Alkitab Bahasa Wondama
Rasul 2
Wainunu Sren pai riama pa
Nana raria Pentakosta1 pai riama pa, siniotu vesanemitiar maso Yesus pa sia vura senduir nana anio pesi.2 Avori katu esa mana setandor vesiri, e kaiwasa pasia setadiawa pi verotu nana rora pai masisi wana vekarakuai. Verotu pai tievavun anio senduir nana pai vura. Avori sesajo piesi vieviar ariri adia, e vieva ariri tapare miesasiepar nana anio pa raropa e siser na siniotu pa siri-siri. Apa sia vura setonu tutir Wainunu Sren pai, e setinggavavo nana kavo vevesiei ariri Wainunu Sren pai diono paja maso sia e setinggavora pa.
Nana rabua jana pa, kaiwasa Yahudi venana uta saserai na dunia vetutira, sendama so bendar Yerusalem. Sia ma kaiwasa vekorusara Allah pa siana. Nana rabua setadiawa pi verotu jani, apa kaiwasa pa sepau vesiri senda maso uta jana e sesorum. Sia vura setandor aso setadiawa siniotu vesanemitiar pasia senggavavo nana siniotu verama na raria jani pasia sene kavo pa siri-siri pa. Sia vura setandor vesiri e setojo, “Siniotu vekavo nine sia vura ma siniotu vevava nana Galilea sia na, piva e? Vitopi onae vava nine vediadi pa, veito tata vura tatadiawa senggavo nana tane kavo aniose pa siri-siri! Tata ma tambava nana uta Partia, Media, Elam; uta Mesopotamia, Yudea, Kapadokia; nana Pontus nana uta Asia, nana uta Frigia e Pamfilia, nana Mesir e uta esi pasi na Libia deriaisi Kirene; tata kota ma esia sendama nana bendar Roma, kaiwasa Yahudi tutir kaiwasa vevesiei kota vesua na agama Yahudi; esia kota sendama nana nu Kreta e uta Arab. Tata vura tatadiawa senggavo nana tane kavo pa siri-siri nanapi vava pitandor Allah nienari pasi!” Siniotu jasia senggavo usara e sembaro ria e setuta vaveri sia e setojo, “Toane toi avori vava nine veruana pa?” Vape esia kota ma sesisiajar verausara Yesus pasia avori senggavo e setojo, “Sia ma sua pasi simu sia aso setunu anggur pana.”
Petrusi tiopanusara kavo aniau maso kaiwasa vepau
Avori Petrusi diosa tutiri rasul sura e siri pasia, e tutir raupui vebaba kievo maso kaiwasa pai e diojo, “Ine maneta pa mia siniotu Yahudi venana bendar Yerusalem pa mia vura, metadiawa to vesie mo aso nari itopan sasara maso mia ariri pi vevediadi nine. Siniotu nine sia ma sua pasi simu sia va, ariri mene sanepaja pai, aso erine vori oras rim e ata bera vavoru ne. Vape metadiawa e mesajo vava nine, vevata mo Allah tiopan sasara to manau nanapi nie nabi pai Yoeli e tiopa e diojo:
Allah kievo e diojo, ‘Nana raria vemanau pai
nari jono ine Wainunu Sren nei so siniotu vura.
Nomu atuma mua pasia e atuma vavi pasia nari setopanusara vava itopana so sia pasi.
Nomu atuma vavoru pasia nari sesajo vava iveruana pasi.
Nomu baba pasia nari setanamija nanapi anamija iveruana maso sia pasi.3
Maso Ine womi pasia -- mua e vavi pasia,
nari Jono Wainunu Sren pai maso mia nana raria jani.
Sia ma nari setopanusara vava itopana maso sia pasi.
E nana rabua jana, Ja kota nari inanari pitandor pa pau
na vavo rora wa e na dou kakopa nei;
nana raria jani, nari vieruana veria e adia, e wojou vebatioir.
Nari wor pai riwanie vie kumuar,
e sembai pai riwanie vie sianggono.
Manau jana, Syen Nie raria vebaba ma verawai jani vieruana.
E nana raria jani, siniotu teini siau maso Syen sano pa,
nari siemuai vesie vurusu kariria pai.’
Apavo Ine maneta kaiwasa Israel pa mia! Metadiawa kavo vitopi ikavora ne: Yesus siniotu Nazaret pai ma, Allah diono nanaripi maso I aso mia. E Allah vie ruana vava jana maso mia to manau, tutir nienari pitandor e vava verawai nanapi Yesus pasi, apavo mia ma menduinasi to manau. Ariri vitopi Allah kutu to manau ave diono Yesus maso mia. E nanapa Allah dioni maso mia, e metonae siniotu vetatar pasia semuni e sepai na aitabat pai.4 Vape Allah dionae tienam riwanea e suvi nana uta vevoru pa senana pa, aso uta jana ma vediajara siniotu pa semarior apavo kasa niana uta vevoru pasia senana pa ea va.5 Nanapi Yesus matauni, Dauti ma kievo e diojo,
‘Tawana isajo Syen na dopon jau;
I ma diosa tutiri ja na rawa vata pa apavo kasa imanawar va. 6
Apajoma sanene vesie rawai,
e isom isanandiki,
kota nari ine tarai nei mienasi tutiri mari aso jana pa isanemitiar maso Allah.
Aso au ma vuevuru ine wainunu nei va e via vea nana uta vevoru pai va.
Au ma kasa vuevu pidiar Nomu Womi vekorusara maso Au pai va. Nie tarai pai piere e niai va.
Au ma bisatuir ria vera so tenam vata mo pai so jau to manau,
E au ma nari buonae isanemi vesasie vevata aso Au ma tutiri jau.’
Ine maneta pa mia, ja ma diadi so itopan sasaar maso mia nanapa Raja Dauti, tane tapu pai. I ma vioru to manau kota; nie kamberei papi pai andine niana rabua tata veito raria ninei. Na rabua Dauti tienam pa, i ma nabi nina kota, apavo i ma ruin arer ninei toapa nari Allah piosasan siniotu pesi nana usapui Dauti e vie pareta ariri raja.7 Apavo Dauti ruin vitopi nari vediadi na raria verama nei, toapa jana kievo nanapi nari tienam riwan ea nana voru pai aso i ma Raja vekor Vesie Allah dierera paina e kasa Allah vievuri nana uta vevoru pasia senana pa va, e nie tarai pai sa piere e niai va. Yesus ni Allah dioni e siobatai nana voru pai to manau, e ama kota amasajo vava jana nana amandemi nesi. Allah piosasani e dionae miesoi nana uta vetariai pa, na Allah rawa vata pa. E kota Yesus siemuai Wainunu Sren tamani dierera pai to manau, Yesus diono Wainunu Sren pai maso ama to manau. Apavo nana raria ninei metadiawa e mesajora pa. Dauti matauni ma sia so rora wa va, vape kievo e diojo,
‘Syen Allah kievo maso ine Syen Yesus pai,8
Muesoi nana rawa vata ne,
veito Jonae siniotu vio vemun au pasia setatuan maso Au!’
Apavo siniotu Israel pa mia vura, menduin ariri mo to tindija, toapa Yesus mepai na aitabat pai, andi Allah dioni tienam to manau e vie Syen ma Kristus, Raja Vekor Vesie.”
Nana rabua siniotu pasia setadiawa Petrusi kievo tonine pa, kavo kievora pa sisosavu sesanemi pasi vesiri, avori setuta maso Petrusi tutir rasul vevesiei pasia e setojo, “Maneta pa mia, nari vitoni amananari pa?” Petrusi ruar e diojo, “Memanau mene tatar pasi e mesovera maso Allah. E mia siri-siri siemuai kambu masi nana Kristus Yesusi sano pa ave amamo mesamuai ampun nana mene tatar pasi. E maneta pa mia nari mesamuai Wainunu Sren pai nana Allah. Aso Wainunu Sren pai andi Allah diereri maso mia, tutir mene usapui pasia tutir mene siniotu venana uta viaroi pasia, kaiwasa pasia vura ma tane Syen Allah matauni siau sia.” Toapa jana Petrusi tiopan sasara maso sia. E tutir kavo vepau pesasi kota, i ma diono kavo sanepaja ave sesuvi vurusu kaiwasa vekariria nine sia. Aso nari Allah diono hukuman maso sia.
Ariri vava vesanemitiar pasia sene tenam pai
Avori vesanemitiar pasia sesamuai aniau nana Petrusi e sesamuai kambu masi, e nana raria jani siniotu vesanemitiar pasia sepau pa vare siaran toru. Senda ariri rasul pasia sene kavo aniau pasi e tawana senduir vura. Setapi vura e sembe nadi vura.
Nana rabua jana, siniotu vura na Yerusalem setandor e sematai aso nari Allah diono nie paja pai maso rasul pasia ave setono pitandor vepau. Siniotu vesanemitiar pasia vura sembe siri e vitosi senesi pa, sembovosi vavera so sia vura.9 Sembova sene kakopa pasi e pi vitopi sene pa. Avori sembovo pipi pasi e setonasi maso siniotu vevaro mo pasia. Raria vura senduir ora nana Anio Syen tutir setapi vura, tutir sane vesie e tutir sane raro viatate nana sene anio pa siri-siri. Sia ma tawana sesanandiki Allah e siniotu vura sesanemi vesie maso sia. Raria vura ma Allah diono siniotu pa sepau ea, e sembavu vurusu sene tatar pasi e sia senggoto kuaruvi nana siniotu vesanemitiar pasia.
Source notes (9)
- Footnote Pentakosta Andina raria veve siniotu muandu e sura nana raria Paskah pai mienau pa.
- Cross-reference Im. 23:15-21; Ul. 16:9-11
- Cross-reference Yl. 2:28-32
- Cross-reference Mat. 27:35; Mrk. 15:24; Luk. 23:33; Yoh. 19:18
- Cross-reference Mat. 28:5-6; Mrk. 16:6; Luk. 24:5
- Cross-reference Mzm. 16:8-11
- Cross-reference Mzm. 132:11; 2Sam. 7:12-13
- Cross-reference Mzm. 110:1
- Cross-reference Kis. 4:32-35
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.