Alkitab Bahasa Wondama
Rasul 11
Petrusi siovera so Yerusalem
Rasul pasia tutir kaiwasa vesanemitiar vena uta Yudea pasia setadiawa toapa siniotu Yahudi va pasia kota senggorusara Allah nie Kavo pai to manau. Janama Petrusi ria so Yerusalem pa, siniotu Yahudi vesanemitiar to manau pasia, senggavo vavera tutir Petrusi. Sia ma senggavo e setojo, “Au rua e sua so siniotu aja veve sunat varami pasia sene anio pasi e buapi tutiri sia kota!” Janama Petrusi tiopan sasara maso sia vura nanapi vava veve diadi nana retena pa veito vemanau pai.
Petrusi kievo e diojo, “Raria jani, ive nadi rami na bendar Yope, apa isamuai sajajo. Isajo piesi masisi sis vesababeri dievakir nana samabu ata pasi viar na rora wa mesu, avori sis jani viar ariri dopon inana pa. Nana rabua isajo raso rarowa pa, isajo piaum veraimi ata pasi, piaum viaum va, piaum vesavaja e aja saserai. Avori jediawa raupui pesi kievo maso jau e diojo, ‘Petrusi suobatau! Kutusi e buasi!’ Vape iruar e jojo, ‘Piva, Syen! Ja ma aja jan pi bueranduna pesa e veve rariai varami ariri pareta agama pai.’ Vape raupui jani kievo ea maso jau e diojo, ‘Pi vitopi Allah diojo ve pi vesie to manau pa, buojo ve pi viomadidi ea vape moja.’ Isajo vava nine vetoru vesiri, janama sis pai tiesiasa sovera ea so rora wa. E nana oras jani kota, diemiasa siniotu pa sembe toru nana Kaisarea, sendama so jau, na uta inana pa. Avori Wainunu Sren pai diemias jau ave ira usara sia tutiri sane sasera va. Mambeneta rim e siri1 nine sia kota, senda tutiri jau so Kaisarea, e ama sua vura so Korneliusi nie anio pai. Janama Korneliusi tiopanusara maso ama nanapi siniotu rora pai vieruani e diosa na nie anio pai. Siniotu rora pai kievo e diojo, ‘Buemias siniotu pa sembe toi so bendar Yope ave senggor Simoni vesanomi kota na Petrusi pai. I ma nari kievo maso au, e kavo tiopana pa nari kior vesie maso au e siniotu vemasoi na nomu anio pasia vura.’ Nana retena jinggavora pa, Wainunu Sren pai viar ajai so sia, masi vaveri tutir viar maso tata nana retena pa. Avori isanempai, Syen kievo pa, ‘Yohanesi vie masi mia tutiri kambu, vape mia ma nari mesamuai kambu masi nana Wainunu Sren pai.’2 Apavo masisi Allah diono nie sanepaja pai maso siniotu Yahudi va pasia, masi tutiri diono maso tata pa nana retana tasanemitiar maso Syen Yesus Kristusi pa. Apa, toanetoi so jo itawa irara Allah pa?” Manau na setadiawa kavo Petrusi tiopan pasi pa, senggavo pau ea va. Avori sesanandiki Allah e setojo, “Toapa jana, siniotu Yahudi va pasia sesamuai kasau nana Allah ave amamo sesovera sesanemi nana sene tatar pasi e sesamuai tenam viaworoi pai kota!”
Kavo Vesie pai riama so bendar Antiokhia
Manau na semun Stepanusi pa, sepaduar siniotu vesanemtiar maso Yesus pasia, apa semasasiepar so topina vea. Esia sendara so Finisia, e esia kota sendara so nu Siprus e Antiokhia. Setopana Kavo Vesie pai nana Allah vea maso siniotu Yahudi pasia.3 Vape siniotu pa sembe toi nana rabua sia sembava nana nu Siprus e Kirene, sendama so Antiokhia pa. Senggavo tutiri siniotu Yahudi va pasia kota ave setopana Kavo Vesie pai nanapi Syen Yesus. E Syen nie paja pai andia tutir sia, apa veito siniotu vepau pasia sesanemitiar e senda usara Syen.
Kuaruvi vesanemitiar venana Yerusalem pasia setadiawa raupui so vava borai veveruana na Antiokhia pasi. Avori setamiasa Barnabasi ria so Antiokhia. E nana Barnabasi ria so wana pa, siejo Syen Allah nie sanepaja pai vieruana so kaiwasa venana wasia pa, Barnabasi sane vesasie vesiri. Apa Barnabasi diono kavo sanepaja so sia, ave amamo sene sanetiar pasi sikarakuai e senggor usara maso Syen. Barnabasi ma siniotu viate nina e dionu tutir Wainunu Sren pai e nie sanetiar pai kierakuai, apavo kior kaiwasa pa sepau senda usara Syen. Janama Barnabasi riara so bendar Tarsus e siesera Saulusi. Manau na siemuai Saulusi pa, Barnabasi kiori so Antiokhia e sumasoi tutir siniotu vesanemitiar venana jasia woroi pa taun siri. Suraniniau siniotu pa pau na wana. Na Antiokhia nine ma retena mo sesau kaiwasa vesanemitiar Yesus pasia ve siniotu Kristen. Nana rabua jani nabi pa sembe toi sendama nana Yerusalem so Antiokhia. Nana rabua sia esi sano pa Agabusi siemuai paja nana Wainunu Sren pai e tiopa, toapa nari dunia vetutira tiere vavisi pimasa pesi. (Vevata vavisi ninei sivediadi nana rabua Klaudius vie pareta pa.)4 Apa Yesus nie verausari pasia senggutu kavo ave setanatu pi senduir pasi maso mambeneta vemasoi na Yudea pasia; siri-siri dienatu ariri pi vitopi dio diona pa. Senggutu kavo pa e senanari kota, avori setamiasa Barnabasi tutiri Saulusi ave sunggor pi senduira pasi maso penatua nana siniotu vesanemitiar pasia.
Source notes (4)
- Footnote Mambeneta rim e siri Siniotu Kristen Yahudi, e sesua so Kornelius nie anio pai vekavo vavera tutiri pareta agama Yahudi pai dieranduna sesua so siniotu Yahudi va pasia sene anio pasi.
- Cross-reference Kis. 1:5
- Cross-reference Kis. 8:1-4
- Cross-reference Kis. 21:10
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.