Rasul 8

1aSaulusi kota miajar so semu Stefanusi to vioru pa.

Saulusi diono marior maso kuaruvi vesanemitiar pasia

1bNana raria jani siniotu Yahudi pasia setono marior maso kuaruvi vesanemitiar venana Yerusalem pasia, tutiri vava vekariria vesiri, apa veito siniotu vesanemitiar pasia semasasiepar so uta Yudea vura e Samaria, vape rasul pasia ma sena vei na Yerusalem. 2Siniotu vesom Allah pasia senggor Stefanusi nie wominggo pai e sepiri nana papi pasi e sesaisi tutiri raupui vebaba vesiri. 3Vape Saulusi siesera kuaruvi vesanemitiar pasia vei vea ave amamo diono kariria maso sia. Sua e suvi nana anio pasi e piapara kuaruvi vesanemitiar pasia, avori dionae sesua nana bui pai.1

Kavo Vesie nana Allah setopanusari na Samaria

4Kaiwasa vesanemitiar jasia semasasiepar e setopanusara Kavo Vesie so uta vura. 5Pilipusi ria so bendar pesi na Samaria e tiopanusara maso kaiwasa venana jasia nanapa Raja Vekor Vesie Allah dierera pai. 6Nanapa kaiwasa pa setadiawa Pilipusi kievo pa e setisajo pitandor nienari pasi pa, sepau sendausara ariri vitopi Pilipusi kievora pa. 7Aso wainunu vekariria pasi sisuvi tutir sienanar nana siniotu vepau vetere wainunu vekariria pasia to manau. Siniotu vemarera e veraimi kapau pa sepau sesamuai panam kota. 8Apa kaiwasa venana bendar pa sesanemi pa siete vesiri. 9Na bendar jani siniotu pesi sano pa Simoni, dionae siniotu Samaria pa setandor vesiri so nie airawi rut pasi woroi to manau. Kievo maso kaiwasa pai e diojo i ma riewai vesiri. 10Apa kaiwasa venana bendar Samaria pasia vura, katu to baba sendausari e setojo, “Siniotu ninei ma siemuai Allah nie paja pai sesau kota na Paja Vebaba.” 11Apa sendausari, aso woroi vesiri dionae siniotu pasia setandor ariri nie airawi rut pasi. 12Vape Pilipusi tiopanusara Kavo Vesie nanapa Allah nari vie pareta ariri raja e nanapi Yesus Kristusi, Raja Vekor Vesie jani. Apa sesanemitiar maso Pilipusi kavo tiopana pasi, avori diono kambu masi maso mua e vavi pasia. 13Simoni miesari kota sanetiar e siemuai kambu masi. Manau pa tawana ria usara Pilipusi. Apavo Simoni kievo usara vesiri aso siejo pitandor vebaba Pilipusi nienari pasi pa,

14Nanapa rasul venana Yerusalem pasia setadiawa siniotu Samaria pa senggorusara Allah nie Kavo Pilipusi tiopana pasi, apa setamiasa Petrusi tutir Yohanesi sunda so wana. 15Nanapa Petrusi tutiri Yohanesi sundama to manau pa, sumbe nadi so siniotu Samaria pasia ave amamo sesamuai Wainunu Sren pai. 16Aso Wainunu Sren pai riama sua nana sia esi varami, aso Siniotu vesanemitiar jasia sesamuai kambu masi nana Syen Yesus sano pa pa vea. 17Avori Petrusi tutiri Yohanesi supir sumbarami pasi ajai so siniotu pasia avori sesamuai Wainunu Sren pai. 18Nanapa Simoni siejo rasul pa sandu supir sumbarami pa ajai so siniotu jasia pa, Allah diono Wainunu Sren pai maso sia. Toapa jana Simoni kior pipi maso Petrusi tutiri Yohanesi sandu, 19avori kievo e diojo, “Murono paja jani kota maso jau ave nanapa ipir vara ne so siniotu teinina vea, amamo siniotu jani nari siemuai Wainunu Sren pai.” 20Vape Petrusi ruar maso i e diojo, “Kariria pai maso au tutiri nomu pipi pasi! Aso au ma muemo buojo Allah nie paja diona nei ma diadi so vuori na pipi e? 21Au ma sa kuoto ama nana amane nanaripi ninei va, aso nomu sane raro pai tindi va na aropo Allah. 22Toapa jana muenau nomu tatar pasi e sovera so Allah, e vuenadi maso Syen ave vie ampun au nana nomu sanepaja vekariria jani! 23Aso iruina sane kariria pai dionu na sanemu pa to manau, e dionae vue womi so nganggau pai.” 24Avori Simoni ruar maso sandu e diojo, “Mumbe nadi maso Syen, ave amamo kavo munggavora pasi vura sive diadi maso jau vape moja.”

25Manau na Petrusi tutir Yohanesi sandu sutopana vitopi susajo Yesus nienari pa e sutopan usara Syen nie Kavo pai, avori rasul pa sandu susovera so Yerusalem. E nana rara pai, sundatu aniose pa pau nana bendar Samaria e sutopan usara Kavo Vesie pai maso kaiwasa pasia.

Pilipusi dieniniau siniotu Etiopia pai

26Syen nie siniotu rora pesi kievo maso Pilipusi e diojo, “Buatau e ruara so rawa wanamarai pai so ria veviar na Yerusalem so Gaza pai. Ria jani ma sieja.” 27-28Apa Pilipusi ria kota. Nana raria jani siejo siniotu veve baba na Etiopia pesi, andija niana nie rara pai e vievu sovera so nie uta pa. Siniotu jani ma siniotu veve baba so veruara pi saserai vura nana Kandake, andina raja vavi na uta Etiopia. Siniotu jani ria so Yerusalem to manau, ave amamo vie ari maso Allah e nine ma siovera tutir nie kereta pai. Andija miesoi nana nie kereta pai e diapa aivuire nana repo nabi Yesayai. 29Avori Wainunu Sren pai kievo maso Pilipusi e diojo, “Rua so wana e bueriasi kereta pai.” 30Apavo Pilipusi ria dieriasi kereta pai, avori diediawa siniotu jani diapa aivuire nana repo Nabi Yesayai. Pilipusi duta maso i e diojo, “Avo Tuani ruini kavo vitopi buapa pa e?” 31Siniotu veve baba jani na Etiopia ruar e diojo, “Masisi varo vetopan ariri so jau, toanetoi avori iruina? Avori siau Pilipusi siajai so kereta pai e miesoi tutiri. 32Ayat diapa nana Repo pasi,

I ma miesisi domba senggor e senggutu avori setoni ve pisom,

e miesisi domba atu vevaro raupui nanapi senggutu ruvavuru pasi pa,

toapa jana sivu sore pa va, e kievo kavo pesa va.2

33I ma sesisiajari e setono kariria vetindija va.

Esi sa tiopanusara ariri nie usapui pai va,

Aso semuni e niai nana dunia nei.”

34Apa veve baba na Etiopia jani kievo maso Pilipusi e dioja, “Ite tuopa ariri maso jau, nabi jani ma kievo nanapi teinina? Kievo nanapi matauni te, siniotu vevesie?” 35Apa retena pa Pilipusi kievavo nana ayat jani e tiopana Kavo Vesie nana Yesus maso i. 36Nana aja sene rara pai, sendama so uta veve maria pesa. Veve baba na Etiopia jani kievo e diojo, “Suejo maria pai wana, vitopi aja masi va ave vue masi ja?” [37Pilipusi kievo e diojo, “Masisi Tuan sanetiar tutiri sane vetutira, diadi so suemuai kambu masi.” Apa siniotu veve baba verama na Etiopia ruar e diojo pai. “Ja ma isanemitiar Yesus Kristus I ma Allah Atu paina.”] 38Janama diemias nie vesuru kereta pai e mienau eta. Avori Pilipusi tutiri siniotu veve baba jani sumbiar avav so maria raropa, janama Pilipusi diono kambu masi so siniotu veve baba na Etiopia pai. 39Avori susuvi nana maria pai, worabua vae Wainunu Allah kior Pilipusi vurusu uta jana, e siniotu veve baba vetaria vera nana Etiopia jani disajori ea va. Apa ria nie rara pai tutir sane vesasie. 40Vape sawawara e Pilipusi niana bendar Asdod to manau. Nanapa rara pai, riatu uta jasi e tiopana Kavo Vesie nanapa Yesus maso kaiwasa venana bendar pasi vura veito riama so Kaisarea.