Lukasi 23

Yesus nia na aropo Pilatusi

(Mat. 27:1-2, 11-14; Mrk. 15:1-5; Yoh. 18:28-38)

1Kaiwasa venana kuaruvi pa setosa vura, avori senggoro Yesus so Pilatusi. 2Sembe karaki na jana, senggavo e setojo, “Amasamuai siniotu ninei I ma diawi vavera kaiwasa nei ave kior sia so ria veve sasara e suara kaiwasa nei ave viaiti pajak maso Kaisar vape moja. Aso diojo I ma Kristusi, andina Raja pai na.”

3Pilatusi duta maso I e diojo, “Vata mo e Au ma Yahudi pa sene Raja paini Au e?” Yesus ruar maso i e diojo, “Au muesari kuevo tojana.”

4Avori Pilatusi kievo maso imam veveru pasia tutir siniotu borai pasia, “Isamuai sasara pesa va nana Siniotu ninei ave jono kariria maso i.”

5Vape senggavo to karakuai vea e setojo, “I ma diawi vavera kaiwasa nei na nie pi aniau pasi ave senggasiou nana uta Yudea vura, retena pa na Galilea, veito manau pa rama so nine.” 6Janama Pilatusi diediawa kavo jana pa, duta e diojo, “Apavo siniotu ninei ma siniotu Galilea nina e?” 7Janama ruina, toapa Yesus ma ria na uta Herodesi vie Raja nanapa, apa Pilatusi dienatu Yesus maso Herodesi, aso na raria jani andia kota na Yerusalem.

Yesus nia na aropo Herodesi

8Rabua Herodesi siejoro Yesus pa, sane pa vesie vesiri. Aso woroi vesiri sane vesie dio siejoro Yesus, aso esa mamo diediawa pivai ave dio siejo Yesus diono pi tandor pa. 9Apa dutan usara Yesus nana kavo saserai vepau, vape Yesus ruara kavo pesa va kota. 10Imam veveru pasia ma siniotu veruin sasavu kavo aniau na Torat pasia kota sembe karaka Yesus to karakuai vesiri. 11Apa janama Herodesi tutiri nie verut pi mamuna pasia sesarap so Yesus e sesisiajari, avori sesasuni nana sasu vesasie, janama senggor soverai raso Pilatusi. 12Nanapi raria jani pa Herodesi tutir Pilatusi sandu ma sunggasisiou sandu vavera, vape na raria jani ma sumbe maneta.

Yesus siemuai kariria voru pai

(Mat. 27:15-26; Mrk. 15:6-15; Yoh. 18:38—19:16)

13Avori Pilatusi ruiri Imam veveru pasia, e veve baba pasia tutiri kaiwasa pasia, 14avori kievo maso sia e diojo, “Menggor siniotu ninei maso jau e metojo I ma diawi vavera kaiwasa borai. Na raria ninei na dopon mia jutan usari to manau, vape isamuai sasara mesopi nana pesa va. 15E Herodesi kota siemuai sasara pesa na va. Toapa jana Herodesi dienatu Yesus sovera maso ama. Aso siniotu ninei ma nienari sasara pesa va, ave vevediajara e siemuai kariria voru pai. 16Apavo nari irasi, janama irerai.”

[ 17Nana raria baba anunu Paskah ora, amamo Pilatusi tawana tiavi siniotu sesiori vediora pa esi maso kaiwasa pasia.] 18Kaiwasa borai veruir na jasia setananar e setojo, “Muni, e tuavin Barabasi maso ama!” (19Nana raria jani Barabasi andia nia na bui pa raropa, aso i ma miemu tutir pareta pai e mu siniotu na aniose jana.)

20Pilatusi kievo riwanea maso sia, aso dio riera Yesus. 21Vape setananar riwanea e setojo, “Metavakiri! Metavakiri!”

22Pilatusi kievo maso sia ve torua pai e diojo, “Sasara vitoni siniotu ninei nienari to manau pa? Isamuai sasara pesa nana I va, so nari siemuai hukuman voru pai. Apavo nari irorai vea, avori irerai.”

23Vape setumi vea to baba ave setavakir Yesus. E janama, sene umi pasi sive diadi. 24Apa Pilatusi dionae Yesus tiau kariria voru pai ariri kaiwasa pa sene majar, 25e riera siniotu sesawa pai, andina Barabasi, siniotu vesamuai bui pai, aso i ma miemu tutir pareta pai e mun siniotu. Avori Pilatusi diono Yesus maso sia ave setoni ariri sene majar.

Sepai Yesus na aitabat pai

(Mat. 27:32-44; Mrk. 15:21-32; Yoh. 19:17-27)

26Apa verut pi mamuna pasia senggoro Yesus. Nana rara pai rabua pa, sesamuai siniotu pesi sano pa Simoni, i ma siniotu Kirene nina, erine vori dio suana aniose nine, avori seposasana aitabat pai ajai so varabuo pa ave sieriowi e ria usara Yesus.

27Kaiwasa borai pasia senda usara Yesus -- na rabua sia pa vavi pa sembe toi. Sesanemi pa sikariria, sesaisi Yesus tutir raupui ve baba. 28Vape Yesus mienawer maso sia, e kievo e diojo, “Vavi Yerusalem pa mia! Mesaisi jau vape moja, mesaisi riwana matau mia tutiri mene atuma pasia. 29Aso nari raria pai riama mamo, siniotu pasia senggavo e setojo, ‘Vesie vesiri so vavi vesanemi masa e vesamuai atuma va, ma vesusu atuma va pa mia!’ 30Nana raria jani siniotu pa nari senggavo maso wi pasi e setojo, ‘Metabari e memba kepana ama!’ E maso suovavo pa mia, ‘Metupu ama!’ 31Aso masisi siniotu pa senanari maso ai vetenam pai, nari inggariria rawai mo senanari maso ai vemasa to manau pai!”

32Siniotu venganggau pa sumbe muandu kota, verut pimamuna pasia senggor sandu, ave setono kariria voru pai maso sandu tutiri Yesus.

Setavakiri Yesus

(Mat. 27:33-44; Mrk. 15:22-32; Yoh. 19:17-24)

33Janama sendama so suovavo Womindu pai, avori sepa Yesus na aitabat pai, tutiri siniotu venganggau pa sandu, esi pai nia na rawa vata mae esi pai nia na rawa sara nana Yesus. 34Janama Yesus vie nadi e diojo, “Jai, vie ampun sene tatar pasi! Aso senduin mojara vitopi senanari pa.”

E verut pi mamuna pasia sengge undi so Yesus nie sasu pasi avori sembovo si usara sia. 35Kaiwasa viosa na jasia sesajo vava jasi vura. Veveru nana Yahudi pasia sesisiajar Yesus e setojo, “I ma riera siniotu vevesiei nana kariria; apavo ite raria ninei riera riwan matauni nana kariria ninei, masisi vevata e, I ma Raja vekor vesie Allah diria paina mamo!”

36Verut pimamuna pasia kota sesisiajari. Sendama setono kambu anggur vesiasa pai maso i, 37avori senggavo e setojo, “Masisi Au ma raja siniotu Yahudi paini Au, amamo ruera riwan Au!”

38Na Yesus ru pai rawa vavo pa, sembui kavo nine, e setojo: “Andi nine Raja siniotu Yahudi paina.”

39Siniotu venganggau setavakira pa sandu esi pai sisiajara Yesus. Kievo e diojo, “Au ma, Raja Vekor Vesie paini Au te piva e? Ruera riwan Au tutir nandu!”

40Vape venganggau pa esi pai suara nie maneta pai e diojo, “Tindija mamo muetai Allah, aso au ma siniotu venganggau vesamuai hukuman voru pai masi vaveri tutiri. 41Tandu ma tusamuai kariria ninei ariri vava tunanari pasi. Vape I ma viero sasara!” 42Avori kievo e diojo, “Yesus sanepai jau, nana raria ruama vue pareta ariri raja pa!”

43Yesus kievo so i e diojo, “Vevata mo raria ninei kota, au ma nari nua tutiri Jau nana Firdaus.”

Yesus vioru pa

(Mat. 27:45-46; Mrk. 15:33-41; Yoh. 19:28-30)

44Nana pa oras sura e muandu raria rabua pa ma, wor pai disambiar va, uta pai vura kumuar veito oras toru ravinena pai. 45Sis viavakir na Anio Syen pa raro pai, miesabu ve muandu. 46Avori Yesus dienanar tutir raupui vebaba e diojo, “Jai! Isiwi Ine tenam nei maso varamu pasi!” Kievo toapa jana to manau pa mana, janama vioru.

47Veveru nana verut pimamuna viosa usari pai siejo pi ve ruana to manau pa sienandik Allah, avori kievo e diojo, “Vevata, siniotu nei ma siniotu vetindija nina.”

48Na jana, siniotu borai verama vesajo vava jasia, sesajo vitopi veruana pa. Sia vura sembavu ma semu sesanemi. 49Yesus nie maneta pasia vura tutir vavi verausari nana Galilea ma pasia, setosa e vekasau, sesajoro vava jasi vura.

Yesus vepiri nana papi pa raropa

(Mat. 27:57-61; Mrk. 15:42-47; Yoh. 19:38-42)

50Siniotu pesi sano pa Yusupi, i ma niana kuaruvi Mahkamah Agama Yahudi pai, e siniotu viate e vene sanepaja vetindija nina. 51I kota ma kiembarai nie kavo senggutu pasi nana kuaruvi Mahkamah Agama Yahudi pai. I ma vieva nanapi Arimatea, kota Yudea, e diotanota raria Allah vie pareta ariri Raja pa. 52Apa Yusupi ria siau so Pilatusi ave kior Yesus nie tarai vevoru pai. 53Janama viar Yesus nie wominggo pai na aitabat pai avav, avori ruani na sis vemamara e vemanis pai. Manau pa piri na kamberei papi nienari na suovavo veve rovuki pai. Kamberei papi jani ma aja sepiri vevoru na varami. 54Raria jani ma raria Jumat; e raria Sabat pai vare dieriasi to.

55Vavi verausara Yesus na Galilea ma pasia senda usara Yusupi e sesajoro papi pai. Sesajoro kota toapa sepiri ariri Yesus nie tarai vevoru pai nana kamberei papi pai raropa.

56Avori janama sembavu, ave sembe masis mani vesairara ma piriau saserai ave sembuvuasi na Yesus nie tarai vevoru pai.

Nana raria Sabat pai pa, semanau senanaripi ave senda ariri Allah nie arer na Torat pai.