Rasul 1

Yesus dierer so nari Wainunu Sren pai riama

1Teopilusi, atuma vesie panau, nana ine surat retena pai, itopanusara pi vura maso au to manau, nanapi Yesus nienari e dieniniau nana retena nie nanaripi pai,1 2veito raria Allah piosasani so rora wa pa. Aja siasani so rora wa varami pa diono arer so rasul diria pasia nana Wainunu Sren pai. 3Manau nana nie marior pai avori vioru na aitabat pai e tienam riwan ea. E woroi pa raria siniotu muandu vieruani maso rasul pasia toapa vata tienam ea. E I kota kievavo tutir sia nanapi Allah vie pareta ariri Raja pa.

4Nana rabua Yesus nia tutir sia pa, diono arer maso sia e diojo, “Kasa membavu vurusu bendar Yerusalem va, vape metanota nana nine veito Jai diono pi vitopi dierera pa, pi itopan sasara papo maso mia to manau pa.2 5Aso Yohanesi i ma vie masi mia tutir kambu, vape mutu raria pa toi nari Allah vie masi mia nana Wainunu Sren pai.”3

Allah piosasan Yesus so rora wa

6Nana rabua rasul pasia senduir tutir Yesus, setutani e setojo, “Syen, apavo raria ninei buo vuaun riwana pareta usapui Israel e?” 7Yesus ruar maso sia e diojo, “Ine Jai ni matau kutu raria pai ma oras pai. Mia ma menduini va, aso Jai matau ni Andi nie paja pai. 8Vape masisi Wainunu Sren pai riama so mia to manau, nari mesamuai paja. E tutir paja jani, nari metopanusara Jau na Yerusalem e Yudea vura e Samaria veito raso dunia nei vetutira.”4

9Yesus kievo toapa jana so sia to manau pa, Allah piosasan Yesus so rora wa. Nana rabua rasul pasia aja sesajori pa veito arepa pasi sivediori e sesajori ea va.5 10Na rabua Yesus sia so rora wa pa, sesajo usari vei vea, avori katu esa ma setandor vesiri aso siniotu rora pa muandu susasun avavar vemamara e surosa siwara sia. 11Avori siniotu rora ne sandu sunggavo maso sia e surojo, “Eh siniotu Galilea pa mia, vitopi onae metosa e mesajo ajai so rora wa pa? Yesus ni siajai so rora wa nana aropo mia vura, nari siovera ea ariri vava vemasi mesajo siajai so rora wa pa.”

Rasul pasia setanota

12Janama rasul pasia sesovera nana suovavo Zaitun so bendar Yerusalem, vekasau pa vare kilo siri6 nana bendar jani. 13Na bendar Yerusalem senda so anio senana pai, avori sesajai so andi raro vavo pai. Rasul jasia, i ma Petrusi e Yohanesi, Yakobusi e Andreasi, Pilipusi e Tomasi, Bartolomeusi e Matiusi, Yakobusi Alpeusi atu pai, Simoni Patriot e Yudasi Yakobusi atu pai.7 14Rasul pasia tutiri vavi vepapo verausara Yesus pasia e raruo pasia vura e Maria Yesus siniani, sia vura sembe nadi to karakuai e tutiri sane siri, e tutiri sanepaja siri.

Setiri veriwa Yudasi pai

15Nana raria pesi pa verausara Yesus pasia sepau pa vare sembe utin siri e siniotu siri, avori Petrusi diosa e kievo maso sia, e diojo,

16“Maneta pa mia, Allah nie kavo veve aivuire pesi nana Repo pai ariri veruana. Na Repo jani disatuira toapa Wainunu Sren pai papopa ma dionae Dauti kievavo nanapi Yudasi. Dauti ma papopa kievavo nanapi vitopi nari Yudasi nienari pa; Yudasi ma vie ru maso kaiwasa vetapu Yesus paina. 17Yudasi ma tata esi nina, e i ma Yesus diri to manau kota ave amamo nienaripi tutir tata.”

(18Yudasi i ma siemuai kakopa papi pai to manau nanapi nie vaiti so kariria nienari pai. E kakopa jana i ma vediadi kakopa papi maso matauni, aso nana rabua niana kakopa jana pa, tiawa, e sane pai miesabu veito sane raro pasi sisuvi vura, e vioru.8 19Avori kaiwasa venana bendar Yerusalem pasia vura senduin maso vava jana. Toapa jana, kakopa jana setonae sano “Akeldama”, tandiwa na sene kavo mamo Kakopa Veria.)

20“Aso nana pa surat Mazmur ve aivuire to manau toapa nine,

‘Piesa va siniotu jani nie kakopa pa viata e sieja;

e varo siniotu vena jana.’ Nana aivuire vevesiei pesi vui kota,

‘Piesa va nie masasoija pai siniotu vevesiei pesi kiori vurusui.’

21-22Apavo tatiri siniotu pa siri e riwan Yudasi, ave amamo siniotu jani ma kioto tata e tiopanusara Yesus tienam riwanea. Siniotu jani ma tawana nia tutiri tata nana rabua tanda usara Syen Yesus pa nana retena Yohanesi diono kambu masi pa veito na rabua Allah piosasan Yesus so rora wa pa nana kasau rabua tata pa.”9

23Avori siniotu veruir pasia setisatuir siniotu pa muandu ave sundiwa Yudasi; retena pai Yusupi (sesau kota ve Barsabasi, e sesawi na Yustus kota), e veve muandu pai, Matiasi. 24Avori sembe nadi e setojo, “Syen, ruini sane raro nana siniotu pa siri-siri, apavo bisatuir maso ama teini nari biri nana siniotu muandu nine sandu 25ave nienaripi ariri rasul pasia e riwan Yudasi. Aso Yudasi i ma ria so uta topi ve atapua maso i pa.” 26Avori sendu onde so sano nine sandu e Matiasi andi siemuai, apa seposasani e vie rasul e ria usara rasul sura e siri pasia.