Rasul 9

Saulusi mienau nie tatar pasi

1Vape Saulusi mienau va so siesera e dio mataiti e mun verausara Yesus pasia, ria maso Imam Baba pai na Yerusalem.1 2Saulusi siau surat viono sanetiar maso i ave kiori e ria so veveru na anio ari Agama Yahudi venana bendar Damsyik pai, ave masisi siemuai mua tutiri vavi vesanemitiar maso Syen Yesus pasia, nari tiepu sia e kior sia so Yerusalem.

3Nana rabua Saulusi ria so Damsyik pa, dieriaisi bendar pai to manau, worabua va e tiendoro sasaar pesi nana rora wa disambiara wawariri. 4Apa Saulusi tiawa so kakopa pa avori diediawa raupui pesa maso i, kievo e diojo, “Saulusi, Saulusi! Buotopi buono marior pai so Ja pa?” 5Saulusi duta e diojo, “Teini au, Syen?” Raupui pa ruar maso i e diojo, “Ja ma Yesus buono marior soa paina. 6Vape raria ninei buatau e ruara so bendar pai. Na jana nari esi riama tiopa maso au vitopi nari nuenari pa.” 7Kaiwasa vera tutir Saulusi pasia setandor veito senggavo va, aso setadiawa raupui jana pa, vape setisajo siniotu pesi va kota. 8Avori Saulusi biatai e diosa, e sivu re pasi, vape siejo piesa va. Apa senduti nana vara pa e setadidini so bendar Damsyik. 9Woroi pa raria toru ma siejo va e raria jasi ma diapi e dunu va kota.

10Nana bendar Damsyik pa, siniotu verausara Yesus pesi sano pa Ananiasi. Nana nie sajajo pesi, Syen kievo maso i e diojo, “Ananiasi!” Apa Ananiasi ruar e diojo, “Ja nine, Syen.” 11Syen kievo maso i e diojo, “Buosa e ruara so ria vesanomi na Ria Vetindija pai, suesera Yudasi nie anio pai e buta na siniotu vesanomi na Saulusi vieva nana bendar Tarsus, andija vie nadi, 12e nana nie sajajo pai siejo au, Ananiasi ruama so i e pir varamu pasi ajai so Saulusi ave diadi siejo ea.” 13Ananiasi ruar e diojo, “Syen, jediawa siniotu pa sepau senggavo nana siniotu ninei to manau, i ma nienari kariria maso nomu kaiwasa venana Yerusalem pasia. 14E riama so nine tutir surat viono sanetiar kior nana Imam veveru pasia ave tiepu kaiwasa vesanemitiar maso Au pasia.”

15Vape Syen kievo maso Ananiasi, e diojo, “Rua vea! Aso siniotu ninei ma jiri to manau ave nienaripi maso Jau, ave tuopanusara sano ne maso kaiwasa vevesiei e siniotu Yahudi va pasia kota e maso raja, tutir kaiwasa Israel pasia. 16E nari imesari joisara maso i, marior vepau nari siemuai pasi aso sano ne.”

17Apa Ananiasi ria so Yudasi nie anio pai ave siemuai Saulusi. Apa pir vara pasi ajai so Saulusi, kievo e diojo, “Saulusi, ine maneta panau, Syen Yesus veveruana so au to manau pai nana nomu rara pasi so nine pa, Andi diemiasa jau ave amamo diadi so suejo ea e buonu nana Wainunu Sren pai.” 18Nana raria jani kota piesi miesisi dia nuna e tieisu nana Saulusi re pasi e siejo ea. Apa biatai, avori siemuai kambu masi. 19aE Saulusi diapi to manau pa, piaja sovera ea.

Saulusi dieniniau na Damsyik

19bSaulusi miesoi raria pa toi tutiri kaiwasa verausara Yesus venana Damsyik pasia. 20Saulusi ria so anio ari agama Yahudi pasi e tiopan sasara toapa, “Yesus i ma Allah Atu paina.”

21Siniotu viadiawa Saulusi kievo pasia vura senggavo usara e setojo, “Siniotu ninei na Yerusalem, andi mu siniotu vesanemitiar maso Yesus pasia to manau, te pivai e? Riama so nine ave tiepu sia e kior sia maso Imam veveru pasia!”

22Vape Saulusi piaja rawai nana nie kavavo pasi e pi veveruana tiopana nanapa Yesus pai, i ma Raja Vekor Vesie paina, veito siniotu Yahudi venana Damsyik pasia senggavo pau ea va.

23Manau na raria pa toi, siniotu Yahudi venana Damsyik pasia setato kavo ave semun Saulusi.2 24Vape Saulusi ruini sene sanepaja vekariria jani to manau. Diru sasaar ma siniotu Yahudi pasia setarama rature bendar pasi vura, ave diadi so semuni. 25Apa nana diru pesi ma, siniotu verausara Saulusi pasia senggori, avori setuwi nana pitina pai rawaini tembok bendar pai.

Saulusi niana Yerusalem

26Saulusi ria so Yerusalem, e na wana i ma siesera ave kioto e ruir tutiri verausara Yesus pasia. Vape semataiti, aso sia ma sesanemitiari va toapa vevata mo i ma ria usara Yesus to manau. 27Janama Barnabasi sanetiar maso Saulusi, avori kiori so rasul pasia. Barnabasi tiopanusara maso sia nana Saulusi siejo Syen nana nie rara pai so Damsyik pa e Syen kievo so i pa. Barnabasi kota tiopanusara Saulusi mietai va e dieniniau nana Syen Yesus sano pa, nana Damsyik pa. 28Apa Saulusi miesoi tutir sia na Yerusalem e tiopan usari tutiri mietai va nana Syen Yesus sano pa. 29Saulusi kota ma kievo pau tutir siniotu Yahudi vekavo kavo Yunani pasia, vape sia ma sesasera ria ave semuni. 30Nanapa siniotu venana kuaruvi vesanemitiar pa esia senduin vava jana, senggor Saulusi so Kaisarea, avori setanatui so Tarsus.

31Mae kuaruvi vesanemitiar na Yudea vura e Galilea, tutir Samaria setenam tutir mari pai nana adidina na Allah. Sia ma setenam tutir setatuan Syen Yesus, e Wainunu Sren pai tawana diono paja maso sia, veito sepau ea.

Petrusi niana bendar Lida e Yope

32Nana raria jani, Petrusi ria wawariri uta pasi vura, e ria siejo kaiwasa vesanemitiar venana Lida pasia. 33Na wana siemuai siniotu pesi, sano pa Eneas, i ma mierera e biatai va nana uta dienana pa woroi pa taun rim e toru. 34Petrusi kievo maso i e diojo, “Eneas, Yesus Kristusi dionae puenam. Suobatau e pir ariri uta buena nana pai.” Nana oras jani kota Eneas siobatai. 35Siniotu venana Lida e sasi dere Saron pasia vura sesajo Eneas siemuai panam to manau pa, avori sia vura sesanemtiar maso Allah.

36Na bendar Yope, vavi pesi sano pa Tabita. Siniotu ninei ma vavi vesanemitiar maso Syen Yesus to manau pa esi nina (Nana kavo Yunani Dorkasi amamo rusa.) Vavi jani tawana nienari vava vesie maso siniotu pasia e sanepai siniotu vevaro pi pasia. 37Nana rabua jana piota to vioru. Avori siniotu pasia sesoivi wominggo pai e sepiri na andiraro venana vavo pai. 38Yope tutiri Lida ma sumbe kasau va. Nana rabua verausara Yesus na Yope setadiawa Petrusi niana Lida pa, setamiasa siniotu pa muandu sunda maso Petrusi tutir arer ninei e surojo, “Sawawara e ruama so nine.” 39Apa Petrusi sawawara e biatai e ria usara sia. Riara so wana to manau pa, senggori so andiraro venana vavo pai. Inar vena jasia vura sesorum Petrusi e sesai avori setoisara avavar pasi e sasu vorira viaroi Dorkasi diawar pasi maso i nana aja tienam pa. 40Petrusi diemiasa sia vura sesuvi, avori disa aebu pa sandu e vie nadi. Manau pa siejo maso wominggo pai avori kievo e diojo, “Tabita, suobatau!” Apa Dorkasi sivu re pasi, e nanapa siejo Petrusi pa siobatai e miesoi. 41Avori Petrusi rut na vara pa e diedidini e diosa. Janama Petrusi siau siniotu vesanemitiar vena jasia tutir inar pasia, avori diono Dorkasi vetenam to manau pai maso sia. 42Raupui nana vava veve diadi jani miesiepar so Yope vura, apa sepau sesanemitiar maso Yesus, Andina Raja vekor Vesie pai. 43Janama Petrusi miesoi raria pa toi, nana Yope tutir siniotu venanari piaum rawa pai nie anio pai, sano pa Simoni.