Rasul 12

Herodes Agripai diono marior so siniotu vesanemitiar maso Yesus pasia

1Nana rabua jana kota, raja Herodesi diemias nie verut pimamuna pasia ave setono marior maso siniotu na kuaruvi vesanemitiar pesia. 2E i ma diemias nie verut pimamuna pasia ave semu Yakobusi, Yohanesi netavava pai, tutiri sumbe pai. 3Nanapi Herodesi siejo kaiwasa Yahudi pasia pa, sesanemi vesieni so nienari tojana pa, avori nienari vea e diemias siniotu verut pimamuna pasia setapu Petrusi kota. Vava jana veruana nana Raria Baba Mamami Vevaro Ragi pai1. 4Manau na setapu Petrusi pa, Herodesi diemiasa nie verut pimamuna pasia e setoni e sua nana bui pai. Kuaruvi verut pimamuna pa ata sesamuai amias ave setarama Petrusi na jana -- kuaruvi pa siri ma siniotu verut pimamuna pa sembe at. Nanapi raria Paskah pai 2mienau pa, Herodesi nari kior Petrusi e dutani na aropo kaiwasa vepau pasia.3 5Apa setonae Petrusi sua nana bui pai, vape siniotu na kuaruvi vesanemitiar pasia sembe nadi vei vea tutir sesanemitiar vevata mo maso Syen so Petrusi.

Syen nie siniotu rora pai suviri Petrusi nana bui pa

6Nana diru pa Herodesi aja kior Petrusi maso aropo kaiwasa vepau pasia varami. Petrusi andija diena e verut pimamuna viarami pasia senggasie kepani tutiri rante pa muandu e sumbe muandu surarama nana rawa sara tutiri rawa vata pa. Esia kota aja setarama na rature bui pai rami. 7Worabua vae tiendoro Syen nie siniotu rora pesi diosa na jana, e piesi vieva ariri sasaar e disambiara nana andiraro bui pai. Avori siniotu rora pai nini Petrusi veito biatai avori kievo e diojo, “Saira e buatau!” Raria jani kota rante pa sitaisu nana Petrusi vara pa. 8Avori siniotu rora jani kievo maso i e diojo, “Suesu nomu sasu pasi e kuesie nomu wai aeva sor pasi.” Apa Petrusi nienari ariri siniotu rora pai kievo pa. Janama siniotu rora pai kievo ea e diojo, “Suesu nomu avavar viaroi pai e rua usara jau.” 9Avori Petrusi ria usara siniotu rora pai e susuvi, vape Petrusi ruini va toapa vevata mo pi siniotu rora pai nienari pasi sive ruana. Petrusi miemo janama sajajo nina vea. 10Sunda kara uta arama retena pai tutiri veve muandu pai, sunda so rature besi pai, rature vera so bendar pai. Rature jani ma tiesieva mesari e susuvi nana jana. Sunda nana ria vetakakotar pai so ria vevesiei to manau pa, worabua vae tiendor mana siniotu rora pai vievuru Petrusi. 11Manau na jana, Petrusi ruina vitopi veruana maso i pa, apa janama kievo e diojo, “Raria ninei ma iruina vevata mo Syen dienatu nie siniotu rora pai to manau ave amamo riera jau vurusu Herodesi nie paja pai e ave amamo siniotu Yahudi pasia kasa senanari kariria maso jau va.”

12Manau na ruini vava jana pa, Petrusi ria so Mariai nie anio pai, Yohanesi siniani andi sesau i kota na Markusi. Na jana siniotu pa sepau senduir e sembe nadi. 13Nanapa Petrusi tiovo rature pai pa, vavi pesi sano pa Rodei riama ave sieva rature pai. I ma nienaripi ve womi nana anio jani. 14Na rabua Rodei diediawa riruin Petrusi nie raupui pa, janama sane pa vesie mo, apa veito diepai so rarowa e piero sieva rature pai. Avori tiopan sasara maso siniotu veruir na jasia vura, “Petrusi andi diosa na dopo rature wai!” 15Avori senggavo maso i e setojo, “Au ma vue pisavi!” Vape kievo vei vea, toapa vevata mo Petrusi andi niana vorira wa. Apa senggavo ea, “Jani ma esama siniotu rora viarama vediori paina.” 16Vape Petrusi andija tiovo rature pai vei vea, e nanapi sesieva rature pai e sesajori pa, senggavo usara vesiri. 17Vape Petrusi vara kepana sia ave amamo sepeja, janama tiopan sasara maso sia toanetoi avori Syen dioni e suvi nana bui pai to manau pa. Avori kievo maso sia e diojo, “Nari metopanusara vava ninei maso Yakobusi e mambeneta esi vesanemtiar pasia.” Avori ria so uta vevesiei.

18Kausapa vavoru pa, siniotu verut pimamuna viarama bui pasia sengguja aso toanetoi avori Petrusi diadi so suvi nana bui pai pa. 19Avori Herodesi diemias nie verut pimamuna pa esia ave sesasera ariri Petrusi, vape sesamuai va. Janama diemiase senggor verut pimamuna viarama bui pasia setuta sia e semu sia vura.

Manau na jana Herodesi ria nana Yudea e miesoi nana jana woroi pa raria toi na Kaisarea.

Herodes Agripai vioru

20Herodesi kiesiou vesiri maso siniotu venana Tirus e Sidon pasia. Toapa jana sia vura sesanemi siri avori setamiasa siniotu pa sembe toi e sendara so i. Retena pa setararia Blastusi, veveru na Herodesi nie anio raro pai, ave amamo niavori sia. Janama sendama sesamuai Herodesi to manau, avori sesau so i ave sesamuai mari ma vesie pai tutiri, aso kaiwasa venana uta nine sandu diadi so susamuai pisia nana Herodesi nie uta pa.

21Apa nana raria vekutu to manau pai, Herodesi siesuni nana nie sasu atapua raja pai e miesoi na karapesa kerajaan pai e kievavo na dopon kaiwasa pasia. 22Kaiwasa aja viadiawa Herodesi kievo pasia setumi, “Nine ma raupui karuar, e raupui siniotu va!” 23Nana raria jani kota Syen nie siniotu rora pai riora Herodesi, aso tietuan Allah va. Kasievoi pasi siani veito vioru.

24Janama Allah nie Kavo pai dimasasiepara pa e siniotu vesanemitiar maso Yesus pa sepau riwanea.

25Manau na Barnabasi tutir Saulusi sunanari sune nanaripi pasi na Yerusalem to manau pa, sesovera so Antiokhia. Markusi--sesau kota ve Yohanesi, ria tutiri sandu.