Rasul 3

Petrusi dionae siniotu vemarera pai pienam

1Nana raria pesi pa Petrusi tutir Yohanesi sunda so Anio Syen pai ave sumbe nadi, nana oras toru ravinena pa. 2Nana jana siniotu mua pesi ma mierera na retena vie diadi pa, raria vura siniotu pa sembe toi senggori sepiri deriasi rature vesanomi na, “Rature Viate pai.” Na jana siau pipi maso kaiwasa vesua e vesuvi na Anio Syen pasia. 3Janama siniotu vemarera ninei siejo Petrusi tutir Yohanesi suro susua na Anio Syen pai, siau so sandu ave surono pipi so i. 4Apa susajo vei vea maso i, avori Petrusi kievo e diojo, “Suejo maso nandu!” 5Avori siniotu jani siejo maso sandu tutir sanetiar toapa nari siemuai piesa nana sandu. 6Vape Petrusi kievo maso i e diojo, “Ja ma ivaro pipi vesiri. Vape vitopi nana jau pa, nari jono maso au: Nana Yesus Kristusi, siniotu Nazaret pai sano pa, suobata au e rua!” 7Avori Petrusi rut na siniotu vemarera pai vara vata pa e diedidini e diosa. Nana raria jani kota ae pasi tutir ae kamai pasi sipaja. 8Avori siniotu vemarera jani kiekopa e diosa avori ria vavera, janama ria usara Petrusi tutir Yohanesi e sesua so Anio Syen pai tutir ria kiekopa e sienandiki Allah. 9E kaiwasa pasia vura sesajo siniotu pai ria e disanandik Allah. 10Avori senduina siniotu ninei ma tawana miesoi e siau pi na “Rature Viate pai” na Anio Syen pai. Apa kaiwasa pasia setandor e setatara senggavo aso sesajo pi vitopi vediadi so siniotu jani e ria to manau pa.

Petrusi kievavo maso siniotu vepau pasia

11Aso siniotu jani ria usara Petrusi tutir Yohanesi, apa kaiwasa pa sepau senggavo usara vesiri e sendama sesorum maso setoru nana varavu vesanomi na Varavu Salomoi1. 12Nanapa Petrusi siejo kaiwasa vepau jasia pa kievo maso sia e diojo, “E siniotu Israel pa mia, aso vitopi menggavo usara so vava nine pa? E aso vitopi mesajo vei vea maso ama pa? Masisi amasamuai paja verawai vesiri pivai vesie atapua na sajajo Allah so amatonae siniotu ninei pienam e diadi so ria pa. 13Ama ma piva, vape Allah andi dioni e pienam. Allah Abrahami, Isaki, e Yakopi, andina Allah tane tapu venanari vava nine ave tasanandiki nie womi pai andina Yesus. Yesus andi metonae semuni to manau pa. Metawa irari na aropo Pilatusi, nana raria Pilatusi kutu to manau ave rierai pa.2 14Vape mia ma metawa irara veve Sren nei e Vetindija nei, e mia ma mesau to karakuai maso Pilatusi ave riera siniotu vemamu nei maso mia.3 15Toapa jana memuni to manau, I ma tane umaja tenam so siniotu vura. E Allah dioni e tienam sovera nana voru pai. E amasajo vava jana to manau na amandemi nesi. 16Maneta pa mia mesajo na mendemi pasi to manau e menduini vitopi veruana tutir siniotu vemarera ninei pa. I ma piaja to manau e pienam sovera pa aso i ma sanetiar maso Yesus tutir nie paja pai. Apa siniotu ninei pienam sovera to manau nana dopon mambeneta pasia vura.

17Maneta pa mia! Janama iruina toapa vitopi mia tutir siniotu veveru pasia menanari maso Yesus pa, mia menanari aso menduin va so vitopi aja menanari pa. 18Vape tutir vava jana vediadi ariri Allah tiopan maso nabi pasia na papopa to manau, toapa Raja Vekor Vesie pai nari siemuai marior e vioru. 19Apavo Maneta pa mia, memanau mene tatar pasi e mesovera maso Allah, ave ruasa rurana mene tatar pasi. 20Janama Allah diono raria vesie ninei ariri nie arer pai, raria jani mesanemi vesie vesiri. Nari Allah diemiasa Yesus maso mia pa aso I ma Allah diri to manau e vie Raja Vekor Vesie. 21Yesus ma nia vei nana rora wa veito Allah nienari pi vura e sivavoru ariri Allah kavo kievora maso nie nabi veve Sren pasia nana raria vepapo. 22Musai kievo to manau nana nine e diojo, ‘Allah mene Syen pai nari diemiasa Nabi pesi nanapi matau mene usapui pai, ariri diemiasa ja pa. Mia vura vevata nari metadiawa kavo vitopi Nabi jani kievora maso mia pa.4 23E teini kiorusara Nabi jani va nari Allah suviri nana nie usapui pai e diono kariria maso i.’ 24Nabi pasia setopan sasara Allah nie kavo pai to manau, retena pa nana nabi Samuel e nabi vevesiei vepui nari verama pasia, sia vura setopa sasara nanapi rabua nine. 25Nabi pasia setopan sasara Allah nie arer pai maso mambeneta pasia. Nanapi arer Allah nienari tutir tatapumi pai pa. Allah kievo maso Abrahami to nine, ‘Nari nomu usapui pai viediajara e nari jono berkat pai maso kaiwasa venana dunia nei vura.’ Arer ninei kota maso mia.5 26Nana raria Allah dionae nie womi pa Yesus tienam sovera pa, retena mo pa Allah diemiasa I maso usapui Israel pa mia, ave diono berkat pai maso mia siri-siri e memanau nana mene tatar pasi avori mesovera so Syen.”