pesa maso siniotu nine sia vape moja, metonae senanaripi vea. Masisi sene aniau e nanaripi nei vieva nana siniotu, e ariria nari sene nanaripi nesi sinai. 39Vape masisi Allah ni diono paja maso sia, mia ma kasa mesoete sia va. E veruana mia ma menggavo pau tutir Allah!” Siniotu na Mahkamah pasia, senggor Gamaliel nie kavo sanepaja pai. 40Apa senggor rasul pasia sesua sovera ea, avori setamias e sendasa sia, janama setarandu rasul pasia setaniniau ea nanapi Yesus sano pa. Manau na jana avori rasul pasia sesuvi.

41Rasul pasia sesuvi nana Mahkamah Agama pai tutir sesanemi vesie, aso Allah ma ruini to manau, vevata mo nari sesamuai sisiajara nanapi Yesus sano pa. 42E raria vura setaniniau vei vea na Anio Syen e nana anio esi pasi e setopan Kavo Vesie nanapi Yesus, aso i ma Raja Vekor Vesie veve arer paina.