Lukasi 24

Yesus biatai nana voru pai

(Mat. 28:1-10; Mrk. 16:1-8; Yoh. 20:1-10)

1Nana raria ari pai, bera vesiri , vavi pasia senda so papi pai, senggoro mani vesairara ma piriau saserai sembe masis to manau pasi 2Na papi pai, sesamuai rovuki ve siori papi pai kiediduira. 3Avori sesua so papi pai raropa, vape sesamuai Yesus nie tarai vevoru pai va. 4Aja setosa, e sesanempai usara so vava jana, amana setandoro siniotu rora pa sumbe muandu, surosa deriasi sia susasun sandu na avavar visanggapara. 5Sia vura sematai vesiri, avori setatuan raso kakopa pa, vape siniotu rora pa sandu sunggavo maso sia e surojo, “Metotopi mesasera siniotu vetenam nana kasau rabua siniotu vevoru pasia pa? 6I ma nia na nine va, biatai to manau. Mesanemipai vitopi kievora to manau maso mia, nana aja nia Galilea pa, 7toapa ‘Atuma Siniotu pai nari setoni maso siniotu vetatar pa sembarami pasi, e sepai na aitabat pai to vioru, e nari biatai nana raria veve toru pai.’”

8Apa sesanempai maso Yesus nie kavo kievora pasi. 9Manau pa sesovera nana papi pasi, setopanusara pi borai ve veruana pasi maso nie rasul sura e siri pasia tutir vevesiei verausari pasia vura. 10Vavi vetopana pi borai ninesi maso rasul pasia ma: Mariai Magdalenai, Yohana ma Mariai Yakobusi siniani, tutiri vavi vevesiei verausara pasia. 11Vape maso nie verausari pasia semamo ma setojo vavi pasia senggavo kavo vata va, e sesanemitiar va so kavo vitopi vavi pa setopana pa. 12Vape Petrusi biatai e diepai so papi pai. Avori tuan e siejo raso papi pa raropa, amana siejo vei sisi veruani pai vea, avori Petrusi sioverai e vievu e dutan usara na sane raropa, so vitopi ve ruana to manau ne.

Yesus vieruani na ria vera so Emaus pai

(Mrk. 16:12-13)

13Nana raria jani kota, verausara Yesus pa sumbe muandu, sunda so aniose pesa vesanomi na Emaus, woroi pa vare kilo sura e siri nana Yerusalem, 14e sunggavavo nana pi vura veveruana to manau pasi. 15Aja sunggavavo e sunggoro sanepaja, Yesus matauni riama e ria tutiri sandu. 16Susajo Yesus, vape aja piesa vediajara e susajo riruini va. 17Avori Yesus kievo e diojo, “Vitoni munda e munggavori na ria rabua ne pa?”

Apa sumanau eta tutiri sundemi veve sai. 18Avori sandu esi pai, vesanomi na Kleopas, duta maso Yesus e diojo, “Jai, au ma erine mo avori rua na Yerusalem, ruin va so vitopi veruana na raria vepui ninesi pa e?”

19Yesus duta maso sandu e diojo, “Vava vitoi?”

Sunduar maso i e surojo, “Vitoni veruana nana Yesus siniotu Nazaret pai pa. I ma Nabi nina, piaja nana nanaripi, e kavavo na aropo Allah ma dopon amane kaiwasa vura. 20Vape imam veveru pasia tutir veveru maso amane kaiwasa pasia setoni maso veveru na pareta Roma pai, ave setono hukuman voru pai so i, e setavakiri nana aitabat pai. 21Papopa amapir sanetiar andi nari riama, ave piorera kaiwasa Israel pai vurusu pareta Roma pai. Vape raria ninei ma raria veve toru to manau nana nie voru pai. 22Vape kota vavi pa sembe toi na amane kuaruvi ninei bera vesiri senda so papi pai, e sesovera pa senggor raupui vionae amatandor, 23aso sesamuai Yesus nie tarai vevoru pai va. Avori sesovera e senggavo e setojo, sesajo siniotu rora pa muandu, e siniotu rora pa sandu sunggavo maso sia e surojo, Yesus tienam sovera to manau. 24Avori amane maneta pa sembe toi kota, senda so papi pai e sesamuai ariri vitopi vavi pasia setopana pa, vevata, sesajo Yesus kota va.”

25Avori Yesus kievo maso sia e diojo, “Mia ma menduin va! Apa veito mesasieu mesanemitiar pi borai vitosi nabi pasia setopanasi to manau pa! 26Ave menduina toapa Raja vekor vesie nari siemuai marior papori, avori siemuai sanandika.” 27Janama Yesus kievo aririasi maso sia so vitopi ve aivuire maso i nana Repo pai vura, retena nana Musai nie surat pasi tutir nabi pasia sene surat pasi vura.

28Sendama sederiasi aniose pa, avori Yesus diove dio ria rawai sandu, 29vape susuara Yesus e surojo, “Muesoi tutiri nandu, aso wor pai dio tiawa pa wana e deriasi diru to manau.” Apa Yesus sua e diena tutir sandu. 30Nana rabua Yesus miesoi diapi tutir sandu pa, kior mamami pai, tiopan sanandik maso Allah, avori piosavui e dionasi maso sandu. 31Janama sunduina, I ma Yesus, vape niai nana sune sajajo pasi. 32Avori sunggavo vavera na matau sandu e surojo, “Tusanemipa siete vesiri nana rabua Yesus kievo tutir tandu na rara pa rabua pa pa, e tiopanusara kavo na Repo pai maso tandu pa!”

33Avori susobata sandu e susovera so Yerusalem. Na jana susamuai siniotu sura e siri verausari pasia aja senduir sia tutir esi pasia. 34Senggavo e setojo, “Vevata mo Syen biatai to manau e vie ruani maso Simoni.”

35Avori siniotu pa sandu sutopanusara vitopi veruana na ria pa rabua pa e toane toi avori susajo riruin Syen nana rabua piosasavu mamami pai pa.

Yesus vieruani maso verausari pasia vura

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36Aja senggavo usara rami, Yesus matauni diosa tandori na sene kasau rabua pa e kievo e diojo “Mari ma vesie pai maso mia!”

37Sia vura setandor e sematai aso semamo setojo sesajo karuar nina. 38Vape Yesus kievo e diojo, “Metotopi metandor pa e aso vitopi mesanemitiar mo va na mene sane raro pasi pa? 39Mesajo vara nesi ma ae nesi, nine ma jau, karuar va! Metakama e mesajo Jau, isamuai tarai ma sinia, vape karuar pai ma siemuai tarai va ma siemuai sinia va.”

40Yesus kievo toapa jana e dioisara vara e ae pasi maso sia. 41Vape sia kota aja sesanemitiar mo varami e sesanemi pa siete veja ma aja senggavo usara rami aso sesajo Yesus, toapa jana Yesus duta maso sia e diojo, “Apavo mene pisia pa esasi e?” 42Avori setono dia sope venunu pai maso Yesus. 43Yesus kioro dia jani, e diani na sendaromi pasi.

44Yesus kievo maso sia e diojo, “Ninesi ma ikavora si maso mia to manau, nana rabua aja I na tutir mia pa, toapa vava vitopi ve aivuire maso Jau nanapi Musai tutir Nabi pa sia sene surat Torat pasi, e nanapi surat Mazmur pai nari siveruana.”

45Avori Yesus sieva sene sanepaja pasi, ave senduini ariri kavo nana Repo pai. 46Avori kievo maso sia e diojo, “Na Repo pai raropa ve aivuire toapa, Raja vekor vesie pai nari ariria siemuai marior, e siobatai na voru pai, nana raria veve toru pai. 47E kota vetopanusara maso kaiwasa vura nana Raja vekor vesie pai sano pa, ave siniotu pa sesovera sesanemi ave Allah vie ampun sene tatar pasi. E kavo jana nari vetopanusara retena nana Yerusalem. 48Mia nari metopanusara vitopi mesajo na mendemi pasi to manau aso pi veve ruana jasi vura. 49E nari jenatu Wainunu Sren pai maso mia ariri vitopi ve arer to manau na Jai pa. Vape mia vura nari metanota na Yerusalem veito paja na Allah viar maso mia.”

Allah piosasan Yesus so rora wa

(Mrk. 16:19-20; Kis. 1:9-11)

50Avori Yesus kior sia sesuvi na aniose baba pa veito sederiasi Betania. Na jana siasana vara pasi e vie berkat sia. 51E aja andia vie berkat sia rami, tiesiasa vurusu sia e siajai so rora wa. 52Sia vura setatuan ma sesomi, janama sembavu so Yerusalem tutir sane vesasien. 53Sia ma tawana senana Anio Syen pai raropa e sesanandiki Allah.