Rasul 7

Stefanusi niavori nana aropo Mahkamah Agama pai

1Imam Baba pai dutan maso Stefanusi e diojo, “Apavo kavo siniotu nesia senggavora nesi vura sive vata e?” 2Stefanusi ruar e diojo, “Jai mia e ine maneta pa mia! Ite metadiawa ikavo ne! Tata pumi pa Abrahami, aja ria so uta Haran varami pa, nana rabua jana andija niana Mesopotamia, Allah vene sasaar visanggapara mo pai riama so i,1 3e kievo e diojo, ‘Vuevu vurusu nomu uta pa e nomu anio raro pai. Ruara so uta nari Jisatuira maso au pa.’ 4Apa Abrahami vievu vurusu siniotu Kasdim pasia sene uta pa, avori ria so Haran. Manau na Abrahami tamani vioru pa, Allah dionae Abrahami riama so uta ninei, uta aniose rabua nine memasoi nana ne. 5Nana rabua jana Allah diono uta savaru katu pesa va maso Abrahami ave nieu. Allah dierer toapa nari dioni maso Abrahami ave nieu tutir nie usapui pasia. Vape rabua jana Abrahami siemuai atuma va.2 6Vape Allah kievo maso i tonine, ‘Nomu usapui pai nari semasoi masisi siniotu wasa na siniotu vevesiei sene uta. Siniotu vena uta jasia nari setonae Abrahami nomu usapui pasia sembe womi maso sia e senanari ariri vava viate mo va maso sia woroi pa taun utin at.3 7Vape nari jono hukuman pai maso siniotu vionae membe womi pasia, e manau na jana nomu usapui pai nari sesuvi nana uta vevesiei jana e nari sesom Jau na uta nine.’ 8Avori Allah diono arer sunat pai maso Abrahami. Apavo Abrahami siemuai atu pai Isaki, vie diadi to manau pa e raria veve rim e toru pai avori Abrahami diono atu pai e vie sunat. Isaki diono atu pai vie sunat andina Yakopi. E Yakopi diono atu sura e muandua pasia sembe sunat, janama sembe tapu maso tata.4

9Tata pumi jasia ma sesanemi pasi siete va maso Yusupi sene madia pai, apa sembovi e vie womi na uta Mesir. Vape Allah nia tutiri Yusupi,5 10E rierai vurusu kariria pasi vura. Allah diono sanepaja vesasie pai tutir veruini ariri sanepaja vetindija maso i nana rabua riama so aropo Firaun, raja Mesir pai pa, veito Firaun siasani e vie gubernur na uta Mesir e vieru nana Firaun nie anio pai. 11Janama vavisi pimasa pesi vie diadi na uta Mesir vura e Kanaan apa veito kaiwasa pasia semarior vesiri. Tata pumi pasia setisamuai pisia setan va. 12Vape nanapa Yakopi diediawa, toapa pisia pasi na uta Mesir pa, diemiasa nie atuma pasia e sia ma tata pumi pasia na avori senda so wana, nine ma retena mo senda so Mesir pana. 13Nana rabua senda vemuandu pa, Yusupi tiopan sasari maso neta vava pasia toapa i ma andina Yusupi. Janama Firaun ruini Yusupi nie anio raro pai kota. 14Janama Yusupi dienatu kavo so tamani, andina Yakopi, ave amamo siau nie anio raro pai vura e sendama semasoi na Mesir. Sia vura sepau pa sembe siniotu toru e vemandi sura e rim. 15Apa Yakopi tutir nie anio raro pai vura sendara so Mesir e semasoi nana jana. Janama Yakopi vioru e tata pumi pasia semboru kota na jana. 16Janama sene usapui pasia senggor sene wominggo pasia sovera so Sikhem e sepi sia na papi Abrahami viori to manau pai nana kaiwasa Hemor pasia na Sikhem. 17Nanapi raria pai vare deriasi pa Allah vieruana arer pai maso Abrahami, apa tane kaiwasa venana Mesir pasia sepau rawai to manau.6 18Vape ineri raja vevesiei pesi vieru nana Mesir. I ma ruin ariri Yusupi va. 19Raja jani ma diawi tane usapui pai e diono marior pai maso tata pumi pasia. I ma diemiase sengge sene atuma vavoru veve diadi pasia ave amamo semboru e kaiwasa pa nari sepau va. 20Nana raria jani Musai vie diadi pa; vie atuma vesasie vesiri na aropo Allah. Tamani tutir siniani surawawati na sune anio pai woroi pa sembai toru, 21Janama sunggei, vape Firaun atu vavi pai kiori, e diewawati ariri matau nie atuma. 22Musai dieniau pi saserai nana siniotu Mesir pasia sene ruina pasi vura e i ma siemuai paja vebaba nana kievo e nienaripi pa.

23Nana raria Musai vie umur taun siniotu muandu pa, nie sanepaja pai suvi na sane raropa ave ria e siejo nie maneta nana kaiwasa Israel pasia. 24Nana raria Musai siejo siniotu Mesir pai diono marior so siniotu Israel pesi pa, Musai kievo vori siniotu Israel pai e riora siniotu Mesir pai veito vioru. 25Musai miemo ma nari nie kaiwasa nesia senduina toapa Allah diono paja maso i ave riera sia vurusu kariria pai na Mesir. Vape veruana senduini va. 26Kausapa pa siejo siniotu Israel pa muandu sumu sandu, apa dio siesera ve dionae sumanau sumu sandu pa, apa kievo e diojo, ‘Mandu ma mambeneta ni mandu. Murotopi mumu mandu pa?’ 27Vape siniotu verora neta nei tiawa irara Musai so dere pa avori kievo maso i e diojo, ‘Teini rusasana au e vueru e kutu kavo maso ama pa? 28Apavo buo mun ja kota, ariri ravine mun siniotu Mesir pai pa e?’ 29Nanapa Musai diediawa siniotu pai kievo pa, mietai e vievu nana Mesir avori niana uta Midian. Na wana ririau apa siemuai atuma mua pa muandu.7

30Musai niana wana taun siniotu muandu to manau, janama siniotu rora pesi riama so i na mapar kurumi vederiasi wi Sinai. Siniotu rora pai riama nana adia veveviar na samue vevesinia aja viana pasi. 31Musai tiendor so siejo vava jana, apa veito ria dieriasi adia pai ave siejo vitoni jana. Avori diediawa raupui nana Syen kievo e diojo, 32‘Ja ma Allah tapumu paina, andina Abrahami, Isak, e Yakopi sene Allah paina.’ Musai mietai e titiat veito diadi so siejo maso adia pai va. 33Avori Syen kievo ea, ‘Tita nomu aeva sor pasi, aso uta buosa nana ne ma uta veve sren pina. 34Isajo ine kaiwasa pasia setere marior na Mesir pasi to manau. Jediawa sene amuaus pasi to manau e nari iviar ave irera sia. Apavo nari jemiasa au e suovera so Mesir.’

35Apa Syen diemiasa Musai. Andi papopa kaiwasa Israel pasia setawa irari pa, tutiri senggavo e setojo, ‘Teini rusasana au ave vueru e kutu kavo maso ama pa?’ Vape Musai ni Allah diemiasi ave vieru e riera sia vurusu kariria pai na Mesir. Apavo Allah diono vava jani nana rabua siniotu rora pai dioisari maso Musai pa nana samue veve sinia viana pasi pa. 36Musai ninei, andi vieru maso kaiwasa Israel pasia e kior sia sesuvi vurusu uta Mesir tutiri nienari pitandor e vava verawai vesiri na uta Mesir, na rawana Vesianggono pai e mapar kurumi pai woroi pa taun siniotu muandu.8 37Musai ninei, andi kievo kota maso kaiwasa Israel pai e diojo, ‘Nari Syen Allah diri nabi pesi, nari rusasani nana rabua matau mia esi, masisi Allah diri ja pa.’9 38Musai ninei, andi nia tutir kaiwasa Israel pasia - andina tata pumi pasia nana aja senana mapar kurumi pai pa. E siniotu rora vepapo pai kievo maso Musai na wi Sinai e tiopanusara Allah nie Kavo pai maso tata pumi pasia. E andi diediawa Allah nie kavo jani viono tenam pai e tiopani maso tata.10 39Vape tata pumi pasia senggorusara Musai kavo tiopana pasi va. E kota setawa irara Musai mesari e sesanemi vesie sesovera so uta Mesir. 40Senggavo maso Harun e setojo, ‘Nuenari karuar vesom pasi maso ama, ave amamo karuar vesom jani vieru maso ama. Aso amanduin ea va to manau vitoni vie diadi tutir Musai vekor ama e amasuvi vurusu uta Mesir pa!’11 41Avori rabua jana senanari karuar pesi vieva ariri sapi atu, janama setono piaum senggutu jani ave setoni ve pi som maso karuar vesom jani e senanari mei ave semajai setisom pi matau senanari pai. 42Apa Allah vievu vurusu sia e tituwa sia e sesom siverere venana rora pasi. Senanari vava jana masi vaveri tutiri vitopi ve aivuire nana nabi pa sene surat pasi, tonine,

‘Kaiwasa Israel pa mia! Mia ma vevata mo menggutu piaum e metonasi ve pisom so ja va

Nanapa menana mapar kurumi pai woroi pa taun siniotu muandu.12

43Menggor karuar Molok nie java pai,

e karuar siverere mesom pai andina Refan,

e mesom mene karuar matau menanari pasi.

Aso toapa jana pa, nari ike mia veito vekasau nana uta Babel.’

44Java pai ma uta Syen Allah riama so siniotu pasi nana paina, niana pa tatapumi pasia nana mapar kurumi pai. Syen Allah matauni diemiasa Musai e, tiopana ariri maso i so nienari java pai pa. I ma dionae miesi tutir Allah nie majar diono maso i pa.13 45Java jani ma tata pumi pasia setoni maso sene tapu pasia e senggori maso kaiwasa ninei na rabua Yosuai vie pareta pa. Avori sia vura setawara tane uta pa nana kaiwasa vevesiei, apa Allah sanepai sia ave setatavar kaiwasa vevesiei jasia nana dopon sia. Janama java jani niana uta ninei veito Dauti vie raja pa. 46Dauti ma diono sane vesieni maso Allah e siau maso i ave siemuai kasau so viaunu anio pesi so i, Allah ni Yakopi siom pai.14 47Vape Salomoi ni viaunu anio pesi so Allah.15 48Vape Allah vetariai mo pai, I ma miesoi nana anio siniotu pa nienari pai va; aso nabi pai vui nana nie surat pai toapa nine,

49Allah kievo tonine, ‘Rora pai ma uta masasoi ive pareta na paina,

e kakopa pai ma uta ae nesi situru na paina,

na uta topina ave Imanau marior?16

50Mesanemipai to vesie mo, ja imesari inanari pi saserai nei vura!’

51Mia ma mendumi pasi sikarakuai vesiri! Nana mesanemi raro pa, memasi tutiri kaiwasa veruini Allah va pasia! Menggambarai metadiawa Allah nie kavo pasi! Memasisi tata pumi pasia, menggambarai menggorusara Wainunu Sren pai tawana!17 52Tata pumi pasia setono marior maso nabi pasia vura. E tata pumi pasia semu Allah nie siniotu diemiasa na papopa pasia e setopana ariria to manau toapa Allah nie womi vetindija pai nari riama. E rabua nine mesiwi maso vemuni pasia e semuni. 53Siniotu rora pasia setopana Allah nie hukum Torat pasi maso mia to manau, vape menggor usarasi va!”

Kaiwasa pa seso Stefanusi nana rovuki veito vioru

54Nana rabua Mahkamah Agama pasia setadiawa kavo Stefanusi kievora pasi vura pa, sesanemi pa siete va e senggasiou vesiri maso i. 55Vape Stefanusi dionu na paja Wainunu Sren pai. Siejo ajai so rora wa e siejo sasaar pimasa visanggapara pai nana Allah. E siejo Yesus diosa na Allah rawa vata pa. 56Avori kievo e diojo, “Mesajora! Isajo rora wai tiesieva e Yesus Atuma Siniotu pai diosa na Allah rawa vata pa!” 57Rabua setadiawa Stefanusi kavo kievora jana pa, setananar e setawan kepana sene taradiau pasi, avori sia vura setapai buri. 58Sepapari so vorira pa na bendar pai, janama sesoi nana rovuki. Kaiwasa vesajo vava jasia setita sene sasu viaroi pasi e sepisi na dopon atuma vavoru vesanomi na Saulusi. 59Nana rabua kaiwasa pasia seso Stefanusi nana rovuki pasi pa, Stefanusi vie nadi e diojo, “Syen Yesus, na varamu pa isiwi ine tenam nei maso au!” 60Avori disa aebu pasi e dienanar tutiri raupui ve baba, “Syen buono tatar ninei maso sia vape moja!” Kievo kavo nine to manau pa vioru.