Lukasi 22

Veveru nana Yahudi pasia sesasera ria ave seto semu Yesus

(Mat. 26:1-5; Mrk. 14:1-2; Yoh. 11:45-53)

1Nana Raria baba Mamami Vevaro Ragi sesau ve Paskah pai, dieriasi to manau pa. 2Imam veveru pasia tutir siniotu veruin sasavu kavo aniau na Torat pasia, sesasera ria, ave amamo semu manana Yesus, aso sematai maso siniotu borai pasia.

Yudasi viovo Yesus

(Mat. 26:14-16; Mrk. 14:10-11)

3Avori Bilis pai sua so Yudasi, vesanomi kota na Iskariot sane raropa, i ma Yesus nie siniotu sura e muandu verausari pa esi nina. 4Avori Yudasi ria kievo tutir imam veveru pasia ma veveru so viarama Anio Syen pasia, ave amamo viovo Yesus maso sia. 5Sia vura sesanemi pasi siete vesiri so setadiawa kavo jana pa, apa setarer e setojo nari setono pipi maso i. 6Yudasi kota miajar, apa disasera ria viate pesi ave amamo siwi Yesus so sia, tutiri varo siniotu vepau veruina.

Yesus tutir Nie verausara pasia seto setan pisia Paskah pai pa.

(Mat. 26:17-19; Mrk. 14:12-16)

7Raria pai miesi so Anunu Mamami Vevaro Ragi pai, andina domba pisia Paskah pai nari senggutui. 8Apa Yesus diemiasa Petrusi tutir Yohanesi e diojo, “Munda ave mumbe masis pisia Paskah pai maso tata.”

9Suruta maso i e surojo, “Guru, uta topi nari sane vesien so amumbe masis maso Pisia Paskah pai pa?”

10Yesus ruar e diojo, “Nana pa rabua musua so Yerusalem pa, nari musamuai siniotu mua pesi kioro kabesu vesara kambu nana pai, munda usari so anio sua nana pai, 11e mutopa so vene anio pai e murojo, Jai, amune Guru wai duta maso au e diojo, ‘Andiraro topi nari I tutir nie verausara ne sia setapi pisia Paskah pai nana pa?’ 12Avori vene anio pai nari dioisara, andiraro vebaba pesi vena vavopa so mandu e miesis nana pi borai vura. Avori munanari ariri pisia pai nana wana.”

13Yesus kievo to manau pa, Petrusi tutir Yohanesi sunda, susamuai si vura ariri kavo Yesus kievora pasi. Avori sunanari ariri pisia Paskah pai.

Yesus diono pisia pasi ave tasanempai usara maso Nie tarai pai ma veria pai

(Mat. 26:20-29; Mrk. 14:17-25; Yoh. 13:21-30; 1Kor. 11:23-25)

14Janari raria pai miesi pa, Yesus tutir nie rasul pasia semasoi e seta pisia Paskah pai. 15Kievo maso sia e diojo, “Isanemi vesie japisia Paskah ninei tutir mia, nana aja itere marior varami pa!” 16Ikavo maso mia e jojo, vevata mo: Ja ma kasa japisia Paskah ninei ea va, veito Allah riama vie pareta ariri raja, nanapa Anunu Paskah ninei vie ruana na Dunia Vavoru pai pa.

17Manau pa Yesus kioro toki vitunu anggur pai, avori vie nadi e sienandik Allah, janama kievo e diojo, “Menggor ninei, metunumi e membovi usara mia. 18Aso Ikavo maso mia e jojo, vevata mo: nana raria ninei Jau ma nari kasa junu anggur ninei ea va, veito Allah riama vie pareta ariri Raja pa.”

19Manau pa Yesus kior mamami pai. E vie nadi e tiopana vesie maso Allah to manau pa, piosasavu mamami na vara pasi, avori dionasi maso sia e diojo, “Ninei ma ine tarai pai na [vioni vie pi som maso Allah aso mia. Menggori e metani, menanari ariri nine ave metisanemi pai usara Jau.” 20Toapa jana kota setapi to manau pa, diono toki visara anggur pai maso sia e kievo e diojo, “Anggur ninei ma Allah nie arer vavoru nana Ine veria nei -- Nari ivoru e Ine veria vetavuvu so mia pa.”]

21“Vape mesajo! Siniotu vevovo Ja pai, andi nia tutir Ya na nine. 22Vevata Atuma Siniotu pai nari vioru ariri vitopi Allah kutu to manau pa; vape kariria pai maso siniotu vesiwi pai!”

23Apa setutan maso sia vavera, teini nana rabua tata andi nari nienari vava nine pa.

Sembaririwi vavera so teini bieba mo na sia pa

24Vera usara Yesus pasia sembaririwi vavera nana rabua sia so teini bieba na rabua sia pa. 25Yesus kievo maso sia e diojo, “Raja veruin Allah va pasia ma setono kariria maso kaiwasa pai, vape setojo sia ma sena vori kaiwasa pai. 26Vape mia ma metoto jana va, sovera ea mamo, siniotu vio vebaba nana rabua mia, amamo i ma dioni ariri atuma katu vemadia mo, e veveru pai, amamo dioni ariri veve womi. 27Aso teini bieba rawai: siniotu vemasoi e viapi na dora pai te? Siniotu venanaripi usari pai e? Vevata siniotu vemasoi jani. Vape Ja ma Inana rabua mia ariri womi.

28Nana ine kariria borai pasi, mia ma tawana mena tutiri Jau. 29Ariri Jai diono paja maso Jau to manau ave ive pareta, toapa jana kota nari jono paja maso mia ave metimbe pareta. 30Apavo ave metapi e metunu e mesanemi vesie tutir Jau nana raria ive Raja pa. E mia nari membe pareta usapui sura e muandu na kaiwasa Israel pasia.”

Yesus tiopa toapa nari Petrusi piorasa Yesus

(Mat. 26:31-35; Mrk. 14:27-31; Yoh. 13:36-38)

31Avori Yesus kievo e diojo, “Simoni, Simoni, buediawa! Bilis pai siau kasau to manau ave siotouru mia, ariri gandum pasi sipowasa vurusu rawa pasi, apa viate pasi sipowasa vurusu vekariria pasi. 32Vape ive nadi to manau maso au, Simoni, au ma sanetiar vea maso Jau. E masisi suovera to manau maso Jau, buona ve nomu maneta pasia sene sanetiar pasi sikarakuai.”

33Petrusi ruar e diojo, “Syen, ja ma imajar so isu bui e ivoru tutir Au!”

34Vape Yesus kievo e diojo, “Itopa maso au, Petrusi, aja kokori pa sisau nana raria ninei va rami, kuevo puorasa Jau ve toru toapa au ma ruin Ja va.”

Metarama vedior so nari mesamuai marior vepau

35Manau na jana Yesus kievo maso sia e diojo, “Nana pa papopa jemiasa mia pa, jojo kasa menggor karawa va, rota va pivai aeva sor va, apa piesa imbaro mo na mia e?”

Senduar e setojo, “Piva kota!”

36Yesus kievo e diojo, “Vape nine ma, teini nie karawa pesi pivai rota pesi amamo kiori, e teini viero sumbe amamo viovo nie sasu viaroi pai ave dimbori sumbe pesi. 37Aso Ikavo tonine maso mia, surat Repo pai nie ayat verotu toapa nine, ‘I ma vieva ariri siniotu vekariria,’ nari veruana maso Jau. Aso vitopi ve aivuire na Repo pai raropa nanapi Jau pa, veruana na raria ninei.”

38Nie verausari pasia senggavo maso Yesus e setojo, “Syen, suejo, nine ma sumbe pa muandu.”

Yesus ruar e diojo, “Masito manau, kasa kuevo ea maso sumbe pai va1!”

Yesus Vie nadi nana Getsemani pa

(Mat. 26:36-46; Mrk. 14:32-42)

39Avori Yesus ria vurusu aniose vebaba pa e, esa mamo ria so Suovavo Zaitun, e nie verausari pasia kota senda usari.

40Nana pa senda so uta jana to manau, kievo maso sia e diojo, “Membe nadi vea ave amamo metau so sotoura pai vape moja.”

41Avori ria e vie kasau katu nana sia, vekasau pa masi tutiri taso rovuki pa, avori disana aebu pasi e vie nadi, e diojo,

42“Jai, masisi muajar mamo, kuor marior ninei vurusu Jau; vape rua ariri ine majar va, vape ariri Jai nomu majar pai andi vieruana.” 43Avori siniotu rora pesi riama vieruana maso I ave diono paja maso I. 44Aso marior pai mierabat veja, apa vie nadi vevata mo. Nie samajar pasi sivava ariri veria, sitatura so kakopa pa.

45Avori vie nadi to manau pa, biatai e sioverai maso nie verausari pasia, vape siemuai sia mana aja setena rami aso sesanemi pasi sive sai vesiri. 46Avori kievo maso sia e diojo, “Metotopi metena pa? Mesobata mia e membe nadi, ave amamo metau so sotoura pai vape moja.”

Setapu Yesus pa

(Mat. 26:47-56; Mrk. 14:43-50; Yoh. 18:3-11)

47Aja Yesus kievo rami, siniotu pa sepau sendama. Yudasi andi piepo sia, i ma siniotu verausara Yesus pa esi nina. Avori riama so Yesus, e sumi. 48Vape Yesus kievo maso i e diojo, “Yudasi, au ma vuovo Atuma Siniotu pai tutir sumi e?”

49Nana rabua verausara Yesus pa ve nana jasia sesajo vitopi nari veruana pa, senggavo e setojo, “Syen, amamamu tutir sumbe e?” 50Avori siniotu verausara Yesus pasia esi pieratu Imam Baba pai nie womi pai taradiau rawa vata pai na sumbe pai to tieitu.

51Amana Yesus kievo maso i e diojo, “Manau na jana!” Avori Yesus diekara so siniotu jani taradiau pai e dioni e pienam. 52Apa Yesus kievo maso imam veveru pasia tutir veve baba viarama Anio Syen pasia ma veveru na Yahudi verama vio vetapuri pasia, e diojo, “Avo metojo ja ma siniotu viamanana pi ni Jau te? Apa mendama tutir sumbe e airora ave metitapu jau e? 53Raria vura Ina tutir mia na Anio Syen pai, vape metapur Ja va. Vape nine ma mene raria paina so metapur Jau e nine ma paja nana kumuar paina andia tutir mia.”

Petrusi Piorasa Yesus pa

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Avori setapu Yesus e senggori so Imam baba pai nie anio pai, Petrusi ria usara sia nana vekasau. 55Siniotu pasia setapunu adia pesi vieviar na vorira wa e semasoi wawariri, Petrusi ria miesoi tutir sia. 56Vavi venanaripi na jana pa esi siejo Petrusi miesoi deriasi adia pai pa, siesir tawana Petrusi, janama kievo e diojo, “Siniotu ninei kota ria tutiri Yesus!”

57Vape Petrusi pioras e kievo e diojo, “Pivai, ja ma iruin siniotu ninei va!”

58Woroi pesa va, janama siniotu vevesiei pesi siejori e kievo e diojo, “Au kota ma siniotu nine sia esini au!” Vape Petrusi kievo e diojo, “Ja ma pivai!”

59Vare oras pa siri janama siniotu vevesiei pesi ea kievo to baba mo, “Vata, siniotu ninei ma ria usara Yesus, aso i kota ma siniotu Galilea nina!”

60Vape Petrusi ruar e diojo, “Pivai, ja ma iruin va so vitopi kuevora pa.”

Na jana kota, aja Petrusi kievo rami, kokori pa sisau! 61Avori Yesus mienawer e siesir Petrusi. Janama Petrusi sanepai so kavo Yesus kievora to manau so i pa, “Aja kokori pa sisau nana raria ninei va rami, ve toru mo puorasa Jau.” 62Apa Petrusi suvi na jana e sane pa kariria e siai.

Siniotu viarama Anio Syen pasia sesisiajar Yesus e sendorai

(Mat. 26:67-68; Mrk. 14:65)

63Avori siniotu viarama Anio Syen pasia, sesisiajar Yesus e sendorai. 64Setupu re pasi na sis e setutani, “Ite tuopa teini riora Au pa?” 65E senggavo kavo sisiajara pa pau vesiri maso i.

Yesus nia na aropo Mahkamah Agama pai

(Mat. 26:59-66; Mrk. 14:55-64; Yoh. 18:19-24)

66Janari bera vavoru mo pa, veveru na Yahudi pasia ma Imam veveru pasia tutir siniotu veruin sasavu kavo aniau na Torat pasia, senduir sia, avori senggori so Mahkamah agama pai. 67Senggavo maso i e setojo, “Masisi Au ma Raja vekor vesie, Ite tuopan sasara maso ama.”

Yesus ruar e diojo, “Masisi itopa sasara maso mia, vape kasa mesanemitiar va. 68E masisi jutana piesa maso mia, mia kota kasa menduar va. 69Vape woroi ea va so, Atuma Siniotu pai nari miesoi nana Allah Vepaja na pi vura pai rawa vata pa.”

70Sia vura senggavo e setojo, “Toapa jana mamo, Au ma Allah Atu pai ni au e?”

Yesus ruar e diojo, “Ariri menggavo pa, Ja ma Allah Atu paini Jau.”

71Apa senggavo e setojo, “Tata ma kasa tasasera kavo vevesiei ea va. Matauni kievo e diojo i ma miesisi Allah, e tata vura ma tatadiawa nana sore pa to manau.”