Alkitab Bahasa Wondama
Rasul 14
Paulusi tutir Barnabasi sunana Ikonium
Nanapi Paulusi tutiri Barnabasi sundama so Ikonium pa, masi ariri bendar esi sunda soa to manau pasi, apa sunda kota so anio ari agama Yahudi pasi e suraniniau nanapi Yesus na wana. Suraniniau tutiri paja nanapi Syen pai, apajoma kaiwasa Yahudi pasia e siniotu Yahudi va pasia sepau sesanemitiar maso Yesus. Vape siniotu Yahudi vekambarai vesanemitiar pasia, senggavo amias siniotu Yahudi va pasia, veito senggasiou kaiwasa vesanemitiar maso Yesus pasia. Apavo Paulusi tutir Barnabasi sumasoi to woroi na jana. E suraniniau nanapi Syen tutir sumatai va. Janama Syen vieruana toapa, kavo rasul pa sutopana pai nanapi Syen nie vesie pai, vie vata; I ma diono paja maso sandu ave sunanari pitandor e vava verawai. Vape siniotu vemasoi na bendar jasia vura semasavu ve muandu; Esia ma senavori siniotu Yahudi pasia e esia ma senavori rasul pa sandu. Avori siniotu Yahudi e veveru tutir siniotu Yahudi va pasia sesanemi siri ave setono kariria e seso rasul pa sandu nana rovuki. Vape rasul pa sandu sunduin vava jana, apa surapai vurusu uta nine, sunda so Listra tutiri Derbe na provinsi Likaonia pa, sunda wawariri uta venana jasi. Na jana sutopana usara Kavo Vesie pai ea.
Paulusi niana Listra tutiri Derbe
Na Listra pa, siniotu mua pesi i ma ae pasi simarera nana retena siniani diavini pa, apa veito ria va. Siniotu jani miesoi e diediawa Paulusi kievo pa. Paulusi siejo siniotu jani e ruini siniotu nei sanetiar maso Yesus e siemuai panam, avori Paulusi kievo tutir raupui vebaba e diojo, “Buosa to tindija!” Siniotu jani kiopa e diosa avori ria vavera. Nanapi siniotu vepau pasia sesajo vitopi Paulusi nienari pa, setananar nana kavo Likaonia e setojo, “Karuar tasom pa siviar mesu so dunia nei ariri tarai siniotu to manau.” Avori sesau Barnabasi ve Zeus, e sesau Hermes ve Paulusi, aso Paulusi ni kievo pana. Imam viono som so Karuar Zeus pai, nie anio vesom pai niana dopon bendar pai. Imam pai riama tutir kior sapi mua e pi marandi nana ariau so rature bendar pai. I ma dio ria tutir kaiwasa vepau pasia e, setono pisom maso rasul pa sandu. Nanapi Barnabasi tutir Paulusi suradiawa vitoni siniotu ja sia seto senanari pa, sundaba sune avavar pasi, avori surapai so kaiwasa pai na rabua wa, avori surananar e surojo, “Maneta pa mia, menanari vava jana vape moja! Nandu ma siniotu ni nandu vea, masi vaveri tutiri mia. Amundama so nine ave amutopana Kavo Vesie pai maso mia, ave memanau mesom karuar veve vata va pasi, vape mesovera e mesom Allah vetenam pai, venanari rora e kakopa e rawana pai tutiri pi venana raro pasi vura. Nana raria vepapo pa ma, Allah tituwa siniotu pasia e setenam ariri sene majar pasi. Vape Allah vieruani tawana nanapi nie vesie pai ariri vava pa pau, andina viara rama nana rora wa e, dionae pitatana pa sisuviri buo vepau. Diono pisia vemasi maso mia e dionae mesanemi vesasie.” Amana Paulusi tutiri Barnabasi sutopa toapa jana, senggambarai semanau setono pi som so nandu, vape vepui pa semanau setono pi som.
Avori siniotu Yahudi pa sembe toi sendama so Listra nana Antiokhia e Ikonium. Senggavo amiasa siniotu vepau jasia ave senavori sia. Avori siniotu vepau jasia seso Paulusi tutir rovuki avori sepapari so bendar pai rawa vorira pa, aso semamo ma vioru to manau. Vape nanapa siniotu verausara Yesus pasia setosa wawarira Paulusi pa, biatai e suapui sovera so bendar pai. Kausapa pa ria so Derbe tutiri Barnabasi.
Paulusi tutir Barnabasi susovera so Antiokhia
Paulusi tutiri Barnabasi sutopana Kavo Vesie pai na Derbe e siniotu pa sepau sesanemitiar Yesus. Manau na jana pa, sesovera so Listra, janama sunda so Ikonium, avori sunda so Antiokhia na provinsi Pisidia. Na bendar pasi, suronae siniotu verausara Yesus pasia senggarakuai nana sene sanetiar pasi e surono kavo sanepaja maso sia ave amamo senggor usara Syen Yesus vei vea, e sunggavo e surojo, “Ave amamo tasua so Allah nie uta vie pareta ariri raja pa, tata ma nari tasamuai marior pa pau.” Paulusi e Barnabasi sundusasana penatua pasia nana kuaruvi vesanemitiar pa siri-siri. Avori sembe nadi e sembe puasa, susiwi penatua jasia maso Syen, andi sesanemitiari pa. Avori Paulusi e Barnabasi sunda so uta provinsi Pisidia vura e sunda raso provinsi Pamfilia. Sia ma setopanusara Syen nie kavo pai ea na Perga, avori senda so Atalia. Nana jana susa na wa pai, e surapai sovera so Antiokhia. Jani ma bendar papopa, sesiwi sandu maso Allah nie vesie pai, ave sunanari nanaripi erine sunanari to manau pai. Nanapa Paulusi e Barnabasi sundama so Antiokhia pa, sunduiri siniotu na kuaruvi vesanemitiar pasi vura, avori sutopan usara pi vura Allah nienari nana sandu pasi. Sutopanusara kota nanapi Allah diono ria to manau maso kaiwasa Yahudi va pasia, ave amamo sesanemitiar maso Syen Yesus. Nanapi Antiokhia pa, Paulusi e Barnabasi sumasoi tutiri siniotu vesanemitiar pasia to woroi woroi.
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.