Skip to content
BibleKenya

Alkitab Bahasa Wondama

Rasul 10

Petrusi tutir Kornelius

Na Kaisarea siniotu pesi sano pa Korneliusi. I ma vieru maso veveru nana verut pimamuna viosa usari pasia e sepau pa sembe utin siri, sesau ve Rai Italia. Korneliusi ma siniotu viate nina tutir mietai maso Allah, e nie anio raro pai vura ma sesom maso Allah. I ma pau vesiri diono sanepaja maso siniotu Yahudi vevaro pi pasia, e tawana vie nadi maso Allah. Nana raria pesi pa vare oras toru ravinena, siejo subata sajajo pesi toapa Allah nie siniotu rora pai riama so i e siau, “Korneliusi!”

Korneliusi dieduata siniotu rora pai tutiri mietai avori duta e diojo, “Tuan, vitoi nina?”

Siniotu rora pai ruar e diojo, “Allah diediawa nomu nadi pai e siejo nomu vesie nuenari so siniotu vevaro pi pasia e Allah sanepai au to manau. Raria ninei buemiasa siniotu pa toi sendara so Yope ave sesau Simoni vesanomi kota na Petrusi. I ma aja miesoi na siniotu venanari piaum rawa pai nie anio pai. Sano pa Simoni kota, e nie anio pai ma niana sasi dere pa.”

Manau na siniotu rora vekavo tutiri Korneliusi pai ria pa, Korneliusi siau nie womi pa muandu tutir matauni nie siniotu verut pimamuna vesom Allah pesi. Korneliusi tiopanusara maso sia vitopi veruana to manau pa, janama diemiasa sia e senda so Yope.

Raria kausapa pa, aja senana rara pai e vare sederiaisi bendar Yope, Petrusi siajai so anio vavopa ave vie nadi, vare raria rabua. Avori vievisi vesiri e dio diapi. Vape siniotu venana Simoni venanari piaum rawa pai nie anio pasia, sembe masis pisia pasi pa, worabua vae Petrusi siejo sajajo pesi. Siejo rora pai tiesieva e piesi miesisi sis vesababeri viar nana rora wa mesu so kakopa ne. Sis jani dievakir nana samabu ata pasi. Nanapa sis pai raro pa piaum veraemi ata saserai pa vura asija, piaum vesavaja e aja saserai vura. Avori raupui pesi kievo maso i e diojo, “Petrusi, buosa! Kutusi e buasi.”

Vape Petrusi kievo e diojo, “Piva, Syen! Ja ma aja jan pisia bueranduna e veve rariai varami ariri pareta agama pai.” Vape raupui jani kievo ea maso i e diojo, “Pi vitopi Allah diojo ve pi vesie to manau pa, buojo ve pi viomadidi ea vape moja.” Vava jani vieruana ve toru vesiri, janama sis jani tiesiasa so rora wa.

Petrusi sane vavera so vitoni Allah dieniawi nana sajajo pai pa, siniotu Korneliusi diemiasa nesia sendama sesamuai Simoni nie anio pai to manau e setosa nana dopo rature pai. Avori setoru sesau siniotu pesi e setutani e setojo, “Avo siniotu vesanomi na Simoni Petrusi, niana nine e?”

E nana aja Petrusi sanepai usara sajajo jani, Wainunu Sren pai kievo maso i e diojo, “Petrusi, siniotu pa sembe toru sesasera au. Suobata au, sawawara e vuar avav e sane vavera vape moja e rua usara sia, aso Ja jemiasa sia.” Janama Petrusi viar avav e kievo maso siniotu jasia e diojo, “Siniotu mesasera pa ja nine. Mendama so vitoi?”

Siniotu jasia senduar e setojo, “Kornelius veveru nana verut pimamuna viosa usari Romawi pai, diemiasa ama so nine. I ma siniotu viate nina tutir mietai maso Allah, e siniotu Yahudi pasia vura setatuani. Allah nie siniotu rora pesi diemias e siau Petrusi au, rua so nie anio pai, ave diediawa aniau nari tuopana pasi.” Apa Petrusi dionae sesua nana anio pai e setena na diru jani.

Kausapa pa Petrusi siobatai e ria tutiri sia. Kaiwasa vesanemitiar nana Yope pa esia senda usari kota. E nana raria vesousara pai pa sendara so Kaisarea. Na wana Korneliusi dienota sia e ruir raruo pasia tutiri nie neta pasia na nie anio pai to manau. Nanapa Petrusi riama pa, Korneliusi ria vediori e disa aebu pa e tietuani na aropo pa. Vape Petrusi diedidini e diosa, avori kievo e diojo, “Buatau e buosa! Imesari ma siniotu ni ja kota.” E aja kievo tutiri Korneliusi pa, Petrusi suapui so anio pai. Na jana siejo siniotu pa sepau senduir sia to manau. Avori kievo maso sia e diojo, “Menduini to manau toapa, nanapi agama Yahudi nei dierandu siniotu Yahudi pesi vie maneta tutiri siniotu Yahudi va pasia e ria so sene anio pasi kota. Vape Allah dioisara maso jau to manau toapa kasa jetor siniotu pesi ariri pi dio madidi e pi verariai va. . Toapa jana, nana rabua Korneliusi suau jau so nine pa imajar so irama. Apa raria ninei, jo juta, aso vitopi suau ja pa?”

Korneliusi ruar e diojo, “Raria ata ve papo pasi, aja ive nadi na anio nei, nana raria vemasi ariri raria ninei andina oras toru ravinena. Worabua vae siniotu pesi diosa na dopon jau tutiri nie sasu pai disanggapara vesiri. Avori kievo e diojo, ‘Korneliusi! Allah diediawa nomu nadi pai e siejo nomu vesie nuenari so siniotu vevaro pi pasia to manau. Apavo buemiasa siniotu pa sembe toi so Yope ave sesau siniotu vesanomi na Simoni Petrusi, andia miesoi nana Simoni venanari piaum rawa pai, nie anio pai nana sasi dere pa.’ Apavo sawawara e jemias siniotu e sendamatu sesau Tuan au. E Tuan sane vesie so ruama ne. Raria ninei amanduir to manau na dopon Allah ave amatadiawa vura kavo vitosi Allah diemiasa au e tuopana so ama pa.”

Avori Petrusi kievo e diojo, “Raria ninei iruin vevata mo toapa, Allah dionae tamasi vaveri vura.1 Kaiwasa nana topina kota, sematai e senanaripi vevata, siniotu jasia ma Allah sane vesie kior sia. Mia ma metadiawa toapa Allah tiopa maso kaiwasa Yahudi pasia to manau. Raupui nine ma Kavo Vesie nanapi mari ma vesie pai nana Yesus Kristusi andina Syen maso kaiwasa vura. E mia ma menduin to manau vitopi nienari na Yudea vetutira pa. I ma ria nanaripi pai retena nana uta Galilea, manau na Yohanesi tiopa sasara toapa siniotu pasia sesamuai kambu masi veruana toapa sesovera nana sene tatar pasi. Apavo mia menduina toapa, Allah diri Yesus siniotu Nazaret pai to manau tutiri diono Wainunu Sren pai e paja pai, avori Yesus ria so topina vea e nienari vava viate e diono panam maso siniotu vetere Bilis pai, aso Allah tutiri. E amasajo na amandemi nesi to manau nanapa pi Yesus nienari pasi na uta Yudea e Yerusalem. Avori siniotu Yahudi pasia semuni e sepai nana aitabat pai. Vape nana raria veve toru pai, Allah dionae tienam sovera ea na voru pai, avori Allah dionae Yesus vieruani maso siniotu pasia. Siniotu pasia vura sesajori va, vape maso siniotu Allah diria pasia vea sesajori to manau, ave amamo sembe saksi maso i, saksi nine ama amatapi e amatunu tutiri to manau nana tienam sovera nana voru pai pa. E Yesus andi diemias ama ave amatopanusara Kavo Vesie pai maso kaiwasa vura e amatopa veruani toapa Allah siasana Yesus ave andi Kutu Kavo maso kaiwasa aja ve tenam pasia e kaiwasa vevoru to manau pasia. Nabi pasia vura senggavavo nanapi Yesus. Senggavo toapa siniotu vesanemitiar maso Yesus pasia, nari sesamuai ampun nana sene tatar pasi nana Yesus sano pa.”

Siniotu Yahudi va pasia sesamuai Allah nie Wainunu pai

Nanapi rabua Petrusi andia kievo rami, Wainunu Sren pai viar e sua na siniotu viadiawa raupui pasia vura e diono paja maso sia. Siniotu Yahudi vesanemitiar Yesus e verausara Petrusi nana Yope pasia vura setandor, aso sesajo Allah diono Wainunu Sren pai kota maso siniotu Yahudi va pasia. Aso setadiawa siniotu jasia senggavavo nana kavo saserai e sesanandiki Allah. Avori Petrusi kievo e diojo, “Ite suejo, siniotu nine sia ma sesamuai Wainunu Sren pai to manau ariri tata. Apavo kasa siniotu sembedioro tata va ave tatono kambu masi maso sia!” Apa Petrusi diemiase sesamuai kambu masi nana Yesus Kristus sano pa. Manau pa sesau ave Petrusi nia tutiri sia raria pa toi ea.

Source notes (1)
  1. Cross-reference Ul. 10:17

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.