Skip to content
BibleKenya

Alkitab Bahasa Wondama

Rasul 13

Syen diono nanaripi atapua so Barnabasi tutiri Saulusi

Nanapi kuaruvi vesanemitiar venana Antiokhia pai pa, nabi tutir guru pa esia senana jana. Sia ma Barnabasi, Simeoni sesauwi Niger pai,1 Lukiusi vieva nanapi Kirene, e Manahem ma setawawati tutiri raja Herodesi, e Saulusi. Nana raria pesi pa, sembe ari maso Syen e sembe puasa pa, Wainunu Sren pai kievo maso sia e diojo, “Metiri Barnabasi e Saulusi sandu atapua so Jau, ave sunanari nanaripi Jisatuira maso sandu to manau pai.” Manau na sembe nadi e sembe puasa pa, sepir sembarami pasi ajai so Barnabasi tutir Saulusi e sesau Allah diono berkat pai maso sandu, avori setamias sandu e sunda.

Barnabasi e Saulusi sunana nu Siprus

Aso Wainunu Sren pai diemiasa Barnabasi e Saulusi sandu, apa sunda so Seleukia. Na wana surapai so nu Siprus. Nanapa sundara so Salamis pa, sutopan usara Allah nie kavo pai na anio ari agama Yahudi pasi. Yohanes Markusi ria tutir rasul pa sandu ave amamo nienari nanaripi e kioto sandu nana sune rara pai.

Avori senda wawariri nu jani vura raso Pafos. Na wana sesamuai siniotu Yahudi pesi sano pa Baryesus. I ma siniotu verut airawi nina e nabi vetindija va. Baryesus ma vie maneta tutiri Sergius Paulusi, gubernur venana nu Siprus pai. Gubernur ninei ma ruini ariri sanepaja vetindija. Apa siau Barnabasi tutir Saulusi sandu e sundama so i, aso miajar diediawa Syen nie kavo pai. Vape siniotu verut airawi pai, Baryesus vesanomi kota na kavo Yunani mamo Elimasi, mu vedior Barnabasi tutir Saulusi sandu, aso Baryesus diosasera ave amamo gubernur pai sanetiar maso Syen Yesus vape moja. Vape Saulusi vesanomi kota na Paulusi pai, oras jani siemuai paja nana Wainunu Sren pai e dieduata siniotu verut airawi pai. Avori Paulisi kievo e diojo, “Eh Elimasi, nuenaripi masi ariri Bilis atu, buonu tutir awitituwa e nuenari kariria pai. Au ma kuevo irara pi saserai veve vata pasi e tawana suesera e riwan aniau veve vata pai nanapi Syen ave sive vata va. Muenau nuenari vava jana! Nine ma suejo, nari Syen diono kariria pai maso au! Au ma nari suejo va, veito raria pa toi ma kasa suejo wor pai nie vebesa pai va.” Raria jani kota, Elimasi siejo mana viabuabu vekumuar pai, situp re pasi, apa veito ria e diekaka e siesera siniotu ave setadidini. Nanapa gubernur pai siejo vitopi ve diadi to manau pa, sanetiar maso Yesus; aso tiendor vesiri so aniau nanapi Syen Yesus.

Paulusi tutir Barnabasi sunda so Antiokhia na provinsi Pisidia

Nana Pafos, Paulusi tutir nie verausari pasia setapai so Perga na provinsi Pamfilia. Na jana Yohanes Markusi ria vurusu sia, avori siovera so Yerusalem. Nana Perga pa, Paulusi e Barnabasi sunda sune rara pai ea so Antiokhia na provinsi Pisidia. Nana raria Sabat pai pa, sendara so anio ari agama Yahudi pai e semasoi na jana. Manau na veveru nana anio ari agama Yahudi pasia setap Allah nie hukum Torat pai e nabi pasia sene aivuire to manau, mamo veveru nana anio ari agama Yahudi pasia setamiasa siniotu pasia setuta maso Paulusi tutiri Barnabasi sandu e setojo, “Maneta pa mia, masisi meto metopana kavo sanepaja pesa maso siniotu ninei mamo, amatono kasau e munggavo sanepaja pai.” Avori Paulusi biatai e siasana vara pa ave sepeja avori kievo e diojo, “Siniotu Yahudi pa mia e siniotu Yahudi va e vekorusara Allah pa mia, ite metadiawa ikavo ne! Kaiwasa Israel pasia sene Allah, andi diri tata pumi pasia to manau, e dionae kaiwasa nine sia sembe kaiwasa vepau vesiri nana rabua senana uta Mesir ariri siniotu wasa. Avori Allah kior sia tutir nie paja e sesuvi vurusu Mesir.2 Allah dienota vea nanapi sene nganggau senanari pasi na rabua senana mapar kurumi pai woroi pa taun siniotu muandu.3 Avori Allah diono kariria pai maso kaiwasa rim e muandu venana uta Kanaan pasia e diono kakopa jani maso kaiwasa Israel pasia ave amamo senewi ve pi,4 vava jasi vura siveruana to manau, woroi pa taun utin at e siniotu muandu e sura. Manau pa Allah diono siniotu vekutu kavo pasia ave sembe ru maso kaiwasa Israel. Siniotu vekutu kavo pa vepui mo andina nabi Samuel.5 Janama kaiwasa Israel pasia sesau raja pesi, apa Allah diono Sauli, Kish atu pai nanapi Benyamin nie usapui, e vie raja so sia woroi pa taun siniotu muandu.6 Manau na Allah viara Sauli vurusu nie masasoi raja pai pa, I ma siasana Dauti vie raja so sia. E Allah kievo nanapi Dauti toapa nine, ‘Isamuai Dauti Isai atu pai, i ma diono sane vesieni so Jau e nienari pi imajara pasi vura.’7 Nana Dauti nie usapui pai, andi Allah siasana siniotu pesi viediajara Raja Vekor Vesie maso kaiwasa Israel pai, ariri dierer to manau pa. E Yesus, I ma Raja Vekor Vesie paina. Yesus ria nie nanaripi pai varami pa, Yohanesi tiopan kaiwasa Israel pasia to manau, ave amamo semanau sene tatar pasi e sesamuai kambu masi.8 E nana rabua Yohanesi deriasi mienau nie nanaripi pai pa, kievo maso siniotu pasia e diojo, ‘Ariri mia mamo teini jau? Ja ma siniotu metanota paina va. Mesanemipaja, siniotu jani ma nari riama nana raria vare imanau nanaripi pai. Ja ma sa ipa so ireku nie wai ae va sor pasi va.’9 Ine maneta pa mia, Abrahami tapu pa mia, tutir siniotu Yahudi va vekorusara Allah pa mia! Allah dienatu kavo vesie pai maso tata to manau. Kaiwasa vemasoi nana Yerusalem pasia, tutir veveru pasia senduini va so Yesus i ma Raja Vekor Vesie paina. Sia ma senduini va so nabi pasia sene aniau setap nana raria Sabat pasi vura pa, apa veito semun Yesus e vioru. Vape tutiri senanari to wana, ave amamo simasi tutir nabi pasia setopanusara nari siveruana. Veito sesamuai sasara so I ave setono hukuman voru pesa va, vape sesau so Pilatusi ave amamo semuni e vioru.10 E manau na senanari piborai pasi vura ariri aivuire nana Repo pai nanapi Yesus, siniotu verausari pasia sembiara Nie tarai vevoru pai nana aitabat pai, avori sepiri na papi pasi. Vape Allah dioni e tienam sovera nanapi voru pai. Janama woroi pa raria toi ma riama vieruani maso kaiwasa verausari pasia nana Galilea so Yerusalem. E raria ninei siniotu jasia sembe saksi so Yesus maso kaiwasa Israel pasia.11 Apavo raria ninei amatopana Kavo Vesie maso mia, vitoni Allah dierer maso tata pumi pasia to manau pa, Allah nienari maso tata, e tata ma sene usapui, nanapi diona e Yesus tienam riwanea vurusu voru pai pa. Aso nana surat Mazmur veve muandu pai vui tonine,

‘Au ma ine Atuma paini Au,

raria ninei Ive tama maso Au to manau.’12

Allah dionae Yesus tienam sovera nana voru pai to manau. E nine ma nari sa siemuai voru pai riwanea nana papi pai va. Nanapi vava ninei Allah kievo e diojo,

‘Nari diono arer veve sren pai, ariria nari vie diadi maso Au,

andina berkat Jerera to manau maso Dauti pai e nari Jono berkat maso mia kota.’

Apa Dauti kievo maso Allah nana ayat vevesiei pesi ea pa nana surat Mazmur,

‘Au ma buonae Nomu Womi veve sren jani vioru e kasa nie tarai pai piere nana papi pai va.’13

Apa Dauti, nana rabua andia tienam pa, nienari ariri Allah diemiasi pa, avori vioru, setupi siwara tata pumi pasia. Dauti nie tarai pai piere e sinai vura to manau. Vape Yesus, I ma Allah dionie tienam sovera na voru pai to manau, Yesus ma piere e niai va. Apavo maneta pa mia, ave amamo mia ma menduina toapa amatopa nanapi Yesus pa Allah vie ampun mene tatar pasi pa. E nari menduin toapa siniotu vesanemitiar maso Yesus pasia vura, setaisu vurusu tatar pasi, mae tanggorusara Allah nie hukum Musai vui pasi ma, kasa sive diadi e tataisu vurusu tatar pai va. Apavo maneta pa mia, mesanemipai usara to vesie mo e metarama, ave vitopi Allah tiopan nanapi Nie nabi pasia pa, ve diadi maso mia vape moja,

‘Mesanemipai to vesie mo, Eh siniotu vesisiajara pi Allah tiopana pa mia,

nari metandor e memboru!

Aso ja ma nari inanari pi verawai nana raria metenam pa.

Nana rabua siniotu pa tiopana maso mia pa,

vape nari sa mesanemitiar vava jani va.’”14

Nanapi Paulusi tutir Barnabasi susuvi nana anio ari agama Yahudi pai pa, siniotu venana anio ari agama Yahudi pasia sesau so sandu ave susovera na raria Sabat vesousara pai, ave sunggavora ariri nana vava jasi riwanea. Manau na kaiwasa pa sesuvi nana anio ari agama Yahudi pai pa, siniotu Yahudi e siniotu vevesiei vesua nana agama Yahudi pasia sepau senda usara Paulusi e Barnabasi sandu. Apa rasul pa sandu suraniniau e surono kavo sanepaja so sia ave tawana setenam nana Allah nie vesie pai. Nana raria Sabat vesousara pai pa, vare kaiwasa na bendar jani vura senduir ave setadiawa Allah nie kavo pai. Vape siniotu Yahudi pasia sesanemi vesie mo va, aso siniotu vepau pasia sendama ave setadiawa Paulusi tutir Barnabasi sunggavo. Sia ma sesisiajara Paulusi e, setawairara kavo Paulusi tiopana pasi. Vape Paulusi tutir Barnabasi sunggavo tutir sumatai va, e surojo, “Nari amatopana Allah nie kavo pai maso mia veve Yahudi pasia retena. Vape, aso mia metawa irari kavo pana, mia ma matau menggutu to manau, toapa kasa diadi so mesamuai tenam va veito woroi-woroi pai. Apavo nine ma amambavuru mia e amanda maso kaiwasa vevesiei, kaiwasa Yahudi va pasia. Aso Allah diemiasa ama tutir Nie kavo pai e, diojo,

‘Jiri au to manau, ave vue sasaar so kaiwasa vevesiei veruin Ja varami pasia,

ave tuopana kavo vesie ariri Jono vesie pai toapa, setisamuai ampun e tenam to woroi-woroi mo pai, raso kaiwasa venana dunia nei vetutira pa.’”15

Nana raria siniotu Yahudi va pasia setadiawa Paulusi tutir Barnabasi sunggavo tonine pa, sesanemi pasi siete e sesanandik so Allah aso Nie kavo pai. E kaiwasa Allah diri to manau pasia ave amamo sesamuai tenam pai to woroi-woroi mo, apa kaiwasa nine sia sesanemitiar maso Yesus. Avori Syen nie kavo pai dimasiepara so uta vura. Vape siniotu Yahudi pasia senggavo amias vavi veve sano vematai Allah e siniotu veve baba pasia nana bendar jani. Apa setono kariria maso Paulusi e Barnabasi sandu, setatavar sandu nana uta jana. Vape Paulusi e Barnabasi sundora totapa wabu vena sundaemi pasi ave sive sanepaja so sia toapa, Allah nari diono kariria pai maso sia. Avori senda so Ikonium.16 Vape siniotu verausara Yesus na Antiokhia pasia setenam tutir sane vesie e senana Wainunu Sren pai nie paja.

Source notes (16)
  1. Footnote Niger Siniotu vekumamasi pai
  2. Cross-reference Kel. 1:7, 12:51
  3. Cross-reference Ul. 1:31
  4. Cross-reference Ul. 7:1
  5. Cross-reference Hak. 2:16; 1Sam. 3:20
  6. Cross-reference 1Sam. 10:17-21
  7. Cross-reference 1Sam. 13:14; Mzm. 89:21
  8. Cross-reference Luk. 3:3
  9. Cross-reference Yoh. 1:20, 27
  10. Cross-reference Mat. 27:22-23, 57-61
  11. Cross-reference Kis. 1:3
  12. Cross-reference Mzm. 2:7
  13. Cross-reference Mzm. 16:10
  14. Cross-reference Hab. 1:5
  15. Cross-reference Yes. 49:6
  16. Cross-reference Mat. 10:14

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.