Rasul 6

Setiri siniotu pa rim e muandu so nanaripi atapua

1Nana oras jani, siniotu verausara Yesus pasia sepau rawai ea. Apa siniotu Yahudi vekavo kavo Yunani pasia, sesanemi vesie va so siniotu Yahudi vekavo kavo Ibrani pasia. Vekavo kavo Yunani pasia senggavo e setojo, “Amane vavi veve inar nesia ma sesamuai piesa va nana raria vura sembovo pipi so setitapi maso kaiwasa pasia.” 2Apa rasul sura e muandu pasia sesau verausara pasia vura e senggavo maso sia e setojo, “Vesie va so masisi amamanau amatopanusara Allah nie Kavo nei, aso nari amananari ariri amambov pisia pasi pa. 3Apa, vesie pa maneta pa mia, metiri siniotu pa sembe rim e muandu nana rabua mia, siniotu vene tenam viate e vionu tutir Wainunu Sren pai, e veruini ariri sanepaja vetindija, ave amamo nari amandu sasana sia so nanaripi ninei; 4aso amato amambe nadi e amatopanusara Allah nie Kavo nei vea.” 5Kaiwasa pasia vura semajar so rasul pasia setopana sene sanepaja pasi pa. Apa setiri siniotu ninei, Stepanusi, andina siniotu vesanemitiar vesiri maso Yesus e dionu tutir Wainunu Sren pai. Sia kota setiri Pilipusi, Prokhorusi, Nikanori, Timoni, Parmenasi e Nikolausi venana Antiokhia, i ma siniotu Yahudi va, vape sua na agama Yahudi pai to manau. 6Kaiwasa vesanemitiar pasia vura senggor siniotu rim e muandu jasia maso rasul pasia, avori rasul pasia sembe nadi tutiri sia e sepir sembarami pasi na vavo sia. 7Apa Allah nie Kavo Vesie pai dimasiepara, e siniotu verausari pasia sepau rawai ea na Yerusalem. E kota imam Yahudi pasia sepau senda usara e sesanemitiar maso Yesus.

Setapu Stefanusi pa

8Stefanusi ma Allah diono vesie tutiri paja maso i, apa veito nienari pitandor pa pau e vava verawai mo nana kasau rabua siniotu vepau pasia. 9Vape siniotu pa esia ma senggavo vavera tutiri; sia ma siniotu vena anio ari agama Yahudi pasia sesauwa ve Siniotu Libertini1. Jasia ma verama nana Kirene e Aleksandria. Sia tutiri siniotu Yahudi vena Kilikia e Asia pasia senggavo vavera tutir Stefanusi. 10Vape Allah nie Wainunu pai diono sanepaja vetindija maso Stefanusi nie kavo pasi, apa siniotu jasia kasa senggavo vavera tutiri ea va. 11Avori sembaiti manana siniotu pa sembe toi ave setawia e setojo, “Amatadiawa siniotu ninei sisiajara Musai tutiri Allah.” 12Toapa jana, sia setawi vaveri siniotu vepau pasia e veveru nana Yahudi pasia tutiri siniotu veruin sasavu kavo aniau na Torat pasia ave amamo senggasiou. Avori sia vura setapu Stefanusi e senggori raso aropo Mahkamah Agama2 pai. 13E sia kota senggor siniotu vetopana vava veve vata va pai nanapa Stefanusi. Apa siniotu pasia senggavo e setojo, “Siniotu ninei ma tawana kievo sisiajara Anio Syen veve sren pai e sisiajara Allah nie hukum na Torat pasi. 14Amatadiawa Stefanusi kievo to manau e diojo, toapa Yesus andina siniotu Nazaret pai, nari rura Anio Syen e riwan tane buai tawawari Musai tiopana maso tata pasi.” 15Nana rabua siniotu vemasoi na Mahkamah Agama pasia vura setaduata maso Stefanusi pa, sesajo re pasi mana sivava ariri siniotu rora re.